ނިމިދިޔަ މެއި މަހުގެ ތެރޭގައި މަސްވެރިން ބޭނި މަހަށް 31 މިލިޔަން ރުފިޔާ ދޫކޮށްފައިވާ ކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) އިން ހާމަކޮށްފިއެވެ.
މިފްކޯއިން އާންމުކޮށްފައިވާ ތަފާސްހިސާބުތަކަށް ބަލާއިރު، މިދިޔަ މެއި މަހު ޖުމްލަ 693 ދޯންޏަކުން 1,791 ޓަނުގެ މަސް ވަނީ ކިރުވާފައެވެ. މި މަހަށް މަސްވެރިންނަށް ޖުމްލަ 31,081,853 ރުފިޔާ ދޫކޮށްފައިވެއެވެ. ނަމަވެސް، އެޕްރީލް މަހާ އަޅާބަލާއިރު މެއި މަހު މަސް ކިރުވި މިންވަރު ވަނީ ވަރަށް ބޮޑަށް ދަށްވެފައެވެ. އެޕްރީލް މަހު 1,068 ދޯންޏަކުން 4,414 ޓަނުގެ މަސް ކިރުވާފައިވެއެވެ.
މިފްކޯއިން މަސް ގަތް މިންވަރު ދަށްވުމުގެ މައިގަނޑު ސަބަބަކީ މެއި މަހުގެ 10 ވަނަ ދުވަހުން ފެށިގެން ރާއްޖެއަށް ކުރި ހުޅަނގު މޫސުމުގެ ވިއްސާރައެވެ. މީގެ އިތުރުން، މަހުގެ ފަހުކޮޅު ޢީދު ބަންދާ ދިމާވުމުން މަހަށް ނިކުތް ދޯނިފަހަރުގެ އަދަދު މަދުވުމަކީވެސް މަސް ކިރުވި މިންވަރު ދަށްވި ސަބަބެއް ކަމަށް އެ ކުންފުނިން ފާހަގަކުރެއެވެ.
ތަފާސްހިސާބުތަކަށް ވަކިވަކިން ބަލާއިރު:
ކަޅުބިލަމަސް: 367 ދޯންޏަކުން 1,708.9 ޓަނު ކިރުވާފައިވާއިރު، 29,063,153 ރުފިޔާ ވަނީ ދޫކޮށްފައެވެ.
ކަންނެލި (10 ކިލޯއިން މަތި): 109 ދޯންޏަކުން 6.9 ޓަނު ކިރުވާފައިވާއިރު، 138,000 ރުފިޔާ ވަނީ ދޫކޮށްފައެވެ.
ކަންނެލި (15 ކިލޯއިން މަތި): 217 ދޯންޏަކުން 75.2 ޓަނު ކިރުވާފައިވާއިރު، 1,880,700 ރުފިޔާ ވަނީ ދޫކޮށްފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން މަސްވެރިކަމުގެ ސިނާޢަތް ކުރިއެރުވުމަށް ޚާއްޞަ އިސްކަމެއް ދެއްވައިގެން ގިނަ މަސައްކަތްތަކެއް ދަނީ ކުރައްވަމުންނެވެ. އެގޮތުން މަސްވެރިން ކިރުވާ މަހަށް 48 ގަޑިއިރުގެ ތެރޭގައި ފައިސާ ދޫކުރުމުގެ އިންތިޒާމު މިހާރު ވަނީ ހަމަޖައްސާފައެވެ. އަދި މަސްވެރިންނަށް ޚާއްޞަ ހެޔޮ އަގެއްގައި ތެޔޮ ފޯރުކޮށްދިނުމަށް ރާއްޖޭގެ 9 ސަރަޙައްދަކުން މިހާރު ތެޔޮ ލިބޭނެ އިންތިޒާމު ވަނީ ހަމަޖައްސާފައެވެ.
މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ހާމަކުރި ގޮތުގައި، މެދުއިރުމަތީގެ ހަނގުރާމައާ ގުޅިގެން ތެލުގެ އަގަށް އަންނަ ބަދަލުތަކުން މަސްވެރިންނަށް ލުއި ހޯދައިދިނުމަށް ސަރުކާރުން ދަނީ މަސައްކަތް ކުރަމުންނެވެ. އެގޮތުން މިދިޔަ މަހުގެ 19 ވަނަ ދުވަހާ ހަމައަށް 2.5 މިލިޔަން ލީޓަރަށްވުރެ ގިނަ ތެޔޮ މަސްވެރިންނަށް ދޫކޮށްފައިވެއެވެ.
ސަރުކާރުގެ އަމާޒަކީ ދުނިޔޭގެ މަޝްރަޙަށް އަންނަ ބަދަލުތަކުގެ ސަބަބުން މަސްވެރިކަމުގެ ސިނާޢަތަށް ދަތިނުވާނެހެން ކަންކަން ރޭވުމާއި، މަސްވެރިންނަށް ޤަވާއިދުން ފައިސާ ލިބޭނެކަމުގެ ޔަޤީންކަން ދިނުމެވެ.
