މާލޭ ސަރަހައްދުގައި ޓެކްސީގެ ޚިދުމަތް ދެމުން އަންނަ ”މާލެ ޓެކްސީ“ ލައިންގެ ޚިދުމަތްތައް އިތުރަށް ފަސޭހަކޮށް، ޒަމާނީ ކުރުމުގެ ގޮތުން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ޚާއްޞަ މޯބައިލް އެޕްލިކޭޝަނެއް މިއަދު ތައާރަފުކޮށްފިއެވެ.
މީގެކުރިން މާލޭ ޓެކްސީ ލައިން މެދުވެރިކޮށް އުޅަނދު ހޯދުމަށް ބޭނުންކުރަމުން އައީ ހޮޓްލައިން ނަމްބަރު 1655 އާއި އެމްޓީއެލް ވެބް އެޕެވެ. އަދި ފައިސާ ދެއްކުމަށް ވެސް ބޭނުންކުރަން ޖެހެނީ ވެބް ލިންކެކެވެ. ނަމަވެސް، ކަސްޓަމަރުންނަށް ލުއިފަސޭހަކޮށްދިނުމަށްޓަކައި އެމްޓީސީސީން މިހާރު ވަނީ އައިފޯން ބޭނުންކުރާ ފަރާތްތަކަށް އެޕް ސްޓޯރު މެދުވެރިކޮށް ”މާލެ ޓެކްސީ“ އެޕްލިކޭޝަން ޑައުންލޯޑު ކުރެވޭނެ އިންތިޒާމު ހަމަޖައްސާފައެވެ. އަދި އެންޑްރޮއިޑް ކަސްޓަމަރުންނަށް ގޫގުލް ޕްލޭ ސްޓޯރުން ވަރަށް އަވަހަށް މި އެޕް ލިބޭނެ ކަމަށް އެ ކުންފުނިން މަޢުލޫމާތު ދެއެވެ.
މި އެޕްލިކޭޝަން މެދުވެރިކޮށް ޚިދުމަތް ހޯދުމަށްޓަކައި ކަސްޓަމަރުން ފުރަތަމަ ޖެހޭނީ ރަޖިސްޓްރީ ކުރާށެވެ. ދަތުރެއް ބުކް ކުރުމަށްޓަކައި އެޕްގެ ހޯމް ޕޭޖުގައިވާ ”ބުކް ނައު“ އަށް ފިތާލުމަށްފަހު، ދަތުރު ފަށާ ތަނާއި ދާން ބޭނުންވާ ތަން ފާހަގަކޮށް ލޮކޭޝަން ކޮންފާމް ކުރަންޖެހެއެވެ.
ފައިސާ ދެއްކުމުގެ ކަންކަން ވެސް މި އެޕްލިކޭޝަންގެ ސަބަބުން ވަނީ ވަރަށް ބޮޑަށް ލުއިވެފައެވެ. އެގޮތުން އެޕްގެ ވޮލެޓަށް ފައިސާ ޖަމާކޮށްގެން ނުވަތަ ބޭންކް ގޭޓްވޭ މެދުވެރިކޮށް ކާޑުން ފައިސާ ދެއްކޭނެ އިންތިޒާމު ވަނީ ހަމަޖައްސާފައެވެ. މީގެ އިތުރުން، ދަތުރު ނިމުމުން ”ސްކޭން ޓު ޕޭ“ ފީޗާ މެދުވެރިކޮށް ވެސް ފައިސާ ދެއްކުމުގެ ފުރުސަތު އޮންނާނެއެވެ.
މި އެޕްލިކޭޝަނުގައި ހިމެނޭ ފާހަގަކޮށްލެވޭ އިތުރު ފީޗާތަކުގެ ތެރޭގައި:
ތާވަލުކުރުން: ދަތުރު ފެށުމުގެ މަދުވެގެން 3 ގަޑިއިރު ކުރިން ކުރިއާލައި ދަތުރު ޝެޑިއުލް ކުރެވުން.
ރައްކާތެރިކަން: ކަސްޓަމަރަށް ނުރައްކަލެއް އިހުސާސް ކުރެވޭ ހާލަތެއްގައި ބޭނުންކުރެވޭނެ ”އެސްއޯއެސް އިމަޖަންސީ“ ފީޗާ.
މުއާމަލާތް: ޑްރައިވަރަށް މެސެޖުކުރުމާއި ގުޅުމުގެ އިތުރުން، އުޅަނދުގައި އެއްޗެއް ބޭއްވިފައިވާނަމަ އެކަން ރިޕޯޓުކުރުމުގެ ފުރުސަތު.
ފީޑްބެކް: ކޮންމެ ދަތުރަކަށްފަހު ޚިދުމަތާ މެދު ދެކޭގޮތް ހާމަކުރުމުގެ ފުރުސަތު.
މާލެ ޓެކްސީގެ ޚިދުމަތް ރަސްމީކޮށް ފަށާފައިވަނީ މިއަހަރުގެ އޭޕްރީލް މަހުގެ 2 ވަނަ ދުވަހު 150 ކާރާ އެކުގައެވެ. ޚިދުމަތް ފެށިތާ ކުރީކޮޅު ވެބް އެޕަށް ދިމާވި ސެކިއުރިޓީ މައްސަލަތަކަކާ ގުޅިގެން ފުރަތަމަ ދެ ހަފްތާއަށް ވުރެ ގިނަ ދުވަހު މި ޚިދުމަތް ހިލޭ ދީފައިވެއެވެ. ނަމަވެސް މިހާރު މި ޚިދުމަތް 24 ގަޑިއިރު ދެމުންދަނީ ޓްރާންސްޕޯޓް މިނިސްޓްރީން ކަނޑައަޅާފައިވާ ރަސްމީ އަގުތަކުގައެވެ.
