ރައީސުލްޖުމްހޫރިއްޔާގެ އޮފީހާއި، ސަރުކާރުގެ ހުރިހާ ވުޒާރާތަކުން އިސްނަގައިގެން މަޢުލޫމާތު ހާމަކުރުމުގެ ޤާނޫނީ އިލްތިޒާމްތައް ސައްތައަކުން ސައްތަ ފުރިހަމަކޮށްފިކަމަށް އިންފޮމޭޝަން ކޮމިޝަނަރު އާހިދު ރަޝީދު ވިދާޅުވެއްޖެއެވެ.
އިންފޮމޭޝަން ކޮމިޝަނަރުގެ އޮފީހުން ހާމަކުރެއްވި އެންމެ ފަހުގެ ތަފުސީލުތަކަށް ބަލާއިރު، ރައީސުލްޖުމްހޫރިއްޔާގެ އޮފީހުގެ އިތުރުން ސަރުކާރުގެ 16 ވުޒާރާއަކުންވެސް މިހާރު ވަނީ މަޢުލޫމާތު ހާމަކުރުމާ ގުޅޭ ޤާނޫނީ މިންގަނޑުތަކަށް ފުރިހަމައަށް އަމަލުކުރަން ފަށާފައެވެ. މިއީ މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނުގެ ދަށުން ދައުލަތުގެ އިދާރާތަކުން އިސްނަގައިގެން ހާމަކުރަންޖެހޭ މަޢުލޫމާތުތައް އާންމުކުރުމަށް އެޅުނު މުހިންމު ފިޔަވަޅެކެވެ.
Acknowledgement goes to every team that did the work.
Compliance is not glamorous work. It is the necessary work. And reaching the threshold is the begining, not the conclusion. #RTImv pic.twitter.com/mJUl7JRENm— ahid rasheed (@aahidrasheed) June 7, 2026
މިކަމާ ގުޅޭގޮތުން އިންފޮމޭޝަން ކޮމިޝަނަރު އާހިދު ރަޝީދު ފާހަގަކުރެއްވި ގޮތުގައި، ޤާނޫނީ އިލްތިޒާމްތައް ފުރިހަމަކުރުމަކީ (Compliance) އޭގެ ޒާތުގައި މާބޮޑު ދެއްކުންތެރިކަމެއް ނުވަތަ ތައުރީފެއް އޮތް ކަމެއް ނޫން ކަމަށާއި، އޭގެ ބަދަލުގައި އެއީ ކޮންމެ އިދާރާއަކުންވެސް ކޮންމެހެން އަދާކުރަންޖެހޭ، ޤާނޫނީ ގޮތުން މަޖުބޫރު ކަމެއްކަން އޭނާ ފާހަގަކުރެއްވިއެވެ.
”ކަނޑައެޅިފައިވާ މިންގަނޑަށް ވާޞިލުވުމަކީ ހަމައެކަނި ފެށުން. އެއީ މަސައްކަތުގެ ނިމުމެއް ނޫން،“ ކޮމިޝަނަރު ވިދާޅުވިއެވެ.
އާހިދު އިތުރަށް ވިދާޅުވީ، ސަރުކާރުގެ އިދާރާތަކުން ޤާނޫނީ މިންގަނޑަށް ފެތުމަކީ ހާމަކަން ބޮޑު ނިޒާމެއް ބިނާކުރުމަށް އެޅޭ ބިންގާ ކަމަށާއި، މި މަސައްކަތް މެދުނުކެނޑި ދެމެހެއްޓެނިވި ގޮތެއްގައި ކުރިއަށް ގެންދިއުމަކީ މުހިންމު ކަމެއް ކަމަށެވެ.
މި ސަރުކާރުން މަޢުލޫމާތު ހާމަކުރުމަށް ދޭ އަހައްމިއްޔަތުކަން ފާހަގަކުރަމުން، އިންފޮމޭޝަން ކޮމިޝަނަރު ވަނީ ހުރިހާ މުއައްސަސާތަކުންވެސް ޤާނޫނަށް ބޯލަނބައި، ރައްޔިތުންނަށް އެނގެންޖެހޭ މަޢުލޫމާތުތައް ފަސޭހަކަމާއެކު ލިބޭނެ އިންތިޒާމުތައް ހަރުދަނާކުރުމަށް އިލްތިމާސްކުރައްވާފައެވެ.
