ދުނިޔޭގެ ބެލެނިވެރިންގެ ދުވަހާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަނބިކަނބަލުން މެޑަމް ސާޖިދާ މުޙައްމަދު، ބެލެނިވެރިން ކުރައްވާ މަތިވެރި މަސައްކަތުގެ އަގުވަޒަންކުރައްވައި ޚާއްޞަ މެސެޖެއް ދެއްވައިފިއެވެ.
ސޯޝަލް މީޑިއާ މެދުވެރިކުރައްވައި މެޑަމް ސާޖިދާ ދެއްވި މި މެސެޖުގައި، ކުދިން ބިނާކުރުމުގައި ބެލެނިވެރިން ދޭ ލޯތްބާއި، ބަހައްޓާ ކެތްތެރިކަމާއި އަދި ކުރާ ގުރުބާނީތަކަށްޓަކައި ހުރިހާ ބެލެނިވެރިންނާއެކު ސާބިތުވެ ހުންނެވިކަން ހާމަކުރެއްވިއެވެ. އެކަމަނާ ފާހަގަކުރެއްވި ގޮތުގައި ބެލެނިވެރިންގެ ފުރިހަމަ އިޚްލާޞްތެރިކަމަކީ ވަރުގަދަ އާއިލާތަކެއް ބިނާވުމުގެ އަސްލެވެ. އަދި މިއީ އޯގާތެރި މުޖުތަމައެއް ގާއިމުވުމުގެ ބިންގާ ކަމުގައިވެސް އެކަމަނާ ވިދާޅުވިއެވެ.
ދިވެހި މުޖުތަމައުގެ ތެރޭގައި އާއިލީ ގުޅުންތަކަށް ދެވޭ މުހިއްމުކަމުގެ މައްޗަށް އަލިއަޅުއްވާލައްވަމުން، މެޑަމް ސާޖިދާ ވިދާޅުވީ ދިވެހިންނަކީ އަބަދުވެސް އާއިލީ ގުޅުންތަކަށް ވަރަށް ބޮޑު އިސްކަމެއްދޭ ބައެއް ކަމަށެވެ. އަދި ބެލެނިވެރިންނަށް ބޭނުންވާ އެހީތެރިކަމާއި އެއްބާރުލުން ފޯރުކޮށްދިނުމުގައި އެންމެން ގުޅިގެން މަސައްކަތް ކުރުމަށް އެކަމަނާ ގޮވާލެއްވިއެވެ.
On this #GlobalDayofParents, I stand with all parents whose love, patience, and sacrifice nurture the lives of our children. Their devotion is the foundation of strong families and a compassionate society.
As Maldivians, we cherish the bond of family at the heart of our… pic.twitter.com/dmDseV1OU0
— First Lady Sajidha Mohamed (@sajidhaamohamed) June 1, 2026
މީގެ އިތުރުން، ކޮންމެ ކުއްޖަކީވެސް ރައްކާތެރިކަމާއި، އޯގާތެރިކަމުގެ ތެރޭގައި ބޮޑުވާ، އަދި ކުރިއަށްދާނެ ފުރުސަތުތައް ފަހިވެފައިވާ ކުއްޖަކަށް ހެދުމަށްޓަކައި ބެލެނިވެރިން އަދާކުރާ މުހިއްމު ދައުރު ފާހަގަކޮށް، އެކަން ފާހަގަކުރުމުގެ މުހިއްމުކަން އެކަމަނާގެ މެސެޖުގައި ބަޔާންކުރައްވާފައިވެއެވެ.
ދުނިޔޭގެ ބެލެނިވެރިންގެ ދުވަސް ކޮންމެ އަހަރަކުވެސް ފާހަގަކުރަނީ ދަރިން ތަރުބިއްޔަތުކުރުމުގައި ބެލެނިވެރިން ކުރާ ބުރަ މަސައްކަތުގެ އަގުވަޒަންކުރުމުގެ މަގްސަދުގައެވެ.
