މާލޭގެ މަގުމަތީގައި ނަން ބޯޑު ހަރުކުރުމަށް މާލެ ސިޓީ ކައުންސިލުން ހަތަރު މިލިއަނެއްހާ ރުފިޔާ ހަރަދުކޮށްފައިވަނީ އެއްވެސް ތަޖުރިބާއެއް ނެތް ކުންފުންޏަކަށް ކަން ’އެކި‘ އަށް އެނގިއްޖެއެވެ.
މައުލޫމާތު ހޯދާ ލިބިގަތުމުގެ ޙައްޤުގެ ދަށުން ’އެކި އެމްވީ‘ އިން ހުށަހެޅި އާރްޓީއައިގެ ޖަވާބު ނުދީ ގިނަ ދުވަސްތަކެއް ފަހުން، އައިކޮމްގެ އަޑުއެހުމެއް ތާވަލު ކުރެވިފައި ވަނިކޮށް މާލެ ސިޓީ ކައުންސިލުން މި މަޢުލޫމާތު ފޮނުވާފައިވާއިރު، އޭގައިވާ ގޮތުން، މާލެ ސިޓީގެ މަގުތަކުގައި ނަން ބޯޑު ހަރުކުރަން ހަވާލުކޮށްފައިވަނީ ”ސަސްމާ ޕްރައިވެޓް ލިމިޓެޑް“ ކިޔާ ކުންފުންޏަކާއެވެ.
އެ ކުންފުނި އިކޮނޮމިކް މިނިސްޓްރީގައި ރަޖިސްޓަރީކޮށްފައިވަނީ 3 ޖޫން 2024 ގައެވެ. އެ ކުންފުނީގެ ބޯޑު މެންބަރުންގެ ގޮތުގައި ތިން މީހެއް ހިމެނޭއިރު ޝެއާ ހޯލްޑަރުންގެ ގޮތުގައި ދެ މީހެއް ހިމެނެއެވެ. އެ ކުންފުނީގެ މެނޭޖިން ޑިރެކްޓަރަކީ މަރިޔަމް ނަދީމާއެވެ.
އެ ކުންފުނިން ކުރިއަށްގެންދިޔަ މާ ގިނަ މަޝްރޫއުތަކެއް ފެންނާކަށްވެސް ނެތެވެ. އެހެންކަމުން އެއީ ތަޖުރިބާގެ ގޮތުން ބެލިޔަސް އެންމެ ރަނގަޅު ކުންފުނިކަމަކަށް ނުބެލެވެއެވެ.
މާލެ ސިޓީގެ މަގުތަކުގައި ނަން ބޯޑު ހަރުކުރުމުގެ މަސައްކަތުގެ ކޮންޓްރެކްޓު އަގަކީ، 398،8290.96 އެވެ.
ނަމަވެސް އެޑްވާންސް ފައިސާގެ ގޮތުގައި 598،243.64 ރުފިޔާ ދީފައިވެއެވެ. އަދި މަސައްކަތް އަދިވެސް ނުނިމުނަސް އޭގެ ފަހުންވެސް އެ ކުންފުންޏަށް 589،243.64 ރުފިޔާ ދޫކޮށްފައިވެއެވެ.
މާލެ ސިޓީ ކައުންސިލުން ނަން ބޯޑުތަކުގައި މަގުތަކުގެ ނަންތައް ލިޔެފައިހުރީ ނުބައިކޮށް ކަމުން ބޮޑެތި ފާޑުކިޔުންތަކެއް އަމާޒުވިއެވެ. ފަހުން މާލެ ސިޓީ ކައުންސިލުން ވަނީ އެ ނަން ބޯޑުތައް ބަދަލުކުރުމުގެ މަސައްކަތް ފަށާފައެވެ.
ކައުންސިލުން ދިގު ދެންމުމަށްފަހު މަޢުލޫމާތު ހިއްސާ ކޮށްފައިވާއިރު ’އެކި އެމްވީ‘ އިން ހުށަހެޅި 3 އާރުޓީއައިގެ ތެރެއިން 2 އާރުޓީއަށް މިވަނީ ޖަވާބު ދެއްވާފައެވެ. ކައުންސިލުން އަދި ޖަވާބު ދީފައި ނުވަނީ 23 ޖެނުއަރީ 2024 އިން ފެށިގެން 9 އޭޕްރީލް 2026 ގެ ނިޔަލަށް މާލޭސިޓީ ކައުންސިލްގެ އެކި މަސައްކަތްތަކަށް ނެގިފައިވާ ކޮންސަލްޓަންޓުންގެ އަދަދާއި، އަދި އެކަމަށް ހޭދަކުރި، ހޭދަވާ ޚަރަދު، ހުރިހާ ކޮންސަލްޓަންޓުންގެ ވަނަވަރާއި މުސާރަ އާއި އިނާޔަތްތަކުގެ ތަފްސީލީ މަޢުލޫމާތަށް އެދި ’އެކި އެމްވީ‘ އިން ހުށަހެޅި އާރުޓީއައި އަށެވެ.
