ރާއްޖޭގައި ހަލުވިކަމާއެކު ފެތުރެމުންދާ ހިމަބިއްސަށް (މީސަލްސް) މިދިޔަ ހަފުތާގެ ތެރޭގައި އިތުރު ދެ މީހަކު ޕޮޒިޓިވްވެ، މި ބައްޔަށް ފަރުވާ ހޯދަމުންދާ މީހުންގެ ޖުމްލަ އަދަދު 11 އަށް އަރާފައިވާ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ހާމަކޮށްފިއެވެ.
އެޗްޕީއޭއިން މައުލޫމާތު ދެއްވާ ގޮތުގައި، އަލަށް ފެނުނު ދެ ކޭސްވެސް ރިޕޯޓްކޮށްފައިވަނީ މާލެ ސަރަހައްދުންނެވެ. މި ކޭސްތަކާ ގުޅިގެން ބަލި ފެތުރުން ކޮންޓްރޯލް ކުރުމަށްޓަކައި ކޮންޓެކްޓް ޓްރޭސިންގް ހަދައި، ސާމްޕަލް ނެގުމުގެ މަސައްކަތް ބާރުމިނުގައި ދަނީ ކުރަމުންނެވެ. މިގޮތުން ބައްޔަށް ޕޮޒިޓިވްވި މީހުންނާ ބައްދަލުވެފައިވާ (ޑައިރެކްޓް ކޮންޓެކްޓްސް) މީހުންގެ އަދަދު މިހާރު 152 އަށް އަރާފައިވާ ކަމަށް އެ އިދާރާއިން ބުނެއެވެ.
ވޭތުވެދިޔަ ހަފްތާގައި ހިމަބިހި (މީސްލްސް) ކޭސްތަކުގެ އަދާހަމަ#measles pic.twitter.com/yo4Fvh2pma
— Health Protection Agency (@HPA_MV) June 2, 2026
ހިމަބިއްސަކީ ކޮވިޑް-19 އާއި ޓީބީ ފަދަ ނުރައްކާތެރި ބަލިތަކަށްވުރެވެސް މާ ހަލުވިކޮށް ގައިންގަޔަށް އަރާ ބައްޔެކެވެ. ރާއްޖޭގެ އަވައްޓެރި އިންޑިއާ އަދި ބަންގްލަދޭޝް ފަދަ ގައުމުތަކުގައިވެސް މި ބަލި މިހާރު ދަނީ ވަރަށް ބޮޑަށް ފެތުރެމުންނެވެ.
ބަލި އިތުރަށް ފެތުރުން ހުއްޓުވުމަށްޓަކައި، ރާއްޖޭގެ ހުރިހާ ހޮސްޕިޓަލްތަކެއްގައި މިހާރު ވަނީ ރައްކާތެރިކަމުގެ ފިޔަވަޅުތައް ވަރުގަދަކޮށްފައެވެ. އެގޮތުން ހިމަބިއްސަށް ޝައްކުކުރެވޭ އަލާމާތްތައް ހުރެގެން ހޮސްޕިޓަލަށްދާ މީހުންނަށް ޚާއްޞަ ޑެސްކެއް މެދުވެރިކޮށް އަވަހަށް ފަރުވާ ލިބޭނެ އިންތިޒާމު ވަނީ ހަމަޖައްސާފައެވެ.
އެޗްޕީއޭއިން އިލްތިމާސް ކުރައްވަނީ، ހުންއައިސް ގައިގައި ރަތް ބިހިތަކެއް ނަގައިފިނަމަ ލަސްނުކޮށް ޑޮކްޓަރަށް ދެއްކުމަށެވެ. އަދި ހޮސްޕިޓަލަށް ދާއިރު މާސްކު އެޅުމަށާއި، ބައްޔަށް ޝައްކުކުރެވިގެން ޓެސްޓު ހަދައިފިނަމަ ނަތީޖާ ލިބެންދެން އެކަހެރިވެގެން ތިބުމަށްވެސް ވަނީ އަންގާފައެވެ. މީގެ އިތުރުން ބަލީގެ އެއްވެސް އަލާމާތެއް ހުރިނަމަ، މީހުން އެއްވެ އުޅޭ ތަންތަނަށް ނުދިއުމަށްވެސް ވަނީ ނަސޭހަތްތެރިވެފައެވެ.
ސިއްޙީ މާހިރުން ފާހަގަކުރައްވާ ގޮތުގައި މި ބަލިން ރައްކާތެރިވުމަށް އޮތް އެންމެ މުހިންމު ހައްލަކީ ހިމަބިހި ވެކްސިންގެ ދެ ޑޯޒު ފުރިހަމަކުރުމެވެ. އެހެންކަމުން، މިހާތަނަށް ވެކްސިން ފުރިހަމަނުކޮށް ތިބި ފަރާތްތަކުން ވީ އެންމެ އަވަހަކަށް ވެކްސިން ޖެހުމަށް އެޗްޕީއޭ އާއި ޑޮކްޓަރުން ވަނީ ބާރުއަޅުއްވާފައެވެ.
