ދިވެހިރާއްޖެ އާއި ތުރުކީއާ ދެމެދު ވެފައިވާ ވިޔަފާރީގެ އެއްބަސްވުންތައް ތަންފީޒުކުރުމާ ގުޅޭގޮތުން ފިޝަރީޒް މިނިސްޓަރު އަޙްމަދު ޝިޔާމާއި ތުރުކީގެ އެގްރިކަލްޗަރ އެންޑް ފޮރެސްޓްރީ މިނިސްޓަރު އިބްރާހީމް ޔުމަކްލީ މަޝްވަރާ ކުރައްވައިފިއެވެ.
ވިޔަފާރީގެ އެއްބަސްވުންތައް ތަންފީޒުކުރުމާ ގުޅޭގޮތުން މި ދެ ބޭފުޅުން މަޝްވަރާ ކުރެއްވީ، މިނިސްޓަރު ޝިޔާމް ތުރުކީގެ އެގްރިކަލްޗަރ އެންޑް ފޮރެސްޓްރީ މިނިސްޓަރު އިބްރާހީމް ޔުމަކްލީގެ އަރިހަށް ކުރެއްވި އިހްތިރާމްގެ ޒިޔާރަތުގެ ތެރެއިންނެވެ. މި ބައްދަލުކުރެއްވުމުގައި، ތުރުކީ ސަރުކާރުން ރާއްޖެއަށް ވެދެއްވަމުން ގެންދަވާ އެހީތެރިކަމާއި އެއްބާރުލެއްވުމަށްޓަކައި ތުރުކީ ސަރުކާރަށް މިނިސްޓަރު ވަނީ ޝުކުރު އަދާކުރައްވައިފައެވެ.
Minister @Shiyamaldives , paid a courtesy call to Türkiye’s Minister of Agriculture and Forestry H.E İbrahim Yumaklı to discuss strengthening cooperation between the Maldives and Türkiye in the fields of agriculture and fisheries. During the meeting, Minister conveyed his sincere… pic.twitter.com/aIl33Gk7I3
— Min of Fisheries, Agriculture and Ocean Resources (@MFAORmv) June 7, 2026
މި ބައްދަލުކުރެއްވުމުގައި ދެ ގައުމުގެ ދެމެދުގައި ސޮއިކުރެވުނު މެމޮރެންޑަމް އޮފް އަންޑަސްޓޭންޑިންގ (އެމްއޯޔޫ) އަދި ޕްރިފަރެންޝަލް ޓްރޭޑް އެގްރީމަންޓް (ޕީޓީއޭ) ގައި ބަޔާންކޮށްފައިވާ ދަނޑުވެރިކަމާއި މަސްވެރިކަމާ ގުޅުންހުރި މަސައްކަތްތައް އިތުރަށް ހަރުދަނާކުރުމުގެ މުހިންމުކަމާ ބެހޭގޮތުން ދެ ބޭފުޅުން މަޝްވަރާ ކުރެއްވިއެވެ. މީގެ އިތުރުން މި އެއްބަސްވުމުގެ ދަށުން ދެ ގައުމަށް ފައިދާ ކުރާނެ ހަރުދަނާ ފިޔަވަޅުތަކަކަށް ބަދަލުކުރުމުގެ މުހިންމުކަން ވެސް ދެ ބޭފުޅުން ފާހަގަކުރެއްވިއެވެ.
މި ބައްދަލުކުރެއްވުން ނިންމަވާލައްވަމުން ދެމެހެއްޓެނިވި ތަރައްގީއާއި، ކާބޯތަކެތީގެ ރައްކާތެރިކަމާއި، ދަނޑުވެރިކަމާއި މަސްވެރިކަމުގެ ދާއިރާ ކުރިއެރުވުމަށް ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިކުރުމަށް ދެ ގައުމުން ދެއްވާ އަހައްމިއްޔަތު ފާހަގަކުރައްވާފައިވެއެވެ.
