ހުސްވި ހަފުތާގެ ތެރޭގައި މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އަށް 1.7 ބިލިއަނަށް ވުރެ ގިނަ ރުފިޔާ ބަލައިގެންފިއެވެ.
މީރާއިން އާންމުކޮށްފައިވާ ”ވީކްލީ ރެވެނިއު ސީރީޒް“ ގައިވާ ގޮތުގައި، އާމްދަނީގެ ގޮތުގައި 150 މިލިއަނާއި 390 މިލިއަން ރުފިޔާ އާ ދެމެދުގެ އަދަދަކަށް ހަފުތާއެއްގައި ބަލައިގަތް ނަމަވެސް މިދިޔަ ހަފުތާގައި 1.7 ބިލިއަން ރުފިޔާ ބަލައިގެންފައިވެއެވެ. މިއީ ލިބުނު ބޮޑު ކުރިއެރުމެއް ކަމަށް މީރާއިން ވަނީ ބުނެފައެވެ.
މީރާއިން ބުނެފައިވާ ގޮތުގައި، މި ކުރިއެރުން ލިބުމުގެ މައިގަނޑު ސަބަބަކީ ބީޕީޓީގެ ސުންގަޑިއާއެކު ގިނަ ބަޔަކު ޓެކްސް ދެއްކުމާއި ޖީއެސްޓީ ދެއްކުމެވެ.
ހުސްވި ހަފުތާގައި އާމްދަނީ އެންމެ އިތުރުވި ދުވަހު 77.5 މިލިއަން ޑޮލަރު ލިބިފައިވެއެވެ. ޑޮލަރުގެ އާމްދަނީއަށް އައި މި ބަދަލަކީ ރާއްޖޭގެ ރިސޯޓުތަކާއި ފަތުރުވެރިކަމުގެ ސިނާއަތުން ގަވާއިދުން ޓީޖީއެސްޓީ އަދި ގްރީން ޓެކްސް ދެއްކުމެވެ. މިއީ ރާއްޖޭގެ ބޭރު ފައިސާގެ ރިޒާވް ހިފެހެއްޓުމަށާއި އިގްތިސާދީ ކުރިއެރުމަށް ލިބިގެންދާނެ ބޮޑު ކުރިއެރުމެކެވެ.
ޓޫރިޒަމް ސިނާއަތުން މިހާ ބޮޑު އާމްދަނީއެއް ލިބުނުއިރު، ޖެހިގެން އައި ހަފުތާއެއްގައި 74.1 މިލިއަން ޑޮލަރުގެ އާމްދަނީއެއް ލިބިފައިވާކަން ފާހަގަކޮށްލަންޖެހެއެވެ. ބައެއް ހަފުތާތަކުގައި 54.2 މިލިއަން ޑޮލަރު އަދި 48.1 މިލިއަން ޑޮލަރު ލިބުނު ނަމަވެސް، ޓޫރިޒަމް އޮފް-ސީޒަން ހަފުތާތަކުގައި ޑޮލަރުގެ އާމްދަނީ އުޅެނީ ގާތްގަނޑަކަށް 2.6 މިލިއަނާއި 16 މިލިއަން ޑޮލަރު އާ ދެމެދުގައިކަން ފާހަގަކޮށްލެވެއެވެ.
