ޕެރިސް / މޮސްކޯ – ބައިނަލްއަޤްވާމީ ދަތިކުރުމުގެ ފިޔަވަޅުތަކާ ޚިލާފަށް ރަޝިޔާގެ ތެޔޮ އުފުލުމުގައި ހަރަކާތްތެރިވާ ”ޝެޑޯ ފްލީޓް“ އަށް ނިސްބަތްވާ ބޮޑު ތެޔޮ ޓޭންކަރަކަށް ފަރަންސޭސި ކަނޑުގެ ސިފައިންނާއި ކޮމާންޑޯއިން ވައިގެ މަގުން އަރައި، އެ އުޅަނދު އެއްކޮށް ހިފަހައްޓައިފިއެވެ. ރަޝިޔާގެ އާކްޓިކް ބަނދަރެއް ކަމަށްވާ މުރުމާންސްކްއިން ފުރައިގެން އެފްރިކާގެ ކެމަރޫންއަށް ދަތުރުކުރި ”ތާގޯރް“ ނަމަކަށް ކިޔާ މި ޓޭންކަރު ހިފެހެއްޓީ އެޓްލާންޓިކް ކަނޑުގެ ބައިނަލްއަޤްވާމީ ސަރަޙައްދުން، ފަރަންސޭސިވިލާތުގެ ބްރިޓަނީއާ 400 މޭލު ބޭރުންނެވެ.
ކޮމާންޑޯ ޙަމަލާއާއި ދޮގު ދިދައިގެ މައްސަލަ
ފަރަންސޭސި ރައީސް އެމަނުއެލް މާކްރޮން އެކްސް ގައި އާންމުކުރެއްވި ވީޑިއޯއިން ފެންނަގޮތުގައި، ހެލިކޮޕްޓަރަކުން ވާގޮތްގަނޑެއް ބޭނުންކޮށްގެން ކޮމާންޑޯއިން ވަނީ ކުއްލި ގޮތަކަށް މި އުޅަނދުގެ މައްޗަށް ފުންމާލާފައެވެ. މާކްރޮން ވިދާޅުވީ އިނގިރޭސިވިލާތުގެ އަސްކަރިއްޔާގެ އެހީތެރިކަމާއެކު ހިންގި މި އޮޕަރޭޝަނަކީ ރަޝިޔާއިން ޔޫކްރެއިންއާ ދެކޮޅަށް ކުރާ ހަނގުރާމައަށް ފަންޑުކުރުން ހުއްޓުވުމަށް ހިންގި ޤާނޫނީ އޮޕަރޭޝަނެއް ކަމަށެވެ.
މި ޓޭންކަރު ދަތުރުކުރަމުންދިޔައީ ކެމަރޫން ނުވަތަ މަޑަގަސްކަރައިގެ ”ފޯލްސް ފްލެގް“ (ދޮގު) ދިދައެއް ބޭނުންކޮށްގެން، އޮޅުވާލައިގެންކަން ފަރަންސޭސި ކަނޑުގެ ސިފައިން ވަނީ ކަށަވަރުކޮށްދީފައެވެ. މިހާރު ފަރަންސޭސި އަސްކަރީ މަނަވަރުގެ ބެލުމުގެ ދަށުން މި އުޅަނދު ދަނީ ފަރަންސޭސިވިލާތުގެ ބަނދަރަކަށް ގެންދެވެމުންނެވެ.
އިސްތިރާޖީ ދިރާސާ: ބައިނަލްއަޤްވާމީ ކަނޑުފޭރުމުގެ ތުހުމަތު
ކްރެމްލިންގެ ތަރުޖަމާނު ޑްމިޓްރީ ޕެސްކޯވް ވަނީ ފަރަންސޭސިވިލާތުގެ މި ޢަމަލަކީ ކަނޑައެޅިގެން ބައިނަލްއަޤްވާމީ ޤާނޫނުތަކާއި ކަނޑުގެ މުޢާހަދާތަކާ ޚިލާފު، ”ބައިނަލްއަޤްވާމީ ކަނޑުފޭރުމުގެ“ ޢަމަލެއް ކަމަށް ބުނެ ކުށްވެރިކޮށްފައެވެ. ރަޝިޔާގެ އެމްބަސީން ވަނީ އުޅަނދުގެ ކެޕްޓަނަކީ ރަޝިޔާގެ ރައްޔިތެއްކަން ފާހަގަކޮށް، ކުރޫއިންގެ ރައްކާތެރިކަން ކަށަވަރުކުރުމަށް ގޮވާލާފައެވެ.
އަސްކަރީ ދިރާސާވެރިން ބުނާގޮތުގައި، މިދިޔަ ސެޕްޓެމްބަރު މަހުން ފެށިގެން ފަރަންސޭސިވިލާތުން ރަޝިޔާގެ އުޅަނދެއް މިގޮތަށް ހިފެހެއްޓި މިއީ 4 ވަނަ ފަހަރެވެ. ކުރިން ހިފެހެއްޓި ”ޑޭނާ“ އަދި ”ގްރިންޗް“ ފަދަ އުޅަނދުތައް ދޫކޮށްލީ އެމީހުންގެ ކުންފުނިތަކުން މިލިއަނުން ޔޫރޯގެ ޖޫރިމަނާ ދެއްކުމުންނެވެ. އީރާނުގެ ހަނގުރާމައާ ހުރެ ދުނިޔޭގެ ތެލުގެ އަގު އިންތިހާއަށް މަތިވެފައިވާ މި ދަނޑިވަޅުގައި، ހުޅަނގުގެ ބާރުތަކުން ބައިނަލްއަޤްވާމީ ކަނޑުތަކަކީ އެމީހުންގެ އަމިއްލަ މިލްކެއްގެ ގޮތުގައި ބޭނުންކޮށް، އިޤްތިޞާދީ ބްލޮކޭޑްތައް ވަރުގަދަކުރުމަކީ މަދަނީ ދަތުރުފަތުރަށް އޮތް ބޮޑު ނުރައްކަލެކެވެ.
