މިއަހަރުގެ ބަރަކާތްތެރި ހައްޖުގެ މުގައްދަސް އަޅުކަން ފުރިހަމަކުރުމަށްފަހު، ދިވެހި ހައްޖުވެރިންގެ އެންމެ ފަހު ގްރޫޕް މިރޭ ރާއްޖެ އައުމަށް ސައުދީ އަރަބިއްޔާއިން ފުރައިފިއެވެ.
އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދު މީޑިއާތަކަށް މައުލޫމާތު ދެއްވަމުން ވިދާޅުވީ، ދިވެހި ހައްޖުވެރިންގެ ހަތަރުވަނަ ގްރޫޕް މިހާރު ރާއްޖެއަށް އައުމަށް ފުރާފައިވާ ކަމަށެވެ. މި ގްރޫޕް ރާއްޖެ އައުމާއެކު، މިއަހަރު ހައްޖުގެ އަޅުކަމަށް މައްކާއަށް ދިޔަ ހުރިހާ ދިވެހިން އެނބުރި ގައުމަށް އައިސް ނިމޭނެއެވެ.
ގައުމީ އެއާލައިން، މޯލްޑިވިއަންގެ ޚާއްސަ ފްލައިޓެއްގައި މި ހައްޖާޖީން ރާއްޖެ އައުމަށް ހަމަޖެހިފައިވަނީ މިރޭ ދަންވަރު 00:00 ހާއިރެވެ. މި ފްލައިޓުގައި ޖުމްލަ 262 ހައްޖާޖީން ދަތުރުކުރަމުންދާ ކަމަށް އިސްލާމީ ކަންތައްތަކާ ބެހޭ ވުޒާރާއިން މައުލޫމާތު ދެއެވެ.
ދިވެހި ހައްޖުވެރިން ރާއްޖެ އަންނަން ފަށާފައިވަނީ މިދިޔަ ހުކުރު ދުވަހުއެވެ. އެގޮތުން ހައްޖުވެރިން އެނބުރި އައި ތަރުތީބަށް ބަލާއިރު:
ފުރަތަމަ ފްލައިޓް: މިދިޔަ ހުކުރު ދުވަހު 240 އަށް ވުރެ ގިނަ ހައްޖާޖީން ވަނީ ރާއްޖެ އައިސްފައެވެ.
ދެވަނަ ފްލައިޓް: އާދީއްތަ ދުވަހު 262 ހައްޖުވެރިން ވަނީ ރާއްޖެ އައިސްފައެވެ.
ތިންވަނަ ފްލައިޓް: ރޭގެ ވަގުތެއްގައި 271 ހައްޖުވެރިން ވަނީ ރާއްޖެ އައިސްފައެވެ.
މިއަހަރު ރާއްޖެއިން ޖުމްލަ 1,019 މީހުން ހައްޖުގެ އަޅުކަމުގައި ބައިވެރިވިއިރު، މި ހުރިހާ ހައްޖުވެރިންވެސް ސައުދީ އަރަބިއްޔާއަށް ގޮސްފައިވަނީ ސަރުކާރުގެ ހައްޖު ކުންފުނި، މޯލްޑިވްސް ހައްޖު ކޯޕަރޭޝަންގެ ބެލުމުގެ ދަށުންނެވެ.
ސަރުކާރުން ވަނީ ހައްޖުވެރިންގެ ކަންކަން ވީހާވެސް ފަސޭހަކަމާއެކު ކުރިއަށް ގެންދިއުމަށް ޚާއްސަ އިސްކަމެއް ދެއްވާފައެވެ. އެގޮތުން ހައްޖުވެރިން އެނބުރި އަންނަ ވަގުތު އެއާޕޯޓުން މަރުހަބާ ދެންނެވުމާއި، ބޯޓުން ފޭބުމަށްފަހު މާލެއާއި ހުޅުމާލެއަށް ދިއުމުގެ އިންތިޒާމުތައްވެސް ވަނީ ވަރަށް ފުރިހަމައަށް ރޭވިފައެވެ.
