ބޭންކް އޮފް މޯލްޑިވްސް (ބީއެމްއެލް) ގެ ކާޑުތަކުން ކުރާ ބޭރު ފައިސާގެ މުއާމަލާތްތަކަށް މިހާރު ކަނޑައަޅާފައިވާ ލިމިޓްތަކަށް މި ހިނގާ ޖޫން މަހުގެ ފަހުގެ ކޮޅު ލުޔެއް ލިބޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މި މޭރުމުން ވިދާޅުވީ ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ސަރުކާރުން ކުރިއަށްގެންދިއުމަށް ރާވާފައިވާ މުހިއްމު މަސައްކަތްތަކާ ގުޅޭގޮތުން މައުލޫމާތު ދެއްވަމުންނެވެ. އެމަނިކުފާނު ވިދާޅުވީ، ބީއެމްއެލްއަށް ދިމާވެފައިވާ ދަތިތަކަކާ ގުޅިގެން ކާޑުތަކުގެ ލިމިޓް ކުޑަކޮށްފައިވީ ނަމަވެސް، އެކަމާ ގުޅޭގޮތުން ބޭންކާ މަޝްވަރާކުރުމުން އުންމީދީ ޖަވާބެއް ލިބިފައިވާ ކަމަށެވެ.
”ބީއެމްއެލްއަށް ދަތިތަކެއް ދިމާވާތީވެ މިހާރު ކުޑަކޮށް ލިމިޓްކޮށްލައިގެން އެއުޅެނީ. އެހެންނަމަވެސް އިއްޔެގަ ރައީސް އޮފީހުން ބޭންކަށް މައުލޫމާތު ހޯދަންބެލިއިރުގައި މި މަސް ނިމޭއިރު އިރާދަކުރެއްވިއްޔާ ވަރަށް ބޮޑު ތަނުން ލުއިކޮށްދޭނެކަމުގެ އިޝާރާތެއް ކުރައްވާފައިވަނީ،“ – ރައީސް ވިދާޅުވިއެވެ.
ބީއެމްއެލްގެ ރުފިޔާ ކާޑުތަކުން ރާއްޖެއިން ބޭރުގެ އީކޮމާސް އަދި އޮންލައިން ރީޓެއިލް ސައިޓްތަކުން ކުރާ މުއާމަލާތްތަކަށް ލިމިޓްތަކެއް ގެންނަން ޖެހުނު ސަބަބާ ގުޅޭގޮތުން އެ ބޭންކުގެ ސްޕޯކްސް ޕަރސަން މުޙައްމަދު ސަޢީދު ވިދާޅުވީ، މެދުއިރުމަތީގެ މަސްރަހާ ގުޅިގެން ފަތުރުވެރިން އަންނަ އަދަދު ދަށްވެ، ބޭންކަށް ގަންނަން ލިބޭ ބޭރު ފައިސާ މަދުވެފައިވާ ކަމަށެވެ.
މީގެ ކުރިން ބޭންކުން ދުވާލެއްގެ މައްޗަށް 1.33 މިލިއަން ޑޮލަރު މިފަދަ މުއާމަލާތްތަކަށް ވިއްކަމުންދިޔަކަންކަން ފާހަގަކުރައްވަމުން އޭނާ ވިދާޅުވީ، މި އަދަދު މިހާރު ބޮޑުތަނުން މަދުވެފައިވާ ކަމަށެވެ. ކަން މިހެން އޮތުމާއެކު، ބޭންކުން މިހާރު އަމަލުކުރަމުން އަންނަ އުސޫލަކީ ދުވާލެއްގެ މައްޗަށް ކަނޑައަޅާފައިވާ ވަކި ބަޖެޓެއްގެ ތެރެއިން ޑޮލަރު ވިއްކުމެވެ. އެ ބަޖެޓް ހަމަވުމުން އެ ދުވަހަށް ކަނޑައެޅިފައިވާ ލިމިޓް ހަމަވީއެވެ.
