އިމާރާތްކުރުމުގެ ގާނޫނުގެ ދަށުން އެކުލަވާލައިފައިވާ ގަވައިދުތަކަށް އަހުލުވެރިކުރުވުމުގެ ޕްރޮގްރާމްތަކެއް ހަ އަތޮޅެއްގައި ކުރިއަށްގެންދަން ހައުސިން މިނިސްޓްރީން ނިންމައިފިއެވެ.
ހައުސިން މިނިސްޓްރީން މިއަދު ކުރި އިއުލާނެއްގައި ބުނީ އެ ޕްރޮގްރާމްތައް ކުރިއަށްގެންދާނީ ކ، ވ، އދ، އއ ،ޅ އަދި ބ އަތޮޅުގެ ރަށު ކައުންސިލްތަކަށް އަމާޒުކޮށްގެން މިއަދުން ފެށިގެން މި މަހުގެ 11ގެ ނިޔަލަށް ކަމަށެވެ.
މިނިސްޓްރީން ބުނީ ޕްރޮގްރާމްގެ މައިގަނޑު މަގުސަދަކީ އިމާރާތްކުރުމުގެ ގާނޫނާއި ގަވައިދުތަކަށް ރަށު ކައުންސިލްތަކުގައި މަސައްކަތްކުރާ މުވައްޒަފުން އަހުލުވެރިކުރުވުން ކަމަށެވެ.
މި ޕްރޮގްރާމްގެ ސެޝަންތަކުގައި އިމާރާތްކުރުމުގެ ހުއްދަ ނެގުމާއި ކުރެހުންތައް ފާސްކުރުމާއި ޕްރޮޖެކްޓްތަކަށް ލައިސަންސް ދިނުމާއި އިމާރާތްކުރުމަށް ބޭނުންވާ ތަކެތި އެެތެރެކުރުމާއި އުފެއްދުން ކޮންޓްރޯލްކުމުގެ ގަވައިދާއި ސައިޓުތަކުގެ ސަލާމަތީ ކަންކަން ބެލެހެއްޓުމުގެ އިތުރުން ޕްލޭނިން ގަވައިދެއް ނެތް ރަށްރަށް ނުވަތަ ފަޅުފަޅުގައި އިމާރާތްކުރަންވީ ގޮތުގެ ގަވައިދުގެ މައުލޫމާތު ދޭނެ ކަމަށް މިނިސްޓްރީން ބުންޏެވެ.
މީގެ އިތުރުން ކުރެހުން ފާސްކުރުމާއި ހުއްދަތައް ދޫކުރާނެ ގޮތާއި ގަވައިދާ ހިލާފުވާ ފަރާތްތަކާމެދު އަމަލުކުރާނެ އުސޫލުތަކާއި ކޮންޓްރެކްޓަރުންގެ ޒިންމާތަކާ ގުޅޭ ތަފްސީލީ މައުލޫމާތުތައްވެސް ދޭނެ ކަމަށް ބުންޏެވެ.
