ހުސްވެފައިވާ ޖުޑީޝަލް ސަރވިސް ކޮމިޝަން (ޖޭއެސްސީ) ގެ ނައިބު ރައީސްކަމުގެ މަގާމަށް، ސުޕްރީމް ކޯޓުގެ ފަނޑިޔާރު އަލްއުސްތާޛު ޙުސައިން ޝަހީދު އައްޔަންކޮށްފިއެވެ.
މީސް މީޑިއާގައި ހިއްސާކޮށްފައިވާ ޕޯސްޓެއްގައި ޖޭއެސްސީން ވަނީ، ނައިބު ރައީސްކަމުގެ މަގާމަށް އަލަށް އައްޔަންކުރެވުނު ބޭފުޅާއަށް މަރުހަބާ ދަންނަވައިފައެވެ. މި މަގާމު ހުސްވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މަންދޫބެއްގެ ހައިސިއްޔަތުން އެ ކޮމިޝަނުގައި އިންނެވި ޔަޒްމީދު މުޙައްމަދު، ހުސްވި މެއި މަހު މަގާމުން އިސްތިއުފާ ދެއްވުމާ ގުޅިގެންނެވެ. އޭނާގެ ބަދަލުގައި މިހާރު ރައީސްގެ ފަރާތްޕުޅުން އިންނަވަނީ ޢަލީ ނަޞީރު ޤާސިމެވެ.
We would like to congratulate Justice Hussain Shaheedh for being elected as the Vice Chair of JSC. pic.twitter.com/qB3NmYXiAl
— Judicial Service Commission (@MaldivesJSC) June 3, 2026
ފަނޑިޔާރު ޝަހީދަކީ ޝަރުޢީ ދާއިރާގައި ގިނަ ތަޖުރިބާތަކެއް ހާސިލުކުރައްވައިފައިވާ ބޭފުޅެކެވެ. އެގޮތުން، ދިވެހިރާއްޖޭގެ ހައިކޯޓުގެ އިސް ފަނޑިޔާރުކަމާއި، ކްރިމިނަލް ކޯޓުގެ ފަނޑިޔާރުކަން ވެސް އޭނާ ވަނީ މީގެ ކުރިން ކުރައްވައިފައެވެ. ސުޕްރީމް ކޯޓުގެ ބެންޗަށް އޭނާ އައްޔަންކުރެވުނީ، އޭރު އެ ކޯޓުގައި އިންނެވި ފަނޑިޔާރު ޙުސްނުއްސުޢޫދު އިސްތިއުފާދެއްވުމާ ގުޅިގެން، މިދިޔަ އަހަރުގެ މާރިޗު މަހުގެ 19 ވަނަ ދުވަހުއެވެ.
އޭގެ ފަހުން، މިދިޔަ އަހަރުގެ އޭޕްރީލް މަހުގެ 7 ވަނަ ދުވަހު ޖޭއެސްސީގެ މެންބަރު ކަމަށް އޭނާ އައްޔަންކޮށްފައިވާކަން ފާހަގަކޮށްލަންޖެހެއެވެ.
