ދުނިޔޭގެ ބާޒާރުގައި ހަނގުރާމައާއި ނުތަނަވަސްކަން ބޮޑުވެފައިވާ ދަނޑިވަޅެއްގައިވެސް، ރާއްޖޭގެ އިގުތިސާދު ހަމަމަގުގައި ހިފެހެއްޓުމާއެކު ބައިނަލްއަގުވާމީ ކްރެޑިޓް ރޭޓިންގ އިދާރާ، ފިޗް ރޭޓިންގްސްއިން ރާއްޖެއަށް ދީފައިވާ ކްރެޑިޓް ރޭޓިންގ މިއަދު މަތިކޮށްފިއެވެ.
ފިޗް ރޭޓިންގްސްއިން މިއަދު ނެރުނު ސޮވެރިން ރޭޓިންގ ރިޕޯޓުގައި ބަޔާންކޮށްފައިވާ ގޮތުގައި، ދުނިޔޭގެ ބާޒާރަށް ކުރިމަތިވެފައިވާ ގޮންޖެހުންތަކާއެކުވެސް، މެދު ރާސްތާގައި ރާއްޖޭގެ އިގްތިސާދު ބާރުމިނެއްގައި ކުރިއަރާނެ ކަމަށް ވަނީ އަންދާޒާކޮށްފައެވެ. މި ކުރިއެރުން ބިނާވެފައިވަނީ މައިގަނޑު ގޮތެއްގައި ފަތުރުވެރިކަމުގެ ދާއިރާއަށް އަންނަ ހެޔޮ ބަދަލުތަކުގެ މައްޗަށެވެ. އެގޮތުން އާ ރިސޯޓުތަކަށް ކުރެވޭ އިންވެސްޓްމަންޓްތަކާއި، ފަތުރުވެރިކަމުގެ އިންފްރާސްޓްރަކްޗަރަށް ގެނެވޭ ތަރައްގީގެ ސަބަބުން އިގްތިސާދީ ދުވެލި ވަރުގަދަވާނެ ކަމަށް އެ ރިޕޯޓުގައި ފާހަގަކޮށްފައިވެއެވެ.
ދުނިޔޭގެ ހަކަތައިގެ ބާޒާރަށް އަންނަ ލޮޅުންތަކާއި، މެދުއިރުމަތީގެ ހަމަނުޖެހުންތަކުގެ ސަބަބުން ދަތުރުފަތުރަށް ކުރިމަތިވާ ހުރަސްތަކާއެކު، ކައިރި މުސްތަގުބަލެއްގައި ބައެއް ގޮންޖެހުންތައް ހުރި ނަމަވެސް، ރާއްޖޭގެ އިގްތިސާދީ ކުރިއެރުން 2027 ވަނަ އަހަރާ ހަމައަށް 4.5 އިންސައްތައިގައި ހުންނާނެ ކަމަށް ފިޗުން ލަފާކުރެއެވެ. މިއީ ވަކިން ހާއްސަކޮށް ދުރު ރާސްތާގެ ގައުމުތަކުން އަންނަ، މަތީ ފަންތީގެ ފަތުރުވެރިން އިތުރުވަމުންދިއުމާ ގުޅިފައިވާ ކުރިއެރުމެކެވެ.
މިކަމާ ގުޅޭގޮތުން މިނިސްޓްރީ އޮފް ފައިނޭންސް އިން ހާމަކުރި ގޮތުގައި، ފިޗްގެ މި އަންދާޒާތަކުން ދޭހަވަނީ ބައިނަލްއަގްވާމީ ގޮންޖެހުންތަކާއެކުވެސް ރާއްޖޭގެ އިގްތިސާދާއި ފަތުރުވެރިކަމުގެ ދާއިރާގައި ހުރި ވަރުގަދަކަމެވެ. އަދި ސަރުކާރުގެ ހަރުދަނާ ސިޔާސަތުތަކުގެ ސަބަބުން އިގްތިސާދަށް އިތުރު އިތުބާރު ލިބެމުންދާކަންވެސް މިނިސްޓްރީން ވަނީ ފާހަގަކޮށްފައެވެ.
ރާއްޖޭގެ ކްރެޑިޓް ރޭޓިންގ މަތިވެގެން މިދިޔައީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން އިގްތިސާދީ އިސްލާހީ ހަރުދަނާ ފިޔަވަޅުތަކެއް އަޅަމުންދާ ދަނޑިވަޅެއްގައެވެ.
