ޖަލުތަކަށް ކުރިމަތިވެފައިވާ ޖާގައިގެ ދަތިކަން ހައްލުކުރުމަށް ސަރުކާރުން ކުރަމުންދާ މަސައްކަތްތަކުގެ ދަށުން، މިހާތަނަށް 370 އެއްހާ އެނދުގެ ޖާގަ އިތުރުކުރެވިފައިވާ ކަމަށް ކޮމިޝަނަރ އޮފް ޕްރިޒަންސް ޙަސަން ޒަރީރު ވިދާޅުވެއްޖެއެވެ.
ޕީއެސްއެމް ނިއުސްގެ ”ރާއްޖެމިއަދު“ ޕްރޮގްރާމްގައި ވާހަކަދައްކަވަމުން ކޮމިޝަނަރ ޒަރީރު ވިދާޅުވީ، ޖަލުތަކުގެ ކެޕޭސިޓީ އިތުރުކުރުމަކީ މި ސަރުކާރުން ވަރަށް ބޮޑު އިސްކަމެއް ދޭ ކަމެއް ކަމަށެވެ. އެގޮތުން މިހާތަނަށް 370 އެއްހާ ޖާގަ އިތުރުކުރެވިފައިވާއިރު، މި ދައުރުގެ ތެރޭގައި ޖުމްލަ 500 އެނދަށް ޖާގަ އިތުރުކުރުމަކީ އަމާޒެއް ކަމަށް އޭނާ ފާހަގަކުރެއްވިއެވެ.
”އަޅުގަނޑުމެނަށް މިހާރު 370 އެއްހާ ބެޑް ކެޕޭސިޓީ އިތުރުކޮށްފައި، އެއާއެކު އަޅުގަނޑުމެން މިހާރު ހުޅުމާލޭ ޖަލުގައިވެސް ހޯލްޑިންގ ޖަލުގެ ސެލްތަކާއި، މާލޭ ޖަލުގެ ބަދަލުގައި ސަރުކާރުން ދެއްވާފައިވާ ހުޅުމާލޭ ކޯވިޑް ފެސިލިޓީގައި 140 މީހުންގެ ޖާގައިގެ ޔުނިޓެއް ހެދުމުގެ މަސައްކަތް އެބަކުރަން،“ ސީޕީ ޒަރީރު ވިދާޅުވިއެވެ.
ރާއްޖޭގައި ކުށްވެރިން އެކަހެރިކޮށް ބެލެހެއްޓުމަށް ތިން ޖަލެއް ހުރި ނަމަވެސް، ޖަލުގެ ކޮންސެޕްޓަށް ތަރައްޤީކުރެވިފައިވާ ހަމައެކަނި ޖަލަކީ މާލޭ ޖަލެވެ. ނަމަވެސް އެ ޖަލު ހުރި ސަރަޙައްދަކީ ސްކޫލަކާ އިންވެގެން އޮތް ތަނަކަށްވާތީ، ސަރުކާރުން ވަނީ އެ ޖަލު ހުޅުމާލެއަށް ބަދަލުކޮށްފައެވެ. މީގެ އިތުރުން، ކުރިން ހުޅުމާލޭގައި ކޯވިޑް ސެންޓަރެއްގެ ގޮތުގައި ބޭނުންކުރި ބިމުގައިވެސް މިހާރު ވަނީ ހުޅުމާލޭ ޖަލުގެ ޔުނިޓެއް ހުޅުވާފައެވެ.
ކޮމިޝަނަރ އިތުރަށް ވިދާޅުވީ، ޖާގައިގެ ދަތިކަމުގެ ސަބަބުން ޤައިދީން އެކަށީގެންވާ ގޮތެއްގައި ވަކިކޮށްގެން ބެލެހެއްޓުމަށް ބޮޑެތި ގޮންޖެހުންތަކެއް ކުރިމަތިވާ ކަމަށެވެ. އެގޮތުން، އުމުރުން ދުވަސްވީ މީހުންނާއި ޒުވާނުން އެއްތަނެއްގައި ބައިތިއްބަން ޖެހުމަކީ ކަންބޮޑުވުމެއް ކަމަށާއި، އެކަން ހައްލުކުރުމަށް ދިގު މުއްދަތުގެ ހުކުމް ތަންފީޒުކުރާ މީހުންނަށް ޚާއްޞަ ޔުނިޓެއް ޤާއިމުކުރުމުގެ މަސައްކަތް ކުރަމުންދާ ކަމަށް ވިދާޅުވިއެވެ.
ޖަލުތަކުގެ މައްސަލައަށް ދާއިމީ ހައްލެއް ގެނައުމަށް ސަރުކާރުން ގެންގުޅޭ ތަސައްވުރަކީ ”ވަން ޕްރިޒަން ކޮންސެޕްޓް“ އެވެ. މި ކޮންސެޕްޓްގެ ދަށުން އުތުރު ތިލަފަޅުގައި ހުރިހާ ޚިދުމަތްތަކެއް ހިމެނޭ ސެންޓްރަލް ޖަލެއް ތަރައްޤީކުރުމަށް ވަނީ ނިންމާފައެވެ. މިއީ މީހުން ދިރިއުޅޭ ރަށްރަށާއި، ލޯކަލް ޓޫރިޒަމް ފުޅާވެފައިވާ ރަށްރަށުގައި ޖަލުތައް ހުރުމުގެ ސަބަބުން އާންމުންނާއި ސަރުކާރަށް އޮތް ކަންބޮޑުވުންތަކަށް ލިބޭނެ ދާއިމީ ހައްލެއް ކަމަށް ސަރުކާރުން ދެކެއެވެ.
