ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން 500 މިލިއަން ޑޮލަރުގެ ސުކޫކާއި އިންޑިއާއަށް ދައްކަންޖެހޭ 50 މިލިއަން ޑޮލަރުގެ ދަރަނި ކާމިޔާބުކަމާއެކު ދައްކައި ޚަލާޞްކުރުމަކީ، ރާއްޖޭގެ މިހާރުގެ އިޤްތިޞާދީ ޙާލަތަށް ބަލާއިރު ލިބުނު ބޮޑު ކާމިޔާބީއެއް ކަމަށާއި، މިއީ އާދައިގެ ކާމިޔާބީއެއް ނޫންކަމަށް ރައްޔިތުންގެ މަޖިލީހުގެ ހިތަދޫ މެދު ދާއިރާގެ މެންބަރު އަޙްމަދު އަޒާން ވިދާޅުވެއްޖެއެވެ.
އަޒާން ”އެކްސް“ ގައި ކުރެއްވި ޕޯސްޓެއްގައި ވިދާޅުވީ، ރާއްޖޭގެ ބޭރުގެ ރިޒާވްއަށް ބޮޑު ބާރެއް ބޮޑުވެފައިވާ ދަނޑިވަޅެއްގައި، މިފަދަ ބޮޑު ޢަދަދެއް ދައްކައި ނިންމުމަކީ ރައީސް ޑރ. މުޢިއްޒާއި އެމަނިކުފާނުގެ ޓީމަށް ވަރަށް ބޮޑަށް ކްރެޑިޓް ޙައްޤުވާ ކަމެއް ކަމަށެވެ.
ރާއްޖެއިން މީގެ ކުރިން ދަރަނި ދެއްކުމުގައި ފެއިލްވެފައި (ޑީފޯލްޓްވެފައި) ނުވާކަމަށް ބުނެ ބައެއް ފަރާތްތަކުން މި ކާމިޔާބީގެ އަގު ވައްޓާލަން މަސައްކަތް ކުރި ނަމަވެސް، މީގެ ކުރިން ދުވަހަކުވެސް ރާއްޖެއިން މިހާ ކުރު މުއްދަތެއްގެ ތެރޭގައި، އަދި މިހާ ބޮޑު ތާށިކަމެއްގެ ތެރެއިން މިފަދަ ބޮޑު ޢަދަދެއް އެއްފަހަރާ ދައްކަން ޖެހިފައި ނުވާކަން އަޒާން ފާހަގަކުރެއްވިއެވެ.
President @MMuizzu and his team deserve due credit for settling the USD 500 million sukuk and the USD 50 million payment to India. Given the pressure on reserves and external financing, this was not an ordinary achievement.
Some may downplay it by saying Maldives has never…
— Ahmed Azaan (@axanner) June 1, 2026
އަޒާން އިތުރަށް ހާމަކުރެއްވި ގޮތުގައި، ދަރަނި ނުދެއްކި ”ޑީފޯލްޓް“ ވިނަމަ، އޭގެ ނޭދެވޭ އަސަރު މުޅި ދައުލަތަށް ކުރާނެއެވެ. އެގޮތުން ބޭރުގެ ފަރާތްތަކުން ރާއްޖެއަށް އޮންނަ އިތުބާރު ގެއްލި، ލޯނު ނެގުމުގެ އަގު ބޮޑުވެ، ޑޮލަރުގެ ތާށިކަން އިތުރަށް ގޯސްވާނެއެވެ. މީގެ އިތުރުން މުދާ އިމްޕޯޓް ކުރުމަށާއި، ތަކެތީގެ އަގުތަކަށާއި، ވިޔަފާރިތަކުގެ އިތުރުން އާންމު ރައްޔިތުންގެ ވަޒީފާއާއި ދިރިއުޅުމަށް އިންތިހާއަށް ދަތިތަކާ ކުރިމަތިލާން ޖެހުނީސްކަން އޭނާ ފާހަގަކުރެއްވިއެވެ.
އަވަށްޓެރި ބައެއް ޤައުމުތަކަށް މިފަދަ ޙާލަތްތަކުގައި ކުރިމަތިވި ހިތްދަތި ތަޖުރިބާތަކަށް އިޝާރާތް ކުރައްވަމުން އަޒާން ވިދާޅުވީ، ރާއްޖެއިން މާލީ ބޮޑު ކާރިސާއަކުން ސަލާމަތްވެ، ހަމަޖެހުން ޤާއިމުކުރެވުމަކީ، ރާއްޖެ ފަދަ އިމްޕޯޓަށް ބަރޯސާވާ ޤައުމަކަށް ނުހަނު މުހިންމު ކަމެއް ކަމަށެވެ.
ސަރުކާރުގެ މި ފިޔަވަޅާއެކު ރާއްޖޭގެ މާލީ ދާއިރާއަށް އިތުރު ކުރިއެރުމާއި އިތުބާރު ލިބިގެންދާނެ ކަމަށް އިޤްތިޞާދީ މާހިރުންވެސް ދެކެވަޑައިގަންނަވައެވެ.
