ހަތަރު މަސްދުވަހުގެ މުސާރަ އެއްފަހަރާ ލިބޭ ގޮތަށް އަމިއްލައަށް ވަޒީފާއިން ވަކިވުމުގެ ފުރުސަތު ފެނަކަ ކޯޕަރޭޝަންގެ މުވައްޒަފުންނަށް ހުޅުވާލައިފިއެވެ.
ފެނަކަ ކޯޕަރޭޝަންގެ ޗީފް ކޯޕަރޭޓް އޮފިސަރު އުސައިދު ޙަސަން ސޮއިކުރައްވައި، އެ ކުންފުނީގެ ހުރިހާ ގޮފިތަކަކަށް ފޮނުވި މެމޯއެއްގައި ބަޔާންކޮށްފައިވަނީ، މި ފުރުސަތުގެ ބޭނުން ހިފަން ބޭނުންވާ މުވައްޒަފުން އަންނަ އާދިއްތަ ދުވަހުގެ މެންދުރުފަހު 15:00 ގެ ކުރިން ކުންފުނީގެ އެޗްއާރް ޑިޕާޓްމެންޓަށް އެކަން އަންގަންޖެހޭނެ ކަމަށެވެ.
މި މުއްދަތުގެ ތެރޭގައި އަމިއްލައަށް ވަޒީފާއިން ވަކިވުމަށް އެދޭ މުވައްޒަފުންނަށް ބަދަލެއްގެ ގޮތުން ހަތަރު މަސްދުވަހުގެ މުސާރަ ދިނުމަށް ކުންފުނިން ނިންމާފައިވާއިރު، މިއީ ކުންފުނިތަކުން މުވައްޒަފުންގެ އަދަދު މަދުކުރުމަށް ސަރުކާރުން އަޅަން ނިންމާފައިވާ ފިޔަވަޅު ތަންފީޒުކުރުމުގެ ގޮތުން އެ ކުންފުނިން ފަށާފައިވާ މަސައްކަތެކެވެ.
ހަރަދު ކުޑަކުރުމަށް އަޅަން ނިންމާފައިވާ ފިޔަވަޅުތަކުގެ ދަށުން، ސަރުކާރު ހިއްސާވާ ކުންފުނިތަކުގެ މުވައްޒަފުންގެ ތެރެއިން 33 އިންސައްތަ މުވައްޒަފުން މަދުކުރުމަށް ފިނޭންސް މިނިސްޓްރީން ވަނީ މިދިޔަ އޭޕްރިލް މަހުގެ ތެރޭގައި ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އަށް އަންގައިފައެވެ. އެއާއެކު ސަރުކާރު ހިއްސާވާ ގިނަ ކުންފުނިތަކުން ވަނީ އެ މަސައްކަތް ފެށުމަށް ތައްޔާރުވެފައެވެ.
ފެނަކަ ކޯޕަރޭޝަންގައި 8،000 އަށްވުރެ ގިނަ މުވައްޒަފުން ވަޒީފާ އަދާކުރަމުން އަންނަކަން ފާހަގަކޮށްލަންޖެހެއެވެ.
