ގޭގައި ކޯލް ސެންޓަރު ހަދައިގެންނާއި ދޮރުންދޮރަށް ހިނގައިގެން ވެސް ހިތަދޫ އުތުރު ދާއިރާގެ ބައި-އިލެކްޝަންގައި ކުރީގެ ތިން ރައީސުންނަށް ލިބުނީ ބޮޑު ނާކާމިޔާބީއެއް ކަމަށް ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އަދި ޕީއެންސީގެ ނައިބު ރައީސް އިބްރާހިމް ޝުޖާއު ވިދާޅުވެއްޖެއެވެ.
މީސް މީޑިއާގައި ހިއްސާކުރެއްވި ޕޯސްޓެއްގައި ޝުޖާއު ވިދާޅުވީ، ރައީސް މުޢިއްޒާއި ޕީއެންސީއާ ދެކޮޅަށް ނުކުމެ ކުރީގެ ތިން ރައީސުން އެއްބައިވެގެން ހިތަދޫ އުތުރު ދާއިރާގެ ބައި އިލެކްޝަން ކާމިޔާބު ކުރެވުނީ އެންމެ 62 ވޯޓުން ކަމަށެވެ. މި ނަތީޖާއިން އެ ތިން ބޭފުޅުންނަށް ވެސް ޝޮކެއް ލިބިފައިވާ ކަމަށް ޝުޖާއު ވަނީ ވިދާޅުވެފައެވެ.
ޝުޖާއު އެ ވިދާޅުވާ ކުރީގެ ތިން ރައީސުންނަކީ ކުރީގެ ރައީސް މުޙައްމަދު ނަޝީދާއި، ކުރީގެ ރައީސް ޢަބްދުﷲ ޔާމީންގެ އިތުރުން ކުރިގެ ރައީސް އިބްރާހިމް މުޙައްމަދު ޞާލިޙެވެ.
ތިރީގައި އެވަނީ 3 ރައީސުން އެކުވެގެން ބައި – އިލެކްޝަނުން ހޯދި ނަތީޖާއާއި ރައީސް ޑރ @MMuizzu އެކަނި ހޯއްދެވި ނަތީޖާ.ރަގަޅަށް ބައްލަވާ!ތަފާތު ކުރެވުނީ އެންމެ 62 ވޯޓް.
ރައީސް ޑރ @MMuizzu މިނަތީޖާ ހޯއްދެވީ MDP ވެރިކަމުގައި ބައި-އިލެކްޝަންތަކުގައި މުޅި ދަޢުލަތް ލޫޓުވާލި ގޮތަކަށް… pic.twitter.com/vNlVm1fIPD— Ibrahim Shujau (@IbrahimShujaau) June 6, 2026
”ރައީސް މުޢިއްޒު މި ނަތީޖާ ހޯއްދެވީ އެމްޑީޕީގެ ވެރިކަމުގައި ބައި-އިލެކްޝަންތަކުގައި މުޅި ދައުލަތް ލޫޓުވާލި ގޮތަކަށް ނޫން. ކޮމަންޑޫ އާއި ގުރައިދޫ ދާއިރާއަށް މުޅި ދައުލަތް އޮއްސާލި ގޮތަކަށް ނޫން. މި ނަތީޖާ ޕީއެންސީ ހޯދީ އާސަންދަ އަދި އެންސްޕާގެ ވެރިން ލެޕްޓޮޕްތައް ހިއްޕަވައިގެން ހިތަދޫއަށް އަރުވައިގެނެއް ނޫން. ވަޒީފާތަކާއި ޕްރޮމޯޝަންތައް އޮއްސައިގެނެއް ނޫން. ވީމާ މި ނަތީޖާއިން ތިޔަ ތިން ރައީސުންނަށް މޮޅުތަކެއް ނުލިބޭ،“ – ޝުޖާއު ވިދާޅުވިއެވެ.
ޝުޖާއު ވިދާޅުވީ، އިންތިހާބު ތެރޭގައި ރައީސް ޔާމީން އިންނެވީ ގޭގައި ކޯލްސެންޓަރު ހައްދަވައިގެން ރައްޔިތުންނަށް ގުޅުއްވަން ކަމަށާއި ރައީސް ނަޝީދާއި ރައީސް ޞާލިޙް ކުރެއްވި ކަމަކީ އައްޑޫ ސިޓީ ހިތަދޫއަށް ވަޑައިގެން ދޮރުންދޮރަށް ހިންގެވުމުގައި ކަމަށެވެ.
ނަމަވެސް އެ ތިން ބޭފުޅުންނާއި ހިލާފަށް ރައީސް މުޢިއްޒު ގެންދަވަނީ ގައުމާއި ރައްޔިތުންގެ ހައްގުގައި އެ ބޭފުޅުންގެ ވެރިކަންތަކުގައި ނެންގެވި ލޯނުތައް ދައްކަވައި، ގައުމުގެ ރޭޓިންގ ރަނގަޅުކުރެއްވުމަށް ކުރައްވަންޖެހިވަޑައިގަންނަވާ މަސައްކަތްޕުޅުތައް ކުރެއްވުމުގައި އަވަދިނެތި ގައުމު ހިންގެވުމަށް ކަމަށް ޝުޖާއު ވަނީ އިތުރަށް ވިދާޅުވެފައެވެ.
