ރާއްޖެ އިސްލާމްވީތާ 900 އަހަރު ފުރޭ ދުވަހާ ދިމާކޮށް، ޒުވާން ހަތީބުންގެ ގައުމީ މަހާސިންތާއެއް ބޭއްވުމަށް އިސްލާމިކް މިނިސްޓްރީން ނިންމައިފިއެވެ.
މި މަހާސިންތާ ބާއްވަން ނިންމާފައިވަނީ ރާއްޖެ އިސްލާމްވި ދުވަހުގެ ގޮތުގައި ފާހަގަކުރާ ރަބީއުލްއާހިރު މަހުގެ ދެވަނަ ދުވަހުއެވެ. މިއަހަރު އެ ދުވަސް ދިމާވަނީ އަންނަ ސެޕްޓެމްބަރު މަހުގެ 13 ވަނަ ދުވަހަށެއެވެ. މިކަމާ ގުޅިގެން އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު މީޑިއާތަކަށް ފޮނުވި މެސެޖެއްގައި ވިދާޅުވީ، އެ ދުވަސް ފާހަގަކުރުމަށް ބާއްވާ މަހާސިންތާއަށް މައްކާގެ މަސްޖިދުލްހަރާމްގެ އިމާމު އައްޝައިހް ޑރ. ޔާސިރް އައްދައުސަރީއަށް ދައުވަތު ފޮނުވާފައިވާ ކަމަށެވެ.
މި މަހާސިންތާގައި ޖުމުލަ 1,000 ޒުވާން އިމާމުންނާއި ހަތީބުންގެ އިތުރުން ޒުވާން ހާފިޒުން ވެސް ބައިވެރިވާނެ ކަމަށާއި އަތޮޅުތަކުގައި ތިބި ޒުވާން ހަތީބުން މާލެ ގެނައުމުގެ އިންތިޒާމުތައް ވެސް ހަމަޖައްސާނެ ކަމަށް މިނިސްޓަރު ވަނީ ވިދާޅުވެފައެވެ.
މިނިސްޓަރު ވިދާޅުވި ގޮތުގައި، ރާއްޖޭގައި ތިބި ޒުވާން ހަތީބުންގެ އަދަދަކީ 532 ކަމަށާއި ހާފިޒުންގެ ދަފްތަރުގައި 307 ހާފިޒުން ރަޖިސްޓްރީވެފައިވާ ކަމަށެވެ. މީގެ އިތުރުން އަންނަ ސެޕްޓެމްބަރު މަހުގެ ކުރިން 1,000 ހަތީބުން ހަމަކުރުމަށް އިސްލާމިކް މިނިސްޓްރީން އަމާޒު ހިފާފައިވާ ކަމަށް ވެސް އޭނާ ވަނީ ވިދާޅުވެފައެވެ.
މިނިސްޓަރު އިތުރަށް ވިދާޅުވީ، މަހާސިންތާގައި ބައިވެރިވާން ބޭނުންވާ ފަރާތްތަކަށް ފޯމް ހުށަހެޅުމަށް މި މަހު އިއުލާނުކުރާނެ ކަމަށެވެ. ހަމައެހެންމެ، ޒުވާން ހަތީބުން މިހާރުން ފެށިގެން މި މަހާސިންތާއަށް ތައްޔާރުވުމަށް ވެސް އޭނާ ވަނީ އެދިވަޑައިގެންފައެވެ.
