ކާބޯތަކެތީގެ ރައްކާތެރިކަން މިހާރަށްވުރެ ބޮޑަށް ހަރުދަނާކުރުމަށް އެންމެން އެކުގައި ގުޅިގެން މަސައްކަތް ކުރަންޖެހޭ ކަމަށް ފިޝަރީޒް އެންޑް އެގްރިކަލްޗަރ މިނިސްޓަރު އަޙްމަދު ޝިޔާމް ވިދާޅުވެއްޖެއެވެ.
މިނިސްޓަރު ޝިޔާމް މި މޭރުމުން ވިދާޅުވީ، ތުރުކީގެ އިސްތަންބޫލުގައި ބޭއްވި ދަނޑުވެރިކަމާ ބެހޭ މަތީ ފަންތީގެ މިނިސްޓީރިއަލް ޕެނަލްގައި ވާހަކަދައްކަވަމުންނެވެ. މި ޕެނަލްގައި ވާހަކަދައްކަވަމުން މިނިސްޓަރު ވަނީ ދަނޑުވެރިކަމާއި މަސްވެރިކަމުގެ ސިނާއަތަށް ލިބޭ ގެއްލުންތައް ކުޑަކުރުމަށް ރާއްޖެއިން ކުރަމުންދާ މަސައްކަތްތަކުގެ މައްޗަށް އަލިއަޅުއްވާލައްވައިފައެވެ. މީގެ އިތުރުން، އުފެއްދުންތެރިކަމުގެ މަރުހަލާތަކުގެ ހަރުދަނާކަން އިތުރުކުރުމަށާއި، ކާބޯތަކެތީގެ ރައްކާތެރިކަން ހަރުދަނާކުރުމުގެ އިތުރުން ދަނޑުވެރިކަމާއި މަސްވެރިކަމުގެ އުފެއްދުންތެރިކަމުގެ ނިޒާމު ދެމެހެއްޓެނިވި ގޮތެއްގައި ކުރިއެރުވުމަށް ކުރެވިދާނެ މަސައްކަތްތަކުގެ މައްޗަށް ވެސް މިނިސްޓަރު އަލިއަޅުއްވާލެއްވިއެވެ.
Minister @Shiyamaldives , participated in the High-Level Ministerial Panel on Agriculture: Reducing Post-Harvest Losses – Enhancing Efficiency in the Food Supply Chain, held in Istanbul, Türkiye.
During the panel, Minister delivered a statement highlighting the Maldives’ ongoing… pic.twitter.com/vT1fWHYXIM
— Min of Fisheries, Agriculture and Ocean Resources (@MFAORmv) June 7, 2026
މިނިސްޓަރުގެ ވާހަކަފުޅުގައި، ރާއްޖެ ފަދަ ކުދި ޖަޒީރާ ގައުމުތަކަށް ކުރިމަތިވާ ތަފާތު ގޮންޖެހުންތަކަށް ވެސް އަލިއަޅުއްވާލެއްވިއެވެ. އެގޮތުން ޖިއޮގްރަފިކަލީ ރާއްޖެ އުފެދިފައިވާ ގޮތުން ދިމާވާ ދަތިތަކާއި، އިގްތިސާދީ ގޮތުން ހުރި ހުރަސްތަކާއި، ދަތުރުފަތުރުގެ ދަތިކަމުގެ އިތުރުން މޫސުމަށް އަންނަ ބަދަލުތަކުގެ ސަބަބުން ހަރުދަނާ ކާބޯތަކެތީގެ ނިޒާމެއް ބިނާކުރުމަށް ހުރި ހުރަސްތައް މިނިސްޓަރު ވަނީ ފާހަގަކުރައްވައިފައެވެ.
މިނިސްޓަރު ޝިޔާމް ވިދާޅުވީ ދަނޑުވެރިކަން މަދުވުމުން ލިބޭ ގެއްލުން ކުޑަކުރުމަށް ސަރުކާރުތަކާއި، އަމިއްލަ ފަރާތްތަކާއި، ރިސާޗް އަދި އެކަޑަމިކް އިންސްޓިޓިއުޓްތަކާއި، ތަރައްގީގެ ބައިވެރިންނާއި، ދަނޑުވެރިންނާއި މަސްވެރިންގެ މެދުގައި ހަރުދަނާ އަދި ދެމެހެއްޓެނިވި ގުޅުމެއް އޮންނަންޖެހޭ ކަމަށެވެ. އަދި ކާބޯތަކެތީގެ ރައްކާތެރިކަން އިތުރުކޮށް، ކުނި މަދުކުރުމަށާއި، ދިގު މުއްދަތުގެ އިގްތިސާދީ ތަރައްގީއަށް އެހީތެރިވެދޭ، ހަރުދަނާ ދެމެހެއްޓެނިވި ކާބޯތަކެތީގެ ނިޒާމު ހަރުދަނާ ކުރުމަށް އެންމެންގެ އެއްބާރުލުމާއި އެހީތެރިކަން ބޭނުންވާކަން މިނިސްޓަރު ފާހަގަކުރެއްވިއެވެ.
މި ބައްދަލުކުރެއްވުމުގައި މިނިސްޓަރު ޝިޔާމް ވަނީ ދެމެހެއްޓެނިވި ކާބޯތަކެތީގެ ސަޕްލައި ޗެއިންތައް ބިނާކުރުމަށް ބައިނަލްއަގްވާމީ މައިދާނުގައި ކުރެވޭ މަސައްކަތްތަކަށް ރާއްޖެއިން އެއްބާރުލުން ދޭނެކަމުގެ ޔަންގީކަން ދެއްވައިފައެވެ.
