ގިރާވަރުފަޅުގެ ލޭންޑް ޔޫސް ޕްލޭނާ ގުޅޭގޮތުން އެ ތަނުން ގޯތި ލިބިފައިވާ މީހުންގެ ހިޔާލު ހޯދުމަށް އާންމު ބައްދަލުވުމެއް ބާއްވަން ހައުސިން މިނިސްޓްރީން ނިންމައިފިއެވެ.
ހައުސިން މިނިސްޓްރީން ހޯމަ ދުވަހު ނެރުނު އިއުލާނެއްގައި ބުނީ މި ބައްދަލުވުން ބާއްވަން ހަމަޖެހިފައި ވަނީ މި މަހުގެ 27 ވާ ބުދަ ދުވަހުގެ ރޭ ކަމަށެވެ. ބައްދަލުވުން ބާއްވާ ތަނާއި ގަޑި ފަހުން އިއުލާނު ކުރެވޭނެ ކަމަށް ވެސް އެ މިނިސްޓްރީން ބުނެފައިވެއެވެ.
މާލެ ސަރަހައްދަށް އަމާޒުކޮށް ސަރުކާރުން ކުރިއަށް ގެންގޮސްފައިވާ ބިންވެރިޔާ ސްކީމުގެ ދަށުން ގިރާވަރުފަޅުން ގޯތި ލިބުނު މީހުން މި ބައްދަލުވުމުގައި ބައިވެރިވުމަށް ހައުސިން މިނިސްޓްރީން ވަނީ އެދިފައެވެ. މި ބައްދަލުވުމުގައި ބައިވެރިވުމަށާއި ހިޔާލު ހުށަހެޅުމަށް ބޭނުންވާ މީހުން ރަޖިސްޓްރީވާން އިއުލާނާ އެކު އޮންލައިން ފޯމެއް ވަނީ ހިމަނާފައެވެ.
ހައުސިން މިނިސްޓްރީން ވަނީ މިހާރު ހިއްކުމުގެ މަސައްކަތް ކުރަމުންދާ ގިރާވަރުފަޅަށް ތައްޔާރުކޮށްފައިވާ ލޭންޑް ޔޫސް ޕްލޭންގެ ޑްރާފްޓެއް ވެސް އެ މިނިސްޓްރީގެ ވެބްސައިޓުގައި އާންމުކޮށްފައެވެ. މި ޑްރާފްޓުގައި ގިރާވަރުފަޅުގައި މީހުން ދިރިއުޅޭ ގޯތިތަކުގެ އިތުރުން ސަރުކާރުގެ މުއައްސަސާތަކަށް ބޭނުންވާ ބިންތަކާ އަދި ހޮސްޕިޓަލްތަކާއި ސްކޫލްތަކާއި މިސްކިތްތަކަށް ބޭނުންވާ ބިން ކަނޑައަޅާފައިވެއެވެ.
މި ބިންތަކުގެ އިތުރުން ކުޅިވަރާއި މުނިފޫހިފިލުވުމުގެ ކަންކަމަށް ބޭނުންވާ ބިމާއި ކޮމިނިއުޓީ ޒޯންތަކާއި ޕްރެޒިޑެންޝަލް ޕްލޮޓްސް އާއި ކޮމާޝަލް ބިންތަކާއި އިންޑަސްޓްރިއަލް ޒޯނެއް ޑްރާފްޓުގައި ހިމަނާފައިވެއެވެ. އަދި އެންވަޔަރަންމަންޓް ޕްރޮޓެކްޝަން ޒޯނެއް ވެސް ވަނީ ކަނޑައަޅާފައެވެ.
