ހަނގުރާމަ ހުއްޓާލުމަށް ބާއްވާ ސުލްޙައިގެ މަޝްވަރާތައް ކުރިއަށްދަނިކޮށް، އެމެރިކާއާއި އީރާނާ ދެމެދު މިހާތަނަށް ހިނގި އެންމެ ނުރައްކާތެރި އަސްކަރީ ކުރިމަތިލުން ރޭގެ ވަގުތެއްގައި ހިނގައިފިއެވެ. އޭޕްރީލް މަހު ޤާއިމުކުރި ސުލްޙައިގެ އެއްބަސްވުމާ ޚިލާފަށް، އެމެރިކާގެ ވައިގެ ސިފައިން ވަނީ އީރާނުގެ ދެކުނު ގޮނޑުދޮށުގައިވާ އަސްކަރީ މަރުކަޒުތަކަށް ވަރުގަދަ ބޮންއެޅުމުގެ ޙަމަލާތަކެއް ދީފައެވެ. އީރާނުގެ ރިވޮލިއުޝަނަރީ ގާޑްސް (އައި.އާރު.ޖީ.ސީ) އިން ވަނީ މިއަދު ހެނދުނު އެމެރިކާގެ އަސްކަރީ މަރުކަޒަކަށް އަމާޒުކޮށް ވަގުތުން މިސައިލާއި ޑްރޯންގެ ވަރުގަދަ ރައްދު ޙަމަލާއެއް ދީފައެވެ.
ސިރީކް އައިލެންޑްގެ ޓަވަރަށް ޙަމަލާދިނުމާއި ކުވެއިތުގެ ސައިރަން
އީރާނުގެ މީޑިއާތަކުން ރިޕޯޓްކޮށްފައިވާ ގޮތުގައި، ބޭރުގެ އަސްކަރީ ބާރުތަކުން ވަނީ ހޯރްމުޒްގާން ޕްރޮވިންސްގެ ސްޓްރެޓީޖިކް ރަށެއް ކަމަށްވާ ސިރީކް އައިލެންޑްގެ ޓެލެކޮމިއުނިކޭޝަން ޓަވަރު ހަލާކުކޮށްލަން ޙަމަލާދީފައެވެ. އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުނީ އީރާނުން އެމެރިކާގެ އެމްކިއު-1 ޑްރޯންއެއް ވައްޓާލުމާ ގުޅިގެން، ރައްދުގައި އީރާނުގެ ގޮރޫކް އަދި ގޭޝްމް އައިލެންޑްގައި ހުރި ރާޑަރުތަކާއި ދިފާޢީ ނިޒާމުތަކަށް ބޮންއަޅާފައިވާ ކަމަށެވެ.
މީގެ ސީދާ ރައްދުގައި، އީރާނުގެ އައި.އާރް.ޖީ.ސީ އިން ވަނީ އެ ޓެލެކޮމް ޓަވަރަށް ބޮންއަޅަން މަތިންދާބޯޓުތަކާއި ޑްރޯންތައް ފޮނުވި އަސްކަރީ އެއަރބޭސް ހޯދައި، އެތަނަށް މިސައިލް ޙަމަލާތަކެއްދީ ބޮޑެތި ގެއްލުންތަކެއް ދީފައެވެ. މި ޙަމަލާތަކާ ގުޅިގެން، އެމެރިކާގެ އެންމެ ބޮޑު އަސްކަރީ މަރުކަޒު އޮންނަ ކުވެއިތުގެ އެއަރ-ޑިފެންސް ސިސްޓަމްތައް ވަނީ އެކްޓިވްވެފައެވެ. ކުވެއިތުގެ ރަސްމީ ނޫސް އޭޖެންސީ ”ކޫނާ“ އިން ރިޕޯޓްކޮށްފައިވާ ގޮތުގައި، މިއަދު ހެނދުނު މުޅި ކުވެއިތުގައި ވަނީ ހަނގުރާމައިގެ ނުރައްކަލުގެ ސައިރަންގެ އަޑު ގޮވާފައެވެ.
މި އަސްކަރީ ކުރިމަތިލުންތަކުން ދޭހަވަނީ، ބައިނަލްއަޤްވާމީ މައިދާނުގައި ސުލްޙައިގެ ވާހަކަތަކާއި އެއްބަސްވުންތައް ދައްކައިގެން ތިބޭއިރުވެސް، ކާފަރު ބާރުތަކުން އެމީހުންގެ މަސްލަޙަތުތަކާ ދެކޮޅުވާ ކޮންމެ ޤައުމެއްގެ މުވާޞަލާތީ އަދި ސަލާމަތީ ނިޒާމުތައް ބަލިކަށިކޮށްލުމުގެ އިސްތިރާޖީ ޕްލޭންތައް އެކުލަވާލާ ކަމެވެ. ރައީސް ޑޮނަލްޑް ޓްރަމްޕް ސޯޝަލް މީޑިއާގައި ”އީރާނުން ބޭނުންވަނީ އެއްބަސްވުމަކަށް އަންނަން“ ކަމަށް ބުނެ ބަޔާންތައް ނެރެމުންދާއިރުވެސް، އީރާނުގެ ބަނދަރުތަކަށް ހުރަސްއެޅުމާއި ސަރަޙައްދީ ބިންތަކަށް ބޮންއެޅުމުގެ އޮޕަރޭޝަންތައް ދަނީ މެދުނުކެނޑި ކުރިއަށެވެ.
