އެމްޑީޕީއަށް އަނބުރާ ޖޯޝު ގެނެވޭނީ ކުރީގެ ރައީސް މުޙައްމަދު ނަޝީދު ޗެއާޕާސަންކަމުގެ މަގާމަށް ގެނެވިގެން ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ ކުރީގެ މެންބަރު ރޮޒައިނާ އާދަމް ވިދާޅުވެއްޖެއެވެ.
ރޮޒައިނާ މި މޭރުމުން ވިދާޅުވީ، އައްޑޫ ސިޓީގައި ބޭއްވި ނަޝީދުގެ ކެމްޕެއިން ޓީމުގެ ބައްދަލުވުމެއްގައެވެ. މި ބައްދަލުވުމުގައި ވާހަކަދައްކަވަމުން ރޮޒައިނާ ވިދާޅުވީ، ނަޝީދާ ނުލައި އެމްޑީޕީން ވާދަކުރި ދެ އިންތިހާބުގައި ކަންކަން ވެގެންދިޔަ ގޮތް ވަރަށް ގާތުން ފެނިގެން ގޮސްފައިވާ ކަމަށެވެ. އަދި ނަަޝީދާއެކު ވާދަކުރި ކައުންސިލް އިންތިހާބުގައި އެމްޑިޕީއަށް ކާމިޔާބީ ލިބުނުކަން އޭނާ ފާހަގަކުރެއްވިއެވެ.
”އަޅުގަނޑުމެން އެންމެން ވެސް ގަބޫލުކުރަންޖެހޭ ހަގީގަތެއް ރައީސް ނަޝީދަކީ މި ޕާޓީއަށް ވަރަށް ޖޯޝު ގެނެސްދެއްވާ ބޭފުޅެއްކަން. އެހެންވީމަ އެ ޖޯޝާ ފޯރީގަ 2028 ވަނަ އަހަރުގެ ރިޔާސީ އިންތިހާބުގައި އަޅުގަނޑުމެން ނުކުންނަން މި ޖެހެނީ. އެހެންވީމަ އެކަމަށް ބަލައިލާއިރު މި ވަގުތު ޗެއަރޕާސަން ކަމަށް ރައީސް ނަޝީދު ވަޑައިގަންނަވާ ނަމަ އަޅުގަނޑުމެންނަށް ފެންނަނީ މި ޕާޓީން ދުރަށް ޖެހުނު އެންމެން އަނބުރާ އައިސް އަޅުގަނޑުމެންނަށް މި ޕާޓީ އެކަތިގަނޑަކަށް ހަދައިގެން ކުރިއަށް ދެވޭނެ މަންޒަރު.“ – ރޮޒައިނާ ވިދާޅުވިއެވެ.
ނަޝީދަށް ތައުރީފްކުރައްވަމުން ރޮޒައިނާ މިހާރު ވާހަކަދެއްވި ނަމަވެސް މީގެ ކުރިން އޭނާއަކީ، ނަޝީދާ ދެކޮޅަށް، ކުރީގެ ރައީސް ޞާލިޙާއެކު މަސައްކަތް ކުރެއްވި ބޭފުޅެއްކަން ފާހަގަކޮށްލަންޖެހެއެވެ. އަދި އެތަކެއް ޖަލްސާއެއްގައި އަދި މީސް މީޑިއާގެ އެކި މަންސަތަކުގައި ވެސް ނަޝީދަށް އެންމެ ބޮޑަށް ފާޑު ވިދާޅުވި އެއް ބޭފުޅަކަށް ރޮޒައިނާ ވާނެއެވެ.
ނަމަވެސް އެމްޑީޕީގެ ޗެއަރޕާސަންކަމުގެ އިންތިހާބުގައި ނަޝީދު ވާދަކުރައްވަން ނިންމެވިކަން ހާމަކުރެއްވި ހިސާބުން ރޮޒައިނާ ވަނީ، ކުރީގެ ރައީސް ޞާލިޙް ދޫކުރައްވައި ނަޝީދަށް ތާއީދުކުރައްވާކަން ހާމަކުރައްވައިފައެވެ.
