މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން މަސްވެރިންގެ އަތުން މަސް ގަންނަ އަގު 20 ރުފިޔާއަށް ބޮޑުކޮށްފިއެވެ.
މިފްކޯއިން މަސްވެެރިންގެ އަތުން މިއަދު މަސް ގަންނަ އަގު 20 ރުފިޔާއަށް ބޮޑުކުރިއިރު، އިއްޔެއާއި އޭގެ ކުރީ ދުވަހު ވެސް މަސް ކިލޯއެއްގެ އަގު ހުރީ 18.50 ރުފިޔާގައެވެ.
މިފްކޯއިން ހާމަކުރި ގޮތުގައި، މި ބަދަލު ގެނައުމަށް ނިންމީ މި ދުވަސްވަރު ރާއްޖޭގެ މަސްވެރިކަން އިންތިހާއަށް ދަށްވަމުންދާތީ، މަސްވެރި އާއިލާތަކަށް ކުރިމަތިވެދާނެ މާލީ ދަތިތަކުން އަރައިގަތުމަށް އެހީތެރިވެދިނުމުގެ ގޮތުންނެވެ. މި އަގާއެކު މިފްކޯއިން މަސް ގަންނަ އަގު މިހާރު ވަނީ އަމިއްލަ ކުންފުނިތަކުން މަސް ގަންނަ އަގުތަކަށްވުރެ މަތިކޮށްފައެވެ.
މަސްވެރިން ބާނާ މަސް 16 ރުފިޔާއަށްވުރެ ދަށް ނުކޮށް މަހުގެ އަގު ހިފެހެއްޓުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވައުދުފުޅެކެވެ. އެހެންކަމުން އެމަނިކުފާނުގެ ވައުދުފުޅާ އެއްގޮތަށް މިފްކޯއިން ވަނީ މިހާތަނަށް އަމަލުކުރަމުން ގޮސްފައެވެ.
މިއީ މިފްކޯއިން މަސް ގަންނަ އަގު 16 އަށްވުރެ ބޮޑުކުރި ފުރަތަމަ ފަހަރު ނޫންކަން ފާހަގަކޮށްލަންޖެހެއެވެ. އެގޮތުން މާކެޓްގެ އަގަށް އަންނަ ބަދަލުތަކާ ގުޅިގެން މީގެ ކުރިން ވެސް އެކި ފަހަރުގެ މަތިން އެކި އަގުތަކުގައި މިފްކޯއިން މަސް ގަނެފައިވެއެވެ. މީގެ ކުރިން 17 ރުފިޔާއަށް އަދި 18.50 ރުފިޔާއަށް ވެސް މިފްކޯއިން މަސްވެރިންގެ އަތުން މަސް ގަނެފައިވެއެވެ.
ރާއްޖޭގެ ހުރިހާ ސަރަހައްދެއްގައި ވެސް މަސްވެރިކަން ދަށްވެފައިވާ މި ދަނޑިވަޅުގައި، މަސް ގަންނަ އަގު 20 ރުފިޔާއަށް ބޮޑުކުރުމަކީ މަސްވެރިންނަށް ލިބިގެންދާނެ ބޮޑު ހިތްވަރަކަށް ވެގެންދާނެއެވެ.
