ހިމަބިހި ނުވަތަ މީސްލްސްގެ ނުރައްކާ އަދިވެސް ކުޑަ ނުވާ ކަމަށާއި، ބަލި ޖެހުނު މީހުންގެ އަދަދު 15 އަށް އަރާފައިވާ ކަމަށް ހެލްތް ޕްރޮޓެކްޝަންސް އޭޖެންސީ (އެޗްޕީއޭ) އިން ހާމަކޮށްފިއެވެ.
މިކަމާ ގުޅިގެން އެޗްޕީއޭއިން ބުނެފައިވަނީ، ހުސްވި ހަފުތާގެ ތެރޭގައި ވެސް ހިމަބިހީގެ ހަތަރު ކޭސް ފެނިފައިވާ ކަމަށެވެ. އެއާއިއެކު އަހަރުގެ މިހާތަނަށް ޖުމުލަ 15 މީހަކަށް މި ބަލި ޖެހިގެން ރިޕޯޓްކޮށްފައިވާ ކަމަށް އެ އެޖެންސީން ވަނީ ބުނެފައެވެ. ކަން މިހެން އޮތުމުން އެޗްޕީއޭއިން ވަނީ ބަލި ފެތުރުން ހުއްޓުވުމަށްޓަކައި ރައްކާތެރިކަމުގެ ފިޔަވަޅުތައް އަޅަން އެދިފައެވެ. އެގޮތުން އެޅޭނެ ބައެއް ފިޔަވަޅުތަކުގެ ތެރޭގައި:
- ބައްޔަށް ޝައްކުވެގެން ޓެސްޓް ހަދައިފިނަމަ، ޓެސްޓުގެ ނަތީޖާ ލިބެންދެން އެކަހެރިވެގެން ހުރުން.
- ހުން އައިސް ގައިގައި ރަތް ބިހި ނެގުން ނުވަތަ ރޯގާގެ އަލާމާތްތައް ފެންނަނަމަ، މީހުން އެއްވެ އުޅޭ ތަންތަނަށް ނުދިއުން.
- ހުން އައުމާއެކު ގައިގައި ރަތް ބިހިތަކެއް ނަގައިފިނަމަ، ލަސްނުކޮށް ޑޮކްޓަރަށް ދެއްކުން.
- މިފަދަ އަލާމާތްތައް ފެނިގެން ހޮސްޕިޓަލަށް އަންނައިރު، އެހެން މީހުންނަށް ބަލި ފެތުރުނަ ނުދިނުމަށްޓަކައި މާސްކު އެޅުން.
ވޭތުވެދިޔަ ހަފްތާގައި ހިމަބިހި (މީސްލްސް) ކޭސްތަކުގެ އަދާހަމަ #measles pic.twitter.com/ZPi6Qb8Axk
— Health Protection Agency (@HPA_MV) June 9, 2026
ހިމަބިހީގެ ކޭސްއެއް ފެނިއްޖެނަމަ، އާންމުކޮށް އަމަލުކުރާ އުސޫލުގެ މަތިން ބަލި ޖެހުނު ގޮތް ދެނެގަތުމަށް ކޭސް އިންވެސްޓިގޭޝަން ހެދުމާއި، ބަލިޖެހުނު މީހާއާ ދިމާވި މީހުން ދެނެގަތުމަށް ކޮންޓެކްޓް ޓްރޭސިން ހެދުމުގެ މަސައްކަތް އެޗްޕީއޭއިން ކުރަމުންދާ ކަމަށް އެ އެޖެންސީން ވަނީ ބުނެފައެވެ.
