ކަނޑުމަގުން ރާއްޖެއަށް ގެންނަ މުދާ ވައިގެ މަގުން ދުނިޔޭގެ އެހެން މަންޒިލްތަކަށް ފޮނުވުމަށް ފަށާފައިވާ ”ސީ-ޓު-އެއަރ ކާގޯ“ ޚިދުމަތުގެ ދަށުން، ނިމިދިޔަ މޭ މަހު 162 ޓަނުގެ މުދާ ރާއްޖެއިން ބޭރަށް ފޮނުވާފައިވާ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ހާމަކޮށްފިއެވެ.
އެމްޕީއެލް އިން އާންމުކޮށްފައިވާ އެންމެ ފަހުގެ ތަފާސްހިސާބުތައް ދައްކާގޮތުން، 15 މޭ 2024 ގައި ރަސްމީކޮށް ފެށި މި ޚިދުމަތުގެ ދަށުން މިދިޔަ މަހުގެ ނިޔަލަށް ޖުމްލަ 29 ޓީއީޔޫސް (20 ފޫޓުގެ ކޮންޓެއިނަރު) ގެ މުދާ ވަނީ ރާއްޖެއިން ބޭރަށް ފޮނުވާފައެވެ. މި މުދާތައް ފޮނުވާފައިވަނީ ދުނިޔޭގެ މަގުބޫލު 5 އެއާލައިނެއް މެދުވެރިކޮށް ޖުމްލަ 7 ޤައުމަކަށެވެ.
މި ޚިދުމަތުގައި މިދިޔަ މަހު ބައިވެރިވި އެއާލައިންތަކަކީ:
- ޤަޠަރު އެއާވޭސް
- އިއްތިހާދު އެއާވޭސް
- ސައުދިއާ
- ސްވިޒް އެއާ
- ޓާކިޝް އެއާލައިން
ސީ-ޓު-އެއަރ ކާގޯގެ ޚިދުމަތަކީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އާއި އެމްޕީއެލް ގުޅިގެން ކުރިއަށްގެންދާ މުހިންމު މަޝްރޫޢެކެވެ. މީގެ މައިގަނޑު ބޭނުމަކީ ކަނޑުމަގުން އަންނަ މުދާ، ޓްރާންސިޓުކޮށް ވައިގެ މަގުން ދުނިޔޭގެ އެކި ކަންކޮޅުތަކަށް ފޮނުވައިދީ، ރާއްޖޭގެ އިޤްތިޞާދީ ހަރަކާތްތައް ފުޅާކުރުމެވެ.
📊 Monthly Statistics for Sea-to-Air Cargo Transshipment – May 2026#MaldivesPortsLimited #MPL #PortMV #SeaToAirCargo pic.twitter.com/974I5sz4E4
— Maldives Ports Limited (@Portmv) June 9, 2026
ސަރުކާރުން ހާމަކުރައްވާ ގޮތުގައި، ދުނިޔޭގެ ގިނަ ޤައުމުތަކެއްގައި ކާމިޔާބުކަމާއެކު ހިންގަމުންދާ މިފަދަ ޚިދުމަތެއް ރާއްޖޭގައި ފެށުމަކީ އިޤްތިޞާދަށް ބޮޑެތި މަންފާތަކެއް ލިބޭނެ ކަމެކެވެ. ރާއްޖެއަކީ ބައިނަލްއަޤްވާމީ ގިނަ އެއާލައިންތަކަކުން ދަތުރުކުރާ މަންޒިލަކަށް ވުމާއެކު، މި ޚިދުމަތް އިތުރަށް ފުޅާކުރުމަށް ރާއްޖެއަށް އޮތް ފުރުޞަތުތައް ވަރަށް ބޮޑުކަން ސަރުކާރުން ފާހަގަކުރައްވައެވެ.
މި ޚިދުމަތުގެ ސަބަބުން ރާއްޖެއަކީ ހަމައެކަނި މުދާ އެތެރެކުރާ ތަނެއްގެ އިތުރުން، ބައިނަލްއަޤްވާމީ ލޮޖިސްޓިކްސް ހަބަކަށް ވުމަށް ކުރާ މަސައްކަތަށް ބޮޑު ކުރިއެރުމެއް ލިބިގެންދާނެއެވެ.
