މާލޭ ވިޔަފާރި ބަނދަރުން މުދާ ބޭލުން ލަސްވުމުގެ ސަބަބުން، އަވަށްޓެރި ސްރީލަންކާގެ ކޮލަމްބޯ ޕޯޓުން ރާއްޖެއަށް މުދާ ގެންނަން ދިމާވި ދަތިތައް މިހާރު އެއްކޮށް ހައްލުކޮށްފައިވާ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ހާމަކޮށްފިއެވެ.
މި އަހަރުގެ ކުރީކޮޅުން ފެށިގެން ދުނިޔޭގެ މަސްރަހުގައި ހިނގަމުންދާ ހަނގުރާމަތަކާއި، ޚާއްޞަކޮށް ޔަހޫދީންނާއި އެމެރިކާ ގުޅިގެން ދެމުންދާ ހަމަލާތަކާ ގުޅިގެން ދުނިޔޭގެ ކަނޑުދަތުރުފަތުރަށް ވަނީ ބޮޑެތި ގޮންޖެހުންތަކެއް ކުރިމަތިވެފައެވެ. މިކަމުގެ އަސަރު ރާއްޖޭގެ މާކެޓަށް ފޯރުނަ ނުދިނުމަށް ސަރުކާރުން ކުރަމުންދާ މަސައްކަތުގެ ތެރެއިން، ކޮލަމްބޯ ބަނދަރުގައި ތާށިވެފައި ހުރި ކޮންޓެއިނަރުތައް ގެނައުމަށް ވަނީ ޚާއްޞަ އިސްކަމެއް ދީފައެވެ.
އެމްޕީއެލްއިން މައުލޫމާތު ދޭ ގޮތުގައި، މި މުއްދަތުގެ ތެރޭގައި ރާއްޖެއާއި ކޮލަމްބޯއާ ދެމެދު އާދައިގެ މަތިން ދަތުރުތައް ކުރަމުން ދިޔަ ނަމަވެސް، ގާތްގަނޑަކަށް 4,200 ކޮންޓެއިނަރު ލަންކާ ބަނދަރުގައި ވަނީ ތާށިވެފައެވެ. މީގެ ތެރޭގައި ވަކި ބާވަތްތަކުގެ މުދާ ހިމެނޭތީ، ރާއްޖޭގެ ބާޒާރުން އެ ތަކެތި ހުސްވިޔަ ނުދިނުމަށްޓަކައި ކަމާގުޅޭ އިދާރާތަކުން ވަނީ ގިނަ މަސައްކަތްތަކެއް ކޮށްފައެވެ.
މި މައްސަލައާ ގުޅިގެން އިޤްތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދު މީގެ ކުރިން ވިދާޅުވެފައިވަނީ، މުދާ ގެނައުން އަވަސްކުރުމަށް ކަމާގުޅޭ ހުރިހާ އިދާރާތަކާއެކު ގުޅިގެން މަސައްކަތް ކުރައްވަމުން ގެންދަވާ ކަމަށެވެ. އަދި ރާއްޖެއަށް ބޭނުންވާ ޒަރޫރީ ސާމާނު މެދުނުކެނޑި ލިބޭނެ އިންތިޒާމު ހަމަޖެއްސުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ނުހަނު އިސްކަންދޭ ކަމެއް ކަމަށްވެސް ވަޒީރު ވަނީ ފާހަގަކުރައްވާފައެވެ.
އެމްޕީއެލްއިން މިއަދު ބުނީ، ސަރުކާރުގެ ވުޒާރާތަކާއި ގުޅިގެން ކުރެވުނު މަސައްކަތުން މިހާރު އެ ހުރިހާ ދަތިތަކެއް ހައްލުވެ، މުދާ ގެނައުމުގެ ކަންކަން އާންމު ހާލަތަކަށް ރުޖޫޢަވެފައިވާ ކަމަށެވެ. މީގެ ސަބަބުން ރާއްޖޭގެ ވިޔަފާރިވެރިންނަށް މުދާ ލިބުމުގައި ހުރި ހުރަސްތައް ނެތިގެންދާނެ ކަމަށް އެ ކުންފުނިން އުންމީދު ކުރެއެވެ.
