އަނިޔާވެރި ޔަހޫދީ އިސްތިއުމާރު ވެރިކަމުން ލުބުނާނުގެ ވެރިރަށް ބެއިރޫތަށް މިއަދު ދިން ވަރުގަދަ ވައިގެ ޙަމަލާތަކާ ގުޅިގެން، އީރާނުން މިރޭ އިޒްރޭލަށް ”ވޭންދެނިވި އަދި ނުރައްކާތެރި“ ރައްދު ޙަމަލާތަކެއް ދޭނެ ކަމުގެ އިންޒާރު ދީފިއެވެ. މިއާއެކު މެދުއިރުމަތީގެ ހަނގުރާމަ މުޅިން އައު، ނުރައްކާތެރި މަރުޙަލާއަކަށް ވަނީ ވެއްޓިފައެވެ.
އިޒްރޭލުގެ އަސްކަރިއްޔާއިން ވަނީ ބެއިރޫތުގެ ދެކުނުގައި އޮންނަ، ޙިޒްބުﷲ ޖަމާޢަތުގެ ބާރުގެ ދަށުގައިވާ ދާހިޔާ ސަރަޙައްދަށް އަމާޒުކޮށް ބޮންއަޅާފައެވެ۔ ލުބުނާނުގެ ރަސްމީ ޚަބަރު ފަތުރާ އިދާރާއިން ބުނާގޮތުގައި، މި ޙަމަލާގައި މަދުވެގެން ދެ މީހުން މަރުވެ، 11 މީހުން ވަނީ ޒަޚަމްވެފައެވެ۔ އީރާނުން މީގެކުރިން ވަނީ ބެއިރޫތަށް ޙަމަލާދީފިނަމަ ބޮޑު ހަނގުރާމައެއް ފަށާނެ ކަމުގެ އިންޒާރު ދީފައެވެ.
އީރާނުގެ ޤާނޫނުހަދާ މަޖިލީހުގެ ޤައުމީ ސަލާމަތާބެހޭ ކޮމިޓީގެ ތަރުޖަމާނު އިބްރާހީމް ރިޒާއީ ވަނީ، މިރޭ އިޒްރޭލަށް ވަރުގަދަ ބެލިސްޓިކް މިސައިލް ޙަމަލާތަކެއް އަންނާނެ ކަމުގެ ސީދާ އިޝާރާތެއް ކޮށްފައެވެ. އޭނާ ސޯޝަލް މީޑިއާ އެކްސް (X) ގައި ލިޔެފައިވަނީ، ”މިރޭ ހިފާފައިވާ ބިންތަކުގެ އުޑުމައްޗަށް ބަލަން ތިބުމަށެވެ.“
ބެއިރޫތަށް ދިން މި ޙަމަލާއާއެކު، ހޯރްމުޒް ކަނޑުއޮޅީގެ މައްސަލައިގައި އެމެރިކާއާއި އީރާނާ ދެމެދު ކުރިއަށްދާ ސިއްރު ސުލްޙައިގެ މަޝްވަރާތައް އެއްކޮށް ހުއްޓުމަކަށް އައުމުގެ ފުރުޞަތު ވަނީ ބޮޑުވެފައެވެ.
ބެއިރޫތަށް ދިން މި ޙަމަލާއާއެކު، އީރާނުގެ ޕާލިމަންޓްގެ ރައީސް މުޙައްމަދު ބާގިރު ގާލިބާފް ވަނީ އެމެރިކާއާއެކު ކުރިއަށްދާ ހުރިހާ ސިއްރު ސުލްޙައިގެ މަޝްވަރާތަކެއް ހުއްޓާލައި، ދުޝްމަނާ ސީދާ ކުރިމަތިލުމަކަށް ދާނެކަން އިޢުލާންކުރައްވާފައެވެ. މިއާއެކު، ހޯރްމުޒް ކަނޑުއޮޅީގެ މައްސަލައިގައި ކުރެވޭ އުއްމީދުތައް ވަނީ ފުނޑުފުނޑުވެފައެވެ.
