މަސްވެރިންނަށް ހާއްސަ އަގެއްގައި ތެޔޮ ފޯރުކޮށްދިނުމަށް ސަރުކާރުން ކުރިއަށްގެންދާ މަޝްރޫއުގެ ދަށުން، ގދ. ތިނަދޫން މަސްވެރިންނަށް ހެޔޮ އަގުގައި ތެޔޮ ލިބޭނެ އިންތިޒާމު މިހާރު ހަމަޖައްސާފައިވާ ކަމަށް މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާބެހޭ ވުޒާރާއިން މިއަދު ވިދާޅުވެއްޖެއެވެ.
މެދުއިރުމަތީގައި ހިނގަމުންދާ ހަނގުރާމައާއި ނުތަނަވަސްކަމުގެ ސަބަބުން ދުނިޔޭގެ ބާޒާރުގައި ތެލުގެ އަގު އިންތިހާއަށް އުފުލިފައިވީ ނަމަވެސް، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިރުޝާދުގެ ދަށުން ސަރުކާރުގެ އަމާޒަކީ މަސްވެރިކަމުގެ ސިނާއަތަށް އެކަމުގެ ނޭދެވޭ އަސަރު ކުޑަކުރުމެވެ. މިގޮތުން، މަސްވެރިންނަށް ލުއިފަސޭހަ ކޮށްދިނުމަށްޓަކައި މީގެ ކުރިން 4 ސަރަހައްދަކުން ލިބެމުންދިޔަ ހެޔޮ އަގުގެ ތެޔޮ، މިހާރު ރާއްޖޭގެ 15 ސަރަހައްދަކުން ލިބޭނެ މަގު ވަނީ ފަހިކޮށްދީފައެވެ.
މަސްވެރިކަމާ ބެހޭ ވުޒާރާއިން ހާމަކުރެއްވި ގޮތުގައި، ’ފަހިހަކަތަ‘ ޕޯޓަލްގައި ރަޖިސްޓްރީ ވެފައިވާ ދޯނިތަކަށް ސަބްސިޑައިޒް އަގުގައި ތިނަދޫން ތެޔޮ ލިބޭނެ އިންތިޒާމް މިހާރު ވަނީ ހަމަޖެހިފައެވެ. ސަރުކާރުން ގެންގުޅޭ މި ހަރުދަނާ ސިޔާސަތުގެ ދަށުން މިހާތަނަށް 2.5 މިލިއަނަށްވުރެ ގިނަ ލީޓަރު ތެޔޮ މަސްވެރިންނަށް ދޫކޮށްފައިވާކަން އެ ވުޒާރާއިން ފާހަގަކުރެއެވެ.
މިފްކޯ މެދުވެރިކޮށް މި ތެޔޮ ދޫކުރުމުގައި އުޅަނދުފަހަރުގެ ބޮޑުމިނަށް ބަލައި ވަނީ ވަކި ކޯޓާއެއް ކަނޑައަޅާފައެވެ. އެގޮތުން:
85 ފޫޓުން މަތީގެ އުޅަނދުތަކަށް: 5,000 ލީޓަރު
50 ފޫޓާއި 85 ފޫޓާ ދެމެދުގެ އުޅަނދުތަކަށް: 3,000 ލީޓަރު
50 ފޫޓުން ދަށުގެ އުޅަނދުތަކަށް: 1,500 ލީޓަރު
ތިނަދޫގެ އިތުރުން މިހާރު ހެޔޮ އަގުގައި ތެޔޮ ލިބޭނެ އެހެން ސަރަހައްދުތަކަކީ: ހއ. އިހަވަންދޫ، ހދ. ހަނިމާދޫ، ށ. މިލަންދޫ، ރ. ދުވާފަރު، ބ. އޭދަފުށި، ޅ. ފެލިވަރު، ކ. ހިންމަފުށި، ހުޅުމާލެ ޖެޓީ، ފ. ނިލަންދޫ، ދ. ކުޑަހުވަދޫ، ދ. މީދޫ، ގއ. ކޫއްޑޫ، ފުވައްމުލައް ސިޓީ އަދި ސ. ހުޅުމީދޫއެވެ.
މި ނިންމުމަކީ މަސްވެރިންގެ އަތުން ތެލަށް ކުރާ ހޭދަ ކުޑަކޮށް، މަސްވެރިކަމުގެ ސިނާއަތަށް ދިމާވެފައިވާ ގޮންޖެހުންތަކަށް ހައްލެއް ހޯދައިދިނުމަށް ރައީސް ޑރ. މުއިއްޒުގެ ސަރުކާރުން އަޅުއްވާފައިވާ މުހިންމު ފިޔަވަޅެކެވެ.
