ރާއްޖެއިން މި އަހަރު ޙައްޖުގެ މަތިވެރި އަޅުކަން އަދާކުރުމަށް ދިޔަ ޙައްޖާޖީން އެނބުރި ރާއްޖެ އަންނަން ފަށައިފިއެވެ.
ޙައްޖާޖީންގެ ފުރަތަމަ ގްރޫޕް އެނބުރި ރާއްޖެ އައުމަށްޓަކައި މަދީނާ އެއަރޕޯޓުން މިހާރު ވަނީ ފުރައިފައެވެ. މިކަމާ ގުޅިގެން ޙައްޖު ކޯޕަރޭޝަނުން މައުލޫމާތު ދީފައިވާ ގޮތުގައި، މި ފްލައިޓަށް ރާއްޖެ އާދެވޭނެ ކަމަށް ލަފާ ކުރެވެނީ މިރޭ 20:00 އެހާއިރުއެވެ. ސަބަބަކީ މި ފްލައިޓަކީ ޓްރާންސިޓް ފްލައިޓެއް ކަމަށްވާތީ ކަމަށް އެ ކޯޕަރޭޝަނުން ވަނީ ބުނެފައެވެ.
ޙައްޖާޖީން އެނބުރި ރާއްޖެ އައުމަށް ހަމަޖެހިފައިވަނީ ހަތަރު ދުވަހެއްގެ މަތިންނެވެ. އެގޮތުން:
- ފުރަތަމަ ފްލައިޓް – 5 ޖޫން 2026
- ދެވަނަ ފްލައިޓް – 7 ޖޫން 2026
- ތިންވަނަ ފްލައިޓް – 8 ޖޫން 2026
- ހަތަރުވަނަ ފްލައިޓް – 9 ޖޫން 2026
ޙައްޖާޖީން އެނބުރި ރާއްޖެ އަންނަން ފަށާފައި މިވަނީ މަދީނާގައި ދެ ދުވަސް ހޭދަކޮށް، ރައުޟާ އާއި ޤުބާ އަދި އުހުދުގެ މައިދާނަށް ޒިޔާރަތްކުރުމަށްފަހުގައެވެ.
ފާހަގަކޮށްލަންޖެހޭ ގޮތުގައި، މި އަހަރު ދުނިޔޭގެ އެކިކަންކޮޅުތަކުން ޙައްޖުގެ މަތިވެރި އަޅުކަން އަދާކުރުމަށް ޖުމުލަ 1.7 މިލިއަނަށް ވުރެ ގިނަ ޙައްޖާޖީން ސަޢުދީއަށް ގޮސްފައިވާއިރު، ރާއްޖެއިން ގޮސްފައިވަނީ 1،000 ޙައްޖާޖީންނެވެ.
