އެސްޓީއޯގެ ދަށުން ހިންގަމުން އަންނަ ބޭސް ފިހާރަތައް އަންނަ މަހުގެ އެއް ވަނަ ދުވަހު ދައުލަތުގެ ބޭސް ކުންފުނި، ސްޓޭޓް ފަރމާގެ ދަށަށް ބަދަލުވާނެ ކަމަށް އެކުންފުނިން ބުނެފިއެވެ.
ދައުލަތުގެ މީޑިއާ ”ޕީއެސްއެމް“ އަށް ދެއްވި އިންޓަވިޔުއެއްގައި ދައުލަތުގެ ބޭސް ކުންފުނި، ސްޓޭޓް ފާމަސޫޓިކަލްގެ މެނޭޖިން ޑިރެކްޓަރު ޑރ. ޝާހް މާހިރު ވިދާޅުވީ އެ ކުންފުނިން މިހާރު ބޭސް ގެނައުމުގެ މަސައްކަތް ފަށާފައިވާ ކަމަށެވެ.
ޑރ. ޝާހް ވިދާޅުވީ، ކުރިން ރާއްޖޭގައި ބޭހުގެ ސްޓޮކް ހުރި މިންވަރު ބެލޭނެ ރަނގަޅު އިންތިޒާމެއް ނެތް ކަމަށާއި ނަމަވެސް ބޭހުގެ ސްޓޮކް ބެލެހެއްޓުމަކީ، ސްޓޭޓް ފާމާއިން ހާއްސަ އިސްކަމެއް ދޭނެ ކަމެއް ކަމަށެވެ.
ޑރ. ޝާހް ވިދާޅުވީ، ބޭސް ފޯރުކޮށްދިނުމުގެ ނިޒާމު ހަރުދަނާ ކުރުމުގެ އިތުރުން އެސްޓީއޯގެ ދަށުން ހިންގަމުންދާ ބޭސް ފިހާރަތައް ދައުލަތުގެ ބޭސް ކުންފުނީގެ ދަށަށް ގެނައުމަށް މަސައްކަތް ކުރަމުން އަންނަ ކަމަށެވެ. އެގޮތުން އަންނަ މަހުގެ އެއް ވަނަ ދުވަހުން ފެށިގެން އެސްޓީއޯގެ ބޭސް ފިހާރަތަކާއި ސްޓޭޓް ފާމާއިން ހަވާލުވާނެ ކަމަށް ޑރ. ޝާހް ވިދާޅުވިއެވެ.
”މި ފޯކަސް ކުރަނީ އެއީ 193 ފާމަސީ، އަދި މުޅިން އަލަށް އަޅުގަނޑުމެން ހުޅުވި ފާމަސީއެއް އައިޖީއެމްއެޗްގައި މިހުރީ. އެ ފާމަސީ ލައިގެން 194 ފާމަސީ ރާއްޖޭގެ އެކި ކަންކޮޅުތަކުގައި ހުންނާނެ. އެތަންތަނުގެ ސަޕްލައިއާއި ކޮންސިއުމަަބަލްސް، މިބައިގަ މިހާރު ތައްޔާރުވަނީ، އެހެންވީމަ އަޅުގަނޑުމެން، އިލެކްޓްރޯނިކް ސިސްޓަމް އެބަ ބޭނުންވޭ މިކަމަށް. އެހެންވީމަ މިހާރު އެ އިންސްޓޮލޭޝަން އެބަދޭ ބާރަށް ކުރިއަށް. ޖުލައި މަހުގެ ކުރިން އެބައި ފުރިހަމަ ކުރެވޭނެ.“ ޑރ. ޝާހް ވިދާޅުވިއެވެ.
ޑރ. ޝާހް އިތުރަށް ވިދާޅުވީ، ބޭސްފިހާރަތަކާ ހަވާލުވާއިރު ބޭސް ފިހާރުތަކުގައި ހުރި ސްޓޮކް އެނގޭނެހެން އެކަމަށް ބޭނުންވާ ސިސްޓަމް އިންސްޓޮލޭޝަން މަސައްކަތްވެސް އަންނަ މަހުގެ ކުރިން ނިންމާލެވޭނެ ކަމަށެވެ.
