މި މަހުގެ ފަސް ވަނަ ދުވަހުން ފެށިގެން ޙައްޖުގެ މަތިވެރި އަޅުކަން އަދާކުރުމަށް، ދިވެހިރާއްޖެއިން ސަޢުދީ ޢަރަބިއްޔާއަށް ދިޔަ ޙައްޖާޖީން މާލެ އަންނަން ފަށާނެ ކަމަށް ޙައްޖު ކޯޕަރޭޝަނުން ހާމަކޮށްފިއެވެ.
މިކަން ހާމަކޮށް މީސް މީޑިއާގައި ހިއްސާކުރި ޕޯސްޓެއްގައި ޙައްޖު ކޯޕަރޭޝަނުން ބުނެފައިވަނީ، ދިވެހި ޙައްޖާޖީން މާލެ އައުމަށް ހަމަޖެހިފައި ވަނީ ހަތަރު ދުވަހެއްގެ މަތިން ހަތަރު ފްލައިޓެއްގައި ކަމަށެވެ. ޙައްޖާޖީން މާލެ އައުމަށް ހަމަޖެހިފައި ވަނީ ގައުމީ އެއަރލައިން މޯލްޑިވިއަންގެ ދެ ފްލައިޓުންނާއި ސަޢުދިއާގެ ދެ ފްލައިޓުގައެވެ.
މި މަހުގެ ފަސް ވަނަ ދުވަހު ޙައްޖާޖީންގެ ފުރަތަމަ ގުރޫޕް މާލެ އަންނާނީ ސަޢުދިއާގެ ފްލައިޓެއްގައެވެ. އެ ފްލައިޓް ވެލާނާ އިންޓަރނޭޝަނަލް އެއަރޕޯޓުގައި ޖައްސާނީ އެ ދުވަހުގެ މެންދުރުފަހު 14:00 ގައި ކަމަށް ޙައްޖު ކޯޕަރޭޝަނުން ބުނެއެވެ. ދެ ވަނަ ފްލައިޓް މި މަހުގެ ހަތް ވަނަ ދުވަހު އައުމަށް ހަމަޖެހިފައިވާއިރު، އެ ފްލައިޓް އެއަރޕޯޓުގައި ޖައްސާނެ ކަމަށް ޙައްޖު ކޯޕަރޭޝަނުން ލަފާކޮށްފައިވަނީ އެ ދުވަހުގެ 17:40 ގައެވެ.
ޙައްޖާޖީންގެ އެންމެފަހު ދެ ފްލައިޓް މާލެ އައުމަށް ހަމަޖެހިފައި ވަނީ މި މަހުގެ އަށް ވަނަ ދުވަހާއި ނުވަ ވަނަ ދުވަހުއެވެ. އެގޮތުން މި މަހުގެ އަށް ވަނަ ދުވަހު މާލެ އައުމަށް ހަމަޖެހިފައިވާ ފްލައިޓް އެއަރޕޯޓުގައި ޖައްސާނީ އެ ދުވަހުގެ މެންދުރުފަހު 14:00 ގައެވެ. އަދި އެންމެފަހު ފްލައިޓް އެއަރޕޯޓުގައި ޖައްސާނީ މި މަހުގެ ނުވަ ވަނަ ދުވަހުގެ މެންދަމު 00:01 ގައި ކަމަށް ޙައްޖު ކޯޕަރޭޝަނުން މައުލޫމާތުދެއެވެ.
މި އަހަރު ވެސް ރާއްޖެއިން 1،000 މީހުން ޙައްޖުގެ މަތިވެރި އަޅުކަން އަދާކުރުމަށް ސަޢުދީ ޢަރަބިއްޔާއަށް ގޮސްފައިވާކަން ފާހަގަކޮށްލަންޖެހެއެވެ.
