ޙައްޖުގެ މަތިވެރި އަޅުކަމަށްފަހު އެނބުރި ރާއްޖެ އައިސް ބަލިތަކުން ރައްކާތެރިވާން ފިޔަވަޅުތައް އެޅުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފިއެވެ.
ހައްޖުގެ އަޅުކަން އަދާކުރުމަށް މި އަހަރު ރާއްޖެއިން ޖުމުލަ 1،000 މީހުން ދިޔައެވެ. އެގޮތުން ޙައްޖާޖީންގެ ފުރަތަމަ ގުރޫޕް މިރޭ ރާއްޖެ އައުމަށް ހަމަޖެހިފައިވާ އިރު ބާކީ ތިބި ޙައްޖާޖީން އައުމަށް ހަމަޖެހިފައިވަނީ މި މަހުގެ 7، 8، އަދި 9 ވަނަ ދުވަހުއެވެ. މީސް މީޑިއާގައި ހިއްސާކުރި ޕޯސްޓެއްގައި އެޗްޕީއޭއިން ވަނީ، ޙައްޖު ނުވަތަ ޢުމްރާއިން އެނބުރި އައުމަށްފަހު، ބަލިތަކުން ރައްކާތެރިވުމަށް އެޅިދާނެ ފިޔަވަޅުތައް ކިޔައިދީފައެވެ. އޭގެ ތެރޭގައި:
- އަރިދަފުސް ރޯގާ ޖެހިއްޖެނަމަ ކެއްސައި، ކިނބިހި އަޅާއިރު އަނގަމައްޗާއި ނޭފަތް ނިވާކުރުން
- ޓިޝޫ ފަދަ ތަކެތި ބޭނުންކުރުމަށް ފަހު ރައްކާތެރިގޮތުގައި ނައްތާލުން
- ގިނަގިނައިން ސައިބޯނި ލައިގެން އަތްދޮވުން
- ދަތުރުމައްޗާއި ޙައްޖު ނުވަތަ ޢުމްރާ އަޅުކަމުގައި އުޅޭއިރު މާސްކު އަޅައިގެން އުޅުން
- ރޯގާޖެހި ކެއްސާނަމަ މީހުން އެއްވެ އުޅޭ ތަންތަނަށް ނުދިއުން. ހާއްސަކޮށް ކުޑަކުދިންނާއި އުމުރުން ދުވަސްވީ މީހުންނާއި ބަލިތައް ތަހައްމަލުކުރާ މީހުން ނުދިއުން
- ރޯގާ ޖެހިފައިވާނަމަ ކުޑަކުދިން ކައިރިއަށް ނުދިއުން އަދި އެ ކުދިން އުރާ ނޫޅުން
- އަޅުކަމަށްފަހު އެނބުރި ގައުމަށް އަންނަތާ 14 ދުވަސް ތެރޭގައި ހުން އައުމާއި ކެއްސުމާއި ނޭވާލާން އުނދަގޫވުމާއި މޭގައި ރިއްސުން ފަދަ އަލާމާތެއް ފެނިއްޖެނަމަ ލަސްނުކޮށް އަވަހަށް ޑޮކްޓަރަށް ދެއްކުން
ހައްޖުން އެނބުރި އައުމަށްފަހު ސަމާލުކަން ދޭންވީ މުހިއްމު ކަންކަން. 🕋#Hajj2026 pic.twitter.com/GVd6cJsUop
— Health Protection Agency (@HPA_MV) June 4, 2026
އެޗްޕީއޭއިން ވަނީ ހުން އައިސް ރޯގާ ޖެހިއްޖެނަމަ، ގިނަގިނައިން ދިޔާތަކެތި ބޭނުންކުރުމަށާއި، އަރާމުކުރުން، ހުންގަދަ ނަމަ ގައިގައި ފެން ހޭކުން އަދި ޕެރެސެޓަމޯލް ފިޔަވައި އެހެން ބޭހެއް ޑޮކްޓަރެއްގެ މަޝްވަރާއާ ނުލާ ބޭނުން ނުކުރުމަށް ވެސް އިލްތިމާސްކޮށްފައެވެ.
