ދިވެހި ފުލުހުންގެ ޚިދުމަތުން މަސްތުވާތަކެތީގެ މައްސަލަތައް ތަޙުޤީޤުކުރުމުގައި ޢަމަލުކުރާނެ އުސޫލުތައް ހަރުދަނާކުރުމަށްޓަކައި އާ ގަވާއިދެއް އެކުލަވައިލައި ގެޒެޓްކޮށްފިއެވެ.
ދިވެހި ސަރުކާރުގެ ގެޒެޓުގައި މިއަދު ޝާއިޢުކުރެވުނު މި ގަވާއިދަކީ މަސްތުވާތަކެއްޗާ ބެހޭ ޤާނޫނުގެ ދަށުން ލިބިދޭ ބާރުގެ ދަށުން އެކުލަވައިލެވުނު ގަވާއިދެކެވެ. މި ގަވާއިދުގެ މައިގަނޑު މަޤްޞަދަކީ މަސްތުވާތަކެތީގެ މައްސަލަތަކުގައި ’ކޮންޓްރޯލްޑް ޑެލިވަރީ‘ ހިންގުމަށް ހުއްދަ ދިނުމާއި، އެ އޮޕަރޭޝަންތައް ކުރިއަށް ގެންދިއުމުގައި ޢަމަލުކުރާނެ ސާފު އުސޫލުތަކެއް ކަނޑައެޅުމެވެ. ހަމައެއާއެކު، މަސްތުވާތަކެތި ބޭނުންކުރިކަމަށް ތުހުމަތުކުރެވޭ ފަރާތްތަކުގެ ކުޑަކަމުދާ އެއްޗެހި ނެގުމާއި، އެ ތަކެތި ތަޙުލީލުކުރުމަށް ލެބޯޓަރީތަކަށް ފޮނުވުމުގައި ގެންގުޅެންޖެހޭ އިޖުރާތުތައް މި ގަވާއިދުން ވަނީ ބަޔާންކޮށްފައެވެ.
މި ގަވާއިދުގައި ކަނޑައަޅާފައިވާ ގޮތުން، ކޮންޓްރޯލްޑް ޑެލިވަރީ އޮޕަރޭޝަނެއް ހިންގުމުގެ ހުއްދައަށް އެދެވޭނީ ކޮމިޝަނަރ އޮފް ޕޮލިސް ކަނޑައަޅާ ފެންވަރުގެ އޮފިސަރުންނަށެވެ. މިފަދަ އޮޕަރޭޝަންތަކަކީ ފުލުހުންގެ ސީދާ ބެލުމުގެ ދަށުން ރާވައިގެން ހިންގާ ހަރަކާތްތަކަކަށް ވާންޖެހޭނެއެވެ. އޮޕަރޭޝަން ކުރިއަށްދާ ވަގުތުތަކުގައި އެކްޓިވިޓީ ލޮގްތައް ލިޔުމުން ނުވަތަ ރިކޯޑުކޮށްގެން ބަލަހައްޓަންވާނެއެވެ. މީގެ އިތުރުން، މަސްތުވާތަކެއްޗަށް ބަދަލެއްގެ ގޮތުން ’ސަބްސްޓިޓިއުޓް‘ އެއް ބޭނުންކުރެވޭނެ ހާލަތްތަކާއި، އެފަދަ ހާލަތެއްގައި ޢަމަލުކުރަންވީ ގޮތްތައް ވެސް މި ގަވާއިދުގައި ވަނީ ތަފްސީލުކޮށްފައެވެ. އޮޕަރޭޝަންތައް ހިންގުމުގައި ބައިވެރިވާ ފަރާތްތަކުގެ ސަލާމަތާއި ޞިއްޙަތަށް ރައްކާތެރިވުމަކީ ލާޒިމުކަމެއްގެ ގޮތުގައި މި ގަވާއިދުގައި ވަނީ ފާހަގަކޮށްފައެވެ.
މަސްތުވާތަކެތި ބޭނުންކުރިކަމަށް ތުހުމަތުކުރެވޭ މީހުންގެ ކުޑަކަމުދާ އެއްޗެހި ނެގުމުގެ އިޖުރާތުތައް މި ގަވާއިދުގައި ވަރަށް ބޮޑަށް ހަރުދަނާކޮށްފައިވެއެވެ. އެގޮތުން، ސާމްޕަލް ނެގުމުގެ ކުރިން އެ މީހަކަށް ލިބިދޭ ހައްޤުތައް އޮޅުންފިލުވައިދޭންޖެހޭނެއެވެ. ހަމައެހެންމެ، ފުލުހުންގެ ފޮރެންސިކް ލެބޯޓަރީ ނޫން އެހެން ލެބޯޓަރީއަކުން ޓެސްޓުކުރުމަށް އެދުމުގެ ޙައްޤު އެ ފަރާތަށް ލިބިގެންވެއެވެ. ސާމްޕަލް ނެގުމަށްފަހު އެ ތަކެތި ރައްކާތެރިކަމާއެކު ބެލެހެއްޓުމާއި، ލެބޯޓަރީއާ ހަވާލުކުރަންދެން އަމަލުކުރަންވީ ގޮތުގެ ފުރިހަމަ އިރުޝާދުތައް މި ގަވާއިދުގައި ހިމެނެއެވެ. ޓެސްޓުކުރުމަށް ހިނގާ ޚަރަދުތަކާއި ސާމްޕަލްތައް ގެންދިއުމުގެ އިންތިޒާމުތައް ހަމަޖައްސާނެ ގޮތްތައް ވެސް މި ގަވާއިދުގެ ޖަދުވަލުތަކުގައި ބަޔާންކޮށްފައިވެއެވެ.
މި ގަވާއިދަށް ޢަމަލުކުރަން ފަށާނީ ދިވެހި ސަރުކާރުގެ ގެޒެޓުގައި ޝާއިޢުކުރި ތާރީޚުން ފެށިގެންނެވެ. މި ގަވާއިދު ތަންފީޒުކުރުމުގެ މައިގަނޑު ޒިންމާ އުފުލާނީ ދިވެހި ފުލުހުންގެ ޚިދުމަތުންނެވެ. މި ގަވާއިދުގެ ސަބަބުން މަސްތުވާތަކެތީގެ މައްސަލަތައް ތަޙުޤީޤުކުރުމުގައި ލިބިފައިވާ ޤާނޫނީ ބާރުވެރިކަން އިތުރުވެ، އެ މަސައްކަތްތައް ކުރިއަށް ގެންދިއުމުގައި އިތުރު ހާމަކަން ބޮޑު ނިޒާމެއް ގާއިމުވެގެންދާނެ ކަމަށް ބެލެވެއެވެ.
