ހުޅުމާލެ ދެވަނަ ފިޔަވަހީގައި ތަރައްގީކޮށްފައިވާ ހިޔާ ޓަވަރުތަކުން ބައެއް ވިޔަފާރި ޔުނިޓްތައް ކުއްޔަށް ދިނުމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން އިއުލާންކޮށްފިއެވެ.
އެޗްޑީސީން ކޮށްފައިވާ އިއުލާނެއްގައި ބުނެފައިވަނީ، ”އޯޕަން މާކެޓް ޑިމާންޑް“ އިނީޝިއޭޓިވްގެ ދަށުން ހިޔާ ކޮމާޝަލް ސަރަޙައްދުގެ ދެ ޔުނިޓެއް ކުއްޔަށް ދޫކުރުމަށް ހަމަޖެހިފައިވާ ކަމަށެވެ. އެއީ 546.27 އަކަފޫޓުގެ HIYI2-G-02 ޔުނިޓާއި، 554.66 އަކަފޫޓުގެ HIYI0-G-03 ޔުނިޓް ކަމަށް އެ ކޯޕަރޭޝަނުން ވަނީ މައުލޫމާތު ދީފައެވެ.
މި ޔުނިޓްތަކަށް ޝައުޤުވެރިވާ ފަރާތްތަކުން ޕްރޮޕޯޒަލް ހުށަހެޅުން އޮންނާނީ އަންނަ ޖުލައި މަހުގެ 1 ވަނަ ދުވަހުގެ މެންދުރުފަހު 13:00 އާއި 14:00 އާ ދެމެދު އެޗްޑީސީ މައި އިދާރާގައި ހުންނަ އެގްޒިބިޝަން ސެންޓަރުގައެވެ. ހުށަހަޅާ ޕްރޮޕޯޒަލްތައް ހުޅުވުން ވެސް އޮންނާނީ އެ ދުވަހުގެ މެންދުރުފަހު 14:00 ގައެވެ.
އެޗްޑީސީން ބުނީ މިކަމާ ގުޅޭ މައުލޫމާތު ދިނުމަށް ބާއްވާ ޕްރީ-ޕްރޮޕޯޒަލް މީޓިންގް މި މަހުގެ 14 ވަނަ ދުވަހުގެ ހެނދުނު 10:00 ގައި ޒޫމް މެދުވެރިކޮށް ބޭއްވުމަށް ހަމަޖެހިފައިވާ ކަމަށެވެ. ހަމައެހެންމެ އެއްވެސް ސުވާލެއް އޮތް ނަމަ މި މަހުގެ 17 ވަނަ ދުވަހުގެ މެންދުރު 14:00 ގެ ކުރިން ލިޔުމުން ހުށަހެޅުމުގެ ފުރުސަތު އެ ކުންފުނިން ވަނީ ހުޅުވާލައިފައެވެ. އެޗްޑީސީން ބުނީ މި މަހުގެ 21 ވަނަ ދުވަހު ސުވާލުތަކުގެ ޖަވާބު އެ ކޯޕަރޭޝަނުގެ ވެބްސައިޓްގައި ޝާއިއުކުރެވޭނެ ކަމަށެވެ.
މިކަމާ ގުޅޭ ރިކުއެސްޓް ފޯ ޕްރޮޕޯޒަލް ލިޔެކިޔުންތައް އެ ކޯޕަރޭޝަންގެ ރަސްމީ ވެބްސައިޓުންނާއި އެޗްޑީސީ ޕްރޮޕަޓީޒް ވެބްސައިޓުން ޑައުންލޯޑް ކުރެވޭނެ ކަމަށާއި، މިކަމާ ގުޅޭ މައުލޫމާތުތައް ހޯދުމަކީ ކުރިމަތިލާ ފަރާތްތަކުގެ ޒިންމާއެއް ކަމަށް އެޗްޑީސީން ވަނީ ބުނެފައެވެ.
އެޗްޑީސީން ވަނީ މިކަމާ ގުޅިގެން އިތުރު މައުލޫމާތު ސާފުކުރުމަށް ބޭނުންވާ ފަރާތްތަކުން އެ ކޯޕަރޭޝަނުގެ ސޭލްސް ޑިޕާޓްމަންޓަށް ގުޅައިގެން މައުލޫމާތު ސާފުކުރުމަށް ވަނީ އެދިފައެވެ.
