ކުރިއަށް އޮތް 2028 ވަނަ އަހަރުގެ ރިޔާސީ އިންތިހާބުގައި މުޅި އައްޑޫ ސިޓީ ވެގެންދާނީ ވެރިކަން ކުރާ ޕާޓީ ޕީއެންސީގެ ކިއްލާއަކަށް ކަމަށް، ރައްޔިތުންގެ މަޖިލިހުގެ އިނގުރައިދޫ ދާއިރާގެ މެންބަރު އިބްރާހިމް ފަލާޙު ވިދާޅުވެއްޖެއެވެ.
އިއްޔެ ބޭއްވި ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަނަށް އިޝާރަތް ކުރައްވައި މީސް މީޑިއާގައި ހިއްސާކުރެއްވި ޕޯސްޓެއްގައި ފަލާޙު ވިދާޅުވީ، ހިތަދޫ އުތުރު ދާއިރާއަކީ އެމްޑީޕީގެ ކިއްލާއެއް ކަމަށް އެބައިމީހުން ކުރަމުން އައި ދައުވާ ބައި-އިލެކްޝަނާ އެކުގައި ނިމިގެން ގޮސްފައިވާ ކަމަށެވެ.
ހިތަދޫ އުތުރު ދާއިރާއަކީ އެމްޑީޕީގެ ކިއްލާއެއް ކަމަށް ކުރާ ދަޢުވާ މިއަދު ބޭއްވުނު ބައި އިލެކްޝަނާ އެކު ނިމިއްޖެ.އެމްޑީޕީގެ ރިޔާސީ ހުރިހާ ކެންޑިޑޭޓުން، އިބޫ، އަންނި، ފައްޔާޒު، ޝާހިދު، އާޒިމް އަދި އަދި މުޅި އުމުރުގައި އެދާއިރާގެ މެންބަރުކަންކުރި އަސްލަމާއި ދެންވެސް އެމްޑީޕީގެ… pic.twitter.com/8wMMaYqTeR
— Ibrahim Falah (@IbrahimFalahR) June 6, 2026
އެމްޑީޕީގެ ހުރިހާ ރިޔާސީ ކެންޑިޑޭޓުން ކަމަށްވާ ކުރީގެ ރައީސް އިބްރާހިމް މުޙައްމަދު ޞާލިޙާއި ކުރީގެ ރައީސް މުޙައްމަދު ނަޝީދާއި މާލެ ސިޓީގެ މޭޔަރު އާދަމް އާޒިމާއި އެމްޑީޕީގެ ރައީސް ޢަބްދުﷲ ޝާހިދާއި އެމްޑީޕީގެ ކުރީގެ ޗެއަރޕާސަން ފައްޔާޒް އިސްމާޢިލާއި ހިތަދޫ އުތުރު ދާއިރާގެ މެމްބަރުކަން ”މުޅި އުމުރުގައި ކުރެއްވި“ މުޙައްމަދު އަސްލަމާއި އެމްޑީޕީއާ އެކު ކުރާނެ މަސައްކަތެއް ނޯންނާނެ ކަމަށް ވިދާޅުވި، ކުރީގެ ރައީސް ޢަބްދުﷲ ޔާމީން ތާއީދުކޮށްގެން ވެސް އިންތިހާބުގައި އައްޑޫ ސިޓީ ހިތަދޫގައި ބެހެއްޓި ވޯޓް ފޮށިތަކުން އެ ދާއިރާގެ ރައްޔިތުން، އެމްޑީޕީގެ ފަރާތުން ވާދަކުރެއްވި ކެންޑިޑޭޓް ޢަބްދުﷲ ޞާދިޤު ލަދުވެތި ގޮތަކަށް ބަލިކޮށްފައިވާ ކަމަށް ފަލާޙު ވަނީ ވިދާޅުވެފައެވެ.
”އައްޑޫގައި ދިރިއުޅޭ، ރައްޔިތުން ބުނާ ކަހަލަ އެމްޑީޕީގެ ލީޑަރޝިޕް ވަނީ ފެއިލްވެފައޭ. އައްޑޫ އާމެދު އިހުމާލުވެފައޭ! ޔާމީނަކަށް އައްޑޫއިން ޖާގައެއް ނެތޭ! ކަލޭމެން ދެން އައްޑޫއަށް ނާރައްޗޭ!“ – ފަލާޙު ލިޔުއްވާފައިވެއެވެ.
ފަލާހް އިތުރަށް ވިދާޅުވީ، އިއްޔެ ބޭއްވި އިންތިހާބުގައި ބެހެއްޓުނު ހަތް ވޯޓު ފޮށީގެ ތެރެއިން ހަތަރު ވޯޓު ފޮށިން ޕީއެންސީގެ ކެންޑިޑޭޓު ކުރި ހޯދުމަކީ އައްޑޫ ސިޓީގެ ރައްޔިތުންގެ މެދުގައި ޕީއެންސީގެ މަގުބޫލުކަމާއި ރައީސް މުޢިއްޒަށް އޮތް އިތުބާރާއި ލޯބި އޮތް ހާމަވާ ކަމެއް ކަމަށެވެ.
މި އިންތިހާބުގައި ޕީއެންސީގެ ކެންޑިޑޭޓް އަޙުމަދު ސަޢީދު (ސޮޑާ) ގެ މައްޗަށް ސޯބެ ކާމިޔާބު ހޯއްދެވި ނަމަވެސް، ހިތަދޫގައި ބެހެއްޓުނު ވޯޓު ފޮށިތަކުން ޕީއެންސީން ގިނަ ވޯޓު ހޯދި ކަމަށް އިލެކްޝަންސް ކޮމިޝަންގެ ވަގުތީ ނަތީޖާ އިން ދައްކައެވެ. އެގޮތުން ސޯބެއަށް މި އިންތިހާބުގައި ލިބިވަޑައިގަތީ 1،375 ވޯޓެވެ. އަދި ސޮޑާއަށް ލިބިވަޑައިގަތީ 1،313 ވޯޓެވެ. ދެ ބޭފުޅުންގެ ދެމެދުގައި 62 ވޯޓުގެ ފަރަގެއް ހުއްޓެވެ.
