ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގެ ޗެއާޕާސަންގެ މަގާމަށް ވާދަކުރައްވާ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް، އެ ޕާޓީގެ އާންމު މެންބަރުންނާ މުހިންމު ސުވާލުތަކެއް ކުރިމަތިކުރައްވައިފިއެވެ.
ކެމްޕޭން ދަތުރުފުޅުތަކުގެ ތެރެއިން ބޭއްވި ބައްދަލުވުމެއްގައި ވާހަކަދައްކަވަމުން މީކާއިލް ވިދާޅުވީ، އެމްޑީޕީގެ ބައި ލައްކައެއްހާ މެންބަރުން މަގުމަތިކުރުވި ބަޔަކާ ޕާޓީގެ ހުންގާނު ހަވާލުކުރަން މެންބަރުން ތިބީ ތައްޔާރަށްތޯ އޭނާގެ ހިތަށް އަރާ ކަމަށެވެ. މީކާއިލް މިހެން ވިދާޅުވީ ޕާޓީގެ އެތެރޭގެ އިންތިޚާބުގެ ފޯރި ގަދަވެފައިވާ ދަނޑިވަޅެއްގައެވެ.
މީކާއިލް ވިދާޅުވީ، އަތޮޅުތެރެއަށް ކުރައްވަމުންދާ ދަތުރުތަކުން ބައްދަލުވާ އާންމު މެންބަރުންގެ ޝުޢޫރުތަކުން، އިދިކޮޅު ފަރާތްތަކުން އެ ބުނާ ބޮޑު ބަދަލަށް މެންބަރުން ތައްޔާރު ނޫންކަން ވަރަށް ސާފުކޮށް އެނގިވަޑައިގަންނަވާ ކަމަށެވެ. އަދި މި އިންތިޚާބު ތަނަވަސް އަޣުލަބިއްޔަތަކުން ކާމިޔާބު ކުރައްވާނެ ކަމުގެ ފުރިހަމަ ޔަގީންކަން ވެސް އޭނާ ދެއްވިއެވެ.
”އަޅުގަނޑު ހަމަ ހިތައް އަރަނީ އެމްޑީޕީގެ ބައި ލައްކައެއްހާ މެންބަރުން މަގުމަތި ކުރުވި ބަޔަކާ މި ޕާޓީގެ ހުންގާނު ހަވާލުކުރަން ތިބޭފުޅުން ހަމަ ތައްޔާރުތޯ؟ އަޅުގަނޑަށް ހަމަ ޔަގީން އަޅުގަނޑުމެން މިކުރާ ދަތުރުތަކުން އަޅުގަނޑުމެންނާ ބައްދަލުވަމުންދާ އާންމު މެންބަރުންގެ ވާހަކަތަކުން އެ ބޭފުޅުން އެ ވިދާޅުވާ ބޮޑު ބަދަލަށް ތައްޔާރު ނޫންކަން. އިރާދަކުރެއްވިއްޔާ އަޅުގަނޑުމެން މި އިންތިޚާބު ތަނަވަސް އަގުލަބިއްޔަތަކުން ކާމިޔާބުކުރާނަން،“ މީކާއިލް ވިދާޅުވިއެވެ.
މީކާއިލް އިތުރަށް ވިދާޅުވީ، އޭނާގެ އަމާޒަކީ އަތޮޅުތަކުގައި ވަޅުޖެހިފައިވާ ޕާޓީގެ ހަރަކާތްތައް އާ ހިތްވަރަކާއެކު އަލުން ފައްޓަވައިދެއްވުން ކަމަށެވެ. އަދި މެންބަރުން އެދޭ ގޮތަށް ޕާޓީގެ ހަރަކާތްތައް މުޅި ރާއްޖޭގައި ވަރުގަދަކުރައްވާނެ ކަމުގެ ވައުދުވެސް އޭނާ ވެވަޑައިގަތެވެ.
އެމްޑީޕީގެ އެތެރޭގެ އިންތިޚާބުގެ ފޯރި ގަދަވެފައިވާއިރު، މި އިންތިޚާބަކީ ކުރިއަށް އޮތް ތަނުގައި އެޕާޓީގެ މިސްރާބު ކަނޑައެޅުމުގައި މުހިންމު ދައުރެއް އަދާކުރާނެ އިންތިޚާބެއް ކަމަށް ގިނަ ބަޔަކު ދެކެއެވެ.
