މާލެ އާއި ވިލިމާލޭގެ މަގުތައް ޒަމާނީ ފެންވަރަށް ތަރައްޤީކުރުމަށް ސަރުކާރުން ކުރިއަށްގެންދާ ބޮޑު މަޝްރޫޢުގެ ތަފްޞީލީ ކުރެހުންތައް އެކުލަވައިލުމަށް ބޭނުންވާ ސާވޭތަކާއި ދިރާސާކުރުމުގެ އަމަލީ މަސައްކަތްތައް ރަސްމީކޮށް ފަށައިފިއެވެ.
މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، މާލޭގެ މަގުތަކަށް ދިމާވެފައިވާ ފެންބޮޑުވުމުގެ މައްސަލައާއި ދަތުރުފަތުރުގެ ދަތިތަކަށް ދާއިމީ ޙައްލެއް ހޯދުމުގެ މަޤްޞަދުގައި ކުރިއަށްގެންދާ މުހިންމު މަޝްރޫޢެކެވެ. މި މަޝްރޫޢަކީ ޗައިނާ ސަރުކާރުގެ ދީލަތި ހިލޭ އެހީގެ ދަށުން ކުރިއަށްގެންދާ މަސައްކަތެކެވެ.
މާލެ އަދި ވިލިމާލޭގެ މަގުތައް ޒަމާނީ ފެންވަރަށް ތަރައްޤީކުރުމަށް ކުރިއަށްގެންދާ މަޝްރޫޢުގެ ތަފްޞީލީ ކުރެހުންތައް އެކުލަވައިލުމަށް ބޭނުންވާ ސާވޭތަކާއި ދިރާސާކުރުމުގެ މަސައްކަތްތައް ފަށައިފިއެވެ.
ޗައިނާ ސަރުކާރުގެ ހިލޭ އެހީގެ ދަށުން ކުރިއަށްގެންދާ މި މަޝްެރޫޫއުގެ ތެރެއިން،… pic.twitter.com/Jo611pvUpM
— Ministry of Infrastructure, Housing and Urban Dev. (@MIHUDmv) June 2, 2026
މިހާރު ފަށާފައިވާ މަސައްކަތްތަކުގެ ތެރޭގައި މަގުތަކުގެ ޙާލަތު ބެލުމަށް ކުރަންޖެހޭ ފަންނީ ސާވޭތަކާއި، ކުރެހުންތައް ތައްޔާރުކުރުމަށް ބޭނުންވާ މަޢުލޫމާތު އެއްކުރުން ހިމެނެއެވެ. މި މަޝްރޫޢުގެ ތެރެއިން، މަސައްކަތާ ގުޅޭ ސަރަޙައްދުތައް ސާވޭކުރުމާއި، ކަމާގުޅުންހުރި އެކި މުއައްސަސާތަކާއެކު ބާއްވާ މަޝްވަރާ ބައްދަލުވުންތައް 4 ޖުލައި 2026 ގެ ނިޔަލަށް ކުރިއަށްދާނެ ކަމަށް ގެދޮރުވެރިކަމާއި ޢުމްރާނީ ތަރައްޤީއާ ބެހޭ ވުޒާރާއިން މަޢުލޫމާތު ދެއެވެ.
މާލެ އާއި ވިލިމާލޭގެ މަގުތައް ހެދުމުގެ މަޝްރޫޢަކީ މާލެ ސަރަޙައްދުގެ ތަރައްޤީއަށް ސަރުކާރުން ކަނޑައަޅާފައިވާ އެންމެ އިސް އެއް މަސައްކަތެވެ. މި މަޝްރޫޢުގެ ދަށުން މަގުތަކުގައި ތާރު އެޅުމާއި، ފެން ހިންދާ ނިޒާމު ހަރުދަނާކުރުމުގެ އިތުރުން، ހިނގާ މީހުންނާއި އުޅަނދުފަހަރަށް ފަސޭހަވާނެހެން މަގުތައް ފަރުމާކުރެވިގެންދާނެއެވެ.
މި މަޝްރޫޢު ނިމުމުން، މާލޭގެ ތަރުތީބު ގެއްލިފައިވާ މަގުތަކަށް އިންޤިލާބީ ބަދަލެއް އައިސް، ރައްޔިތުންނަށް ދިމާވެފައިވާ ދަތިތަކަށް ބޮޑު ލުޔެއް ލިބިގެންދާނެ ކަމަށް ސަރުކާރުން އުންމީދު ކުރެއެވެ.
