ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީ.އެސް.އައި.ޕީ) ގެ ދަށުން ހއ. ބާރަށާއި ހއ. އުތީމުގައި ކުރިއަށް ގެންދިއުމަށް ހަމަޖެހިފައިވާ ތަރައްޤީގެ މަޝްރޫޢުތަކަށް ބޭނުންވާ މެޝިނަރީޒް އާއި އެހެނިހެން ސާމާނުތައް އެ ރަށްރަށަށް ފޮނުވުމުގެ މަސައްކަތް ރޯޑް ޑިވޮލޮޕްމެންޓް ކޯޕަރޭޝަން (އާރްޑީސީ) އިން ބާރުސްޕީޑުގައި ފަށައިފިއެވެ.
މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ރަށްރަށުގެ އުމްރާނީ ތަރައްޤީއަށް ދެއްވާ ހާއްސަ އިސްކަމުގެ ދަށުން، ރަށްރަށުގެ މަގުތައް ހެދުމަށާއި އުމްރާނީ ވަސީލަތްތައް ފުރިހަމަކުރުމަށް ފަށާފައިވާ މުހިންމު މަސައްކަތްތަކެކެވެ. އާރްޑީސީން ބުނެފައިވާ ގޮތުގައި، މިހާރު ކުރިއަށްދަނީ މި ދެ ރަށުގެ މަޝްރޫޢުތަކަށް ބޭނުންވާ ތަކެތި ސައިޓަށް ގެންދިއުމުގެ (މޮބިލައިޒް ކުރުމުގެ) އަމަލީ މަސައްކަތެވެ.
މި މަޝްރޫޢުތަކުގެ ސަބަބުން ބާރަށާއި އުތީމުގެ ރައްޔިތުންނަށް ދިމާވެފައިވާ އިޖުތިމާޢީ އަދި އިޤްތިޞާދީ ހާލަތަށް ބޮޑެތި ކުރިއެރުންތަކެއް ލިބިގެންދާނެއެވެ. ސަރުކާރުގެ އަމާޒަކީ ރަށްރަށުގެ ތަރައްޤީގެ މަޝްރޫޢުތައް އެއްވެސް މެދުކެނޑުމެއް ނެތި ކުރިއަށް ގެންގޮސް، ވީހާވެސް އަވަހަކަށް ރައްޔިތުންނަށް އޭގެ މަންފާ ފޯރުކޮށްދިނުމެވެ.
އާރްޑީސީން އިތުރަށް މައުލޫމާތު ދޭ ގޮތުގައި، މި މަސައްކަތްތައް ތާވަލާ އެއްގޮތަށް ކުރިއަށް ގެންގޮސް ނިންމާލުމަށްޓަކައި އެ ކޯޕަރޭޝަނުގެ ޓީމުތަކުން ދަނީ މެދުކެނޑުމެއް ނެތި މަސައްކަތް ކުރަމުންނެވެ. މިއީ ތިލަދުންމަތީގެ މި ދެ ރަށުގެ އުމްރާނީ ސޫރަ ބަދަލުކޮށްލާނެ މުހިންމު މަޝްރޫޢުތަކެކެވެ.
