ރަޝިޔާ-ޔޫކްރެއިން ހަނގުރާމައިގެ ތާރީޚުގައިވެސް މިހާތަނަށް ދިން އެންމެ ވަރުގަދަ އަދި އެންމެ ގިނަ ޢަދަދެއްގެ ވައިގެ ޙަމަލާތައް ރަޝިޔާއިން ރޭގެ ވަގުތެއްގައި ޔޫކްރެއިންއަށް ދީފިއެވެ. ޔޫކްރެއިންގެ ވައިގެ ސިފައިން ކަށަވަރުކޮށްދޭ ގޮތުގައި، ރަޝިޔާއިން ރޭ ވަނީ 656 ޖާސޫސީ އަދި ޙަމަލާދޭ ޑްރޯން އަދި 73 މިސައިލް އެއްފަހަރާ ޔޫކްރެއިންގެ އެކި ރަށްތަކަށް ފޮނުވާލާފައެވެ. މި ބިރުވެރި ޙަމަލާތަކުގައި މިހާތަނަށް 9 އާންމު ރައްޔިތުން ވަނީ މަރުވެފައެވެ.
ޔޫކްރެއިންގެ އަސްކަރިއްޔާއިން ބުނިގޮތުގައި، ރަޝިޔާއިން ފޮނުވާލި 73 މިސައިލްގެ ތެރޭގައި ވައިގެ ދިފާޢީ ނިޒާމުތަކަށް ހުއްޓުވަން އެންމެ އުނދަގޫ ”ބެލިސްޓިކް މިސައިލް ގިނަ ޢަދަދަކަށް ހިމެނެއެވެ. 656 ޑްރޯން އެއްފަހަރާ ރާޑަރުތަކަށް ފޮނުވާލުމުން، ޔޫކްރެއިންގައި ހުރި އެމެރިކާއާއި ޔޫރަޕްގެ ދިފާޢީ ނިޒާމުތަކަށް ވަނީ އޯވަރލޯޑްވެ (ބާރުބޮޑުވެ)، ޙަމަލާތައް ހުއްޓުވުމަށް ނުކުޅެދިފައެވެ.
އިސްތިރާޖީ ދިރާސާ: ހުޅަނގަށް ކުރިމަތިވެފައިވާ ހަތިޔާރުގެ ދަތިކަން
ސިޔާސީ އަދި އަސްކަރީ ދިރާސާކުރާ ފަރާތްތަކުން ބުނާގޮތުގައި، މި ޙަމަލާއިން އެންމެ ބޮޑަށް ހާމަވަނީ ޔޫކްރެއިންގެ ވައިގެ ދިފާޢީ ބާރުތައް ވަރަށް ބޮޑަށް ބަލިކަށިވެފައިވާ ކަމެވެ. އެމެރިކާއާއި ހުޅަނގުގެ ބާރުތަކުން އެޤައުމުތަކުގެ ހަތިޔާރާއި މިސައިލްތައް މެދުއިރުމައްޗާއި އެފްރިކާގެ ހަނގުރާމަތަކަށާއި ކަނޑުމަތީގެ ބްލޮކޭޑްތަކަށް އަނބުރާލުމާ ގުޅިގެން ޔޫކްރެއިންއަށް ބޭނުންވާ ޕެޓްރިއަޓް މިސައިލް ފަދަ އިންޓަރސެޕްޓަރުތައް މިހާރު ވަނީ ވަރަށް ބޮޑަށް ހުސްވެފައެވެ.
