މި އަހަރުގެ ޝައްވާލު މަހުގެ ހަނދު ސާބިތުކުރުން އެޕްރީލު މަހުގެ އަށްވަނަ ދުވަހު ބާއްވާ ގޮތަށް ނިންމައިފިއެވެ.
ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) އިން މިއަދު ބުނީ ކުރީ އަހަރުތަކެކޭ ވެސް އެއްފަދައިން މި އަހަރު ވެސް ޝައްވާލު މަހުގެ ހަނދު ސާބިތު ކުރުމަށްޓަކައި މި އަހަރުގެ ޝައްވާލު މަހުގެ ހަނދު ދުށް މީހަކު ނުވަތަ ބަޔަކު ހެކިބަސް އަދާކުރުމަށް ހަމަޖެހިފައި ވަނީ މާލޭގައި ނަމަ މާލޭގެ ކޯޓެއްގެ ޤާޟީއެއްގެ ކުރިމަތީގައި ކަމަށެވެ. އަތޮޅުތެރޭގެ ރަށެއްގައިނަމަ، އެ ރަށެއްގެ މެޖިސްޓްރޭޓް ކޯޓުގެ މެޖިސްޓްރޭޓުގެ ކުރިމަތީގައި ކަމަށެވެ. އަދި މެޖިސްޓްރޭޓެއް ގާއިމުވެ ނެތް ރަށެއްގައި ނަމަ އެ ވަގުތަކު އެ ރަށުގެ ރަށު ކައުންސިލުގެ އިދާރާ ހިންގުމާއި ހަވާލުވެ ހުންނަ އިސްވެރިއެއްގެ ކުރިމަތީގައި ކަމަށެވެ.
ހަނދު ފެނިގެން އެ މައުލޫމާތު ދޭއިރު ގާތްގަނޑަކަށް ހަނދު ހުރި އުސްމިނާއި މިސްރާބާ އަދި މިނޫން ވެސް މިފަދަ މުހިންމު މައުލޫމާތު ދޭން ޖެހެއެވެ.
ޝައްވާލު މަހުގެ ހަނދުގެ މައްސަލަ ވަކިގޮތަކަށް ނިމެންދެން މި ރަމަޟާން މަހުގެ 29 (އެޕްރީލް 8) ވާ ހޯމަ ދުވަހުގެ ހަވީރު 5:30 އިން ފެށިގެން ޑީޖޭއޭ އާއި ރަށްރަށުގެ މެޖިސްޓްރޭޓް ކޯޓުތަކާއި ރަށު ކައުންސިލުގެ އިދާރާތަކުގެ އިތުރުން އަތޮޅު ކައުންސިލުގެ އިދާރާތައް ހުޅުވިފައި ހުންނާނެއެވެ.
ޑީޖޭއޭއިން ވަނީ މި އަހަރުގެ ޝައްވާލު މަހުގެ ހަނދު ދުށް މީހަކު ނުވަތަ ބަޔަކު ވީހާ އަވަހަކަށް މާލޭގައި ނަމަ އެ ޑިޕާޓްމަންޓަށް، ރަށްރަށުގައި ނަމަ އެ ރަށެއްގެ މެޖިސްޓްރޭޓް ކޯޓަށް އަދި މެޖިސްޓްރޭޓަކު ގާއިމުވެ ނެތް ރަށެއްގައި ނަމަ އެ ރަށެއްގެ ރަށު ކައުންސިލުގެ އިދާރާއަށް ހާޒިރުވެ ހަނދާ ބެހޭ މައުލޫމާތު ދިނުމަށް އެދިފައެވެ.
ހެކިބަސް އަދާކުރުމަށް އައުމާއި ދިއުމުގެ ހަރަދު ދޭ ގޮތަށް ހަމަޖެހިފައިވާ ކަމަށް ވެސް ޑީޖޭއޭއިން ބުނެއެވެ.
