ބައިނަލްއަޤުވާމީ ކްރެޑިޓް ރޭޓިންގް އެޖެންސީ، ފިޗް ރޭޓިންގްސް އިން ދިވެހިރާއްޖޭގެ ކްރެޑިޓް ރޭޓިންގް މަތިކުރުމާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށާއި ސަރުކާރަށް ޕީޕަލްސް ނޭޝަނަލް ކޮންގްރެސް (ޕީއެންސީ) އިން މަރުޙަބާ ކިޔައި ޝުކުރު އަދާކޮށްފިއެވެ.
ޕީއެންސީން ނެރުނު ނޫސްބަޔާނެއްގައި ފާހަގަކޮށްފައިވާ ގޮތުގައި، ރައީސް ޑރ. މުޢިއްޒު ވެރިކަމާ ޙަވާލުވެވަޑައިގެންނެވިއިރު ރާއްޖޭގެ އިޤުތިޞާދު އޮތީ ނުރައްކާތެރި ފުން އަނދަވަޅެއްގައެވެ. ދައުލަތުގެ ދަރަނި ރެކޯޑު މިންވަރަކަށް މަތިވެ، ބޭރުގެ ދަރަނިތައް އަދާނުކުރެވިދާނެކަމުގެ ބިރު އޮތުމުގެ ސަބަބުން ރާއްޖޭގެ ކްރެޑިޓް ރޭޓިންގް އޭރު އޮތީ ދަށްކޮށްފައެވެ. މީގެ ސަބަބުން ބޭރުގެ މާލީ ބާޒާރުތަކުން ފައިސާ ހޯދުމަށް ބޮޑެތި ގޮންޖެހުންތަކެއް ކުރިމަތިވެފައިވާކަން އެ ޕާޓީން ފާހަގަކުރިއެވެ.
ނަމަވެސް، ރައީސް ޑރ. މުޢިއްޒުގެ ސަރުކާރުން އެންމެ އިސްކަމެއް ދެއްވައިގެން ކުރެއްވި މަސައްކަތަކީ ރާއްޖޭގެ މާލީ ހާލަތު ރަނގަޅުކޮށް، ބައިނަލްއަޤުވާމީ އިދާރާތަކާއި އިންވެސްޓަރުންގެ އިތުބާރު ހޯއްދެވުމެވެ. މިގޮތުން ސަރުކާރުން އެޅުއްވި ހަރުދަނާ ފިޔަވަޅުތަކުގެ ތެރޭގައި، ބޭރު ފައިސާއާ ބެހޭ އައު ޤާނޫނެއް ވުޖޫދަށް ގެނެސް ފަތުރުވެރިކަމުގެ ދާއިރާއިން ލިބޭ ބޭރު ފައިސާ ރާއްޖޭގެ މާލީ ނިޒާމަށް ވަންނާނެ ގޮތް ހެއްދެވުމާއި، ސޮވެރިން ޑިވެލޮޕްމެންޓް ފަންޑަށް (SDF) އަލުން ބޭރު ފައިސާ ޖަމާކުރަން ފެއްޓެވުން ހިމެނެއެވެ.
މީގެ އިތުރުން، އިތުރު ދަރަންޏެއް ނުނަގައި، މިއަހަރުގެ އޭޕްރީލް މަހު ދައްކަންޖެހުނު 500 މިލިއަން ޑޮލަރުގެ ސުކޫކު ޕޭމަންޓް ދެއްކެވުމާއި، އިންޑިއާގެ ރިޒާވް ބޭންކުން ނެގި ކަރަންސީ ސްވޮޕްގެ ތެރެއިން ދައްކަންޖޭހޭ ފައިސާ ދައުލަތުގެ އަމިއްލަ ބާރުވެރިކަމުގައި ދައްކައި ހަލާސްކުރެއްވުން ޕީއެންސީން ފާހަގަކުރިއެވެ.
ސަރުކާރުގެ މި ހަރުދަނާ ސިޔާސަތުތަކުގެ ނަތީޖާއެއްގެ ގޮތުން، ފިޗް އިން ވަނީ ރާއްޖޭގެ ރޭޓިންގް ”ސީސީ“ (CC) އިން ”ސީސީސީ“ (CCC) އަށް މަތިކޮށްފައެވެ. ޕީއެންސީން ބުނި ގޮތުގައި އެއް ދަރަޖައިގެ މި ކުރިއެރުމަކީ ދުނިޔޭގެ އިޤުތިޞާދީ ނުތަނަވަސްކަމުގެ ތެރޭގައިވެސް، ރާއްޖޭގެ މާލީ ސިޔާސަތުތަކަށް ބޭރުގެ ފަރާތްތަކުގެ އިތުބާރު އޮތްކަމުގެ އަލިގަދަ ހެއްކެކެވެ.
”ރާއްޖެއަށް ކުރިމަތިވެފައި އޮތް މާލީ ދަތިތަކުން ސަލާމަތްކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެމަނިކުފާނުގެ ސަރުކާރުން އަޅުއްވަމުން ގެންދަވާ ފިޔަވަޅުތަކުގެ ހަރުދަނާކަން ފިޗްގެ ނިންމުމުން މިވަނީ ކަށަވަރުވެފައި،“ ޕީއެންސީގެ ބަޔާނުގައި ވެއެވެ.
މި ކާމިޔާބީއާ ގުޅިގެން ޕީއެންސީން ވަނީ ރައީސް މުޢިއްޒަށާއި ސަރުކާރުގެ އިޤުތިޞާދީ ޓީމަށް ނުހަނު އިޚުލާޞްތެރިކަމާއެކު ޝުކުރު ދަންނަވާފައެވެ.
