އައްޑޫ ސިޓީގެ ލިންކް ރޯޑް ތަރައްޤީކުރުމަށް ސަރުކާރުން ކުރިއަށްގެންދާ ބިޔަ މަޝްރޫޢުގެ ދަށުން، މަގު ފުޅާކުރުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އިން ބާރުދުވެލީގައި ކުރިއަށް އެބަގެންދެއެވެ.
އާރުޑީސީން އެކްސް މެދުވެރިކޮށް ހާމަކޮށްފައިވާ މަޢުލޫމާތުތަކަށް ބަލާއިރު، ލިންކް ރޯޑް ތަރައްޤީކުރުމުގެ މަޝްރޫޢުގެ ތެރެއިން މަގު ފުޅާކުރުމަށާއި އިތުރު ލޭންތައް ހެދުމަށްޓަކައި މިހާތަނަށް ޖުމްލަ 4,120 މީޓަރުގެ ސަރަޙައްދެއް ވަނީ ސާފުކޮށްފައެވެ.
މި މަސައްކަތް ކުރިއަށްދާ ގޮތް ހިއްސާކުރަމުން އެ ކުންފުނިން ބުނެފައިވަނީ، މަގު ހެދުމަށްޓަކައި ސާފުކުރާ ސަރަޙައްދުގައި ހުރި ރުއްތަކާއި ގަސްތައް ނެގުމުގެ މަސައްކަތްވެސް މިހާރު ކުރިއަށްދާ ކަމަށެވެ. އަދި މިގޮތަށް ނެގޭ ރުއްގަސްތައް ނައްތާލުމުގެ ބަދަލުގައި، އެ ތަކެތި އެހެން ސަރަޙައްދުތަކަށް ބަދަލުކުރުމަށްޓަކައި ރައްކާތެރިކަމާއެކު ނެގުމުގެ މަސައްކަތް ކުރަމުންދާކަން ޔަޤީންކޮށްދީފައިވެއެވެ.
އައްޑޫ ސިޓީގެ ލިންކް ރޯޑް ތަރައްޤީކުރުމަށް ކުރިއަށްގެންދާ މަޝްރޫޢުގެ ތެރެއިން، މަގު ފުޅާކުރުމަށާއި އިތުރު ލޭންތައް ތަރައްޤީކުރުމަށްޓަކައި މިހާތަނަށް ޖުމްލަ 4،120 މީޓަރުގެ ސަރަޙައްދެއް ވަނީ ސާފުކޮށްފައި. އަދި މި މަސައްކަތުގެ ތެރެއިން، އެ ސަރަޙައްދުގައި ހުރި ރުއްތަކާއި ގަސްތައް،… pic.twitter.com/S9GFxBw8rr
— Road Development Corporation Ltd (@rdcmaldives) June 4, 2026
ސަރުކާރުން އައްޑޫ ސިޓީގެ މަގުތަކުގެ ފެންވަރު ރަނގަޅުކުރުމަށް ކުރިއަށްގެންދާ މި މަޝްރޫޢަކީ އެ ސިޓީގެ ދަތުރުފަތުރުގެ ނިޒާމަށް އަންނާނެ ބޮޑު ބަދަލެކެވެ. މަގު ފުޅާވެ އިތުރު ލޭންތައް އިތުރުވުމުން، އައްޑޫ ލިންކް ރޯޑް ބޭނުންކުރާ ފަރާތްތަކަށް ކުރިމަތިވާ ދަތިތަކަށް ލުޔެއް ލިބި، ދަތުރުފަތުރުގެ ރައްކާތެރިކަން އިތުރުވެގެންދާނެއެވެ.
އާރުޑީސީން ދަނީ ރާއްޖޭގެ އެކި ކަންކޮޅުތަކުގައި މަގު ހެދުމުގެ ގިނަ މަޝްރޫޢުތަކެއް ސަރުކާރުގެ އިރުޝާދުގެ ދަށުން ހަލުވިކަމާއެކު ކުރިއަށްގެންދަމުންނެވެ.
