އުސް ފާރެއްގެ މަތީގައި ތާށިވެފައި އޮތް ބުޅަލަކާއި އޭގެ ދަރިއަކަށް އެހީތެރިވުމަށް ދީނީ އިލްމުވެރިޔާ ޝެއިޚް ޒަމްޒަމް ފާރިޝް ކުރެއްވި މަސައްކަތް ދައްކުވައިދޭ ވީޑިއޯއަކަށް ސޯޝަލް މީޑިއާގައި ބޮޑު ސަމާލުކަމެއް ލިބެން ފަށައިފިއެވެ.
މީގެ ދެ ދުވަސް ކުރިން ހިނގި މި ހާދިސާގެ ތަފްސީލު ޝެއިޚް ޒަމްޒަމް ފާރިޝް ވަނީ އޭނާގެ ސޯޝަލް މީޑިއާ އެކައުންޓްތަކުގައި ހިއްސާކުރައްވާފައެވެ. ޝެއިޚް ވިދާޅުވި ގޮތުގައި، އެ ބުޅާ އޭގެ ދަރި ގޮވައިގެން އޮތީ އަށް ފޫޓު އުސް ފާރެއްގެ މަތީގައެވެ. ފާރު މާ އުސްވުމުގެ ސަބަބުން ދަރި ގޮވައިގެން ތިރިއަށް ފޭބޭނެ ގޮތެއް އެ ބުޅަލަކަށް ނެތެވެ. އަދި ދަރި އެކަނި ދޫކޮށްލައިފި ނަމަ ބިމުގައި ޖެހި މަރުވެދާނެތީ އެ ސޮރު އޮތީ ވަރަށް ބޮޑަށް ހާސްވެފައެވެ.
އެ ބުޅާ އޮތް ހާލަތު ފެނިވަޑައިގަތުމުން، ޝެއިޚް ވަނީ އެ ސޮރަށް އެހީތެރިވުމަށް ގާތަށް ވަޑައިގެންފައެވެ. ”އެ ސޮރު އޮތް ހާލު ފެނިފައި އަޅުގަނޑު އެ ސޮރު ކައިރިއަށް ދިޔައީ. އަދި ދަރި ސޮރު އަޅުގަނޑު އަތަށް ވައްޓާލުމަށްޓަކައި އަޅުގަނޑުގެ އަތް ދިއްކޮށްލީމެވެ،“ ޝެއިޚް ވިދާޅުވިއެވެ.
ޝެއިޚް ކިޔައިދެއްވި ގޮތުގައި، އަތް ދިއްކޮށްލުމުން އެ ބުޅާ ގާތްގަނޑަކަށް ފަސް ސިކުންތު ވަންދެން ޝެއިޚާ ދިމާލަށް ބަލަހައްޓައިގެން އޮތެވެ. އޭގެ ފަހުން، މުޅިން ނުދަންނަ އިންސާނަކަށް އިތުބާރުކޮށް، އޭގެ ލޯބިވާ ދަރި ޝެއިޚްގެ އަތްމައްޗަށް ވައްޓާލިއެވެ. ދަރިފުޅު ރައްކާތެރިކަމާއެކު ޝެއިޚަށް ހަވާލުކުރުމަށްފަހު، އެ ބުޅާ ވަނީ ވަގުތުން ތިރިއަށް ފުންމާލައި، ދަރިފުޅުގެ ލަފުގައި ހިފައިގެން ރައްކާތެރި ތަނަކަށް ގެންގޮސްފައެވެ.
މި ހައިރާންކުރުވަނިި މަންޒަރާ ގުޅޭގޮތުން ޝެއިޚް ވިދާޅުވީ، މިއީ މާތްﷲގެ ކުޅަދުންވަންތަކަން ހާމަވާ ކަމެއް ކަމަށެވެ.
”ސުބްޙާނަﷲ، މާތްﷲގެ ކުޅަދުންވަންތަކަމާއެވެ. އެ ސޮރު ނުވެސް ދަންނަ އިންސާނަކަށް އިތުބާރުކޮށްފައި އެޔޮއް މަތިން އެ ސޮރުގެ ދަރި އެ ވައްޓައި، ހަވާލުކުރީ. އަދި އެވަރުގެ ކަމެއް ކުރަން އެ ސޮރުގެ ބުއްދިން ވިސްނައި ފިކުރުކޮށްފައި ދަރީގެ ހައްގުގައި އެކަން އެކުރީ،“ ޝެއިޚްގެ ޕޯސްޓުގައި ލިޔުއްވާފައިވެއެވެ.
މި ވީޑިއޯ ސޯޝަލް މީޑިއާގައި އާންމުވުމާއެކު، ގިނަ ބަޔަކު ދަނީ ޝެއިޚްގެ އިހުސާންތެރިކަމަށް ތައުރީފުކޮށް، ދިރޭތަކެއްޗަށް އޯގާތެރިވުމުގެ މުހިންމުކަމާ މެދު ޝުއޫރު ފާޅުކުރަމުންނެވެ.
