ނަމާދު ވަގުތުތަކާ ދިމާކޮށް ކުޅިވަރު ނުކުޅޭވޭ ގޮތް ހެދުމަށް ގަވާއިދުތަކެއް ހެދުމުގެ މަސައްކަތް ފައްޓަވާފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މި މޭރުމުން ވިދާޅުވީ ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ސަރުކާރުން ކުރިއަށްގެންދިއުމަށް ރާވާފައިވާ މުހިއްމު މަސައްކަތްތަކާ ގުޅޭގޮތުން މައުލޫމާތު ދެއްވަމުންނެވެ.
ރައީސް ވިދާޅުވީ ދިވެހިންނަކީ އިސްލާމްދީނާއި ގާނޫނުއަސާސީގެ ހަމަތަކުގެ މަތިން ކަންކަން ކުރާ ބައެއް ކަމަށެވެ.
ނަމާދު ވަގުތު ނިމިގެންދާއިރު ވެސް ކުޅިވަރު ކުޅުމުގައި ތިބުމަކީ އެންމެ ރަނގަޅު ގޮތް ނޫންކަން ފާހަގަކުރައްވަމުން ރައީސް ވިދާޅުވީ، ގަސްތުގައި ނޫނަސް ކަންކަން މިހާރު ހިނގަމުން އަންނަ ގޮތަކީ އެއީ ކަމަށެވެ. އަދި އެކަމާ ނުހަނު ހިތާމަކުރައްވާ ކަމަށްވެސް އެމަނިކުފާނު ވިދާޅުވިއެވެ.
ރައީސް ވިދާޅުވީ، ބަންގި ގޮވާ ވަގުތުން ފެށިގެން ކަނޑައެޅޭ ވަކި ވަގުތުކޮޅަކަށް ހުރިހާ ކުޅިވަރުތަކެއް މެދުކަނޑާލުމަށް ގެންނަންޖެހޭ ބައެއް ބަދަލުތައް ގެންނަވާނެ ކަމަށެވެ.
”ބަންގި ގޮވާ ވަގުތުން ފެށިގެން ކަނޑައެޅޭ ވަކި ވަގުތުކޮޅަކާ ހަމައަށް ހުރިހާ ކުޅިވަރުތަކެއް މެދުކަނޑާލެވޭ ގޮތަށް 20 ވަރަކަށް މިނެޓް ނަމަވެސް، ގެންނަން ޖެހޭ ބަދަލުތަކެއް ގެންނާނަން،“ – ރައީސް ވިދާޅުވިއެވެ.
ރައީސް އިތުރަށް ވިދާޅުވީ، ސަރުކާރުން އަޅާ ސްޕޯޓްސް ކޮމްޕްލެކްސްތަކާއި އިމާރާތްތަކާއި ކުޅިވަރު ކުޅޭ މައިދާން، އެކުވެނި ފަދަ ތަންތަނުގައި ވުޟޫކޮށް ނަމާދުކުރެވޭނޭހެން ފެސިލިޓީތައް ގާއިމުކުރެވިގެންދާނެ ކަމަށެވެ. އަދި އެ މަސައްކަތްތައް ކުރުމަށް ވާންޖެހޭ އެންމެފަހުގެ ތައްޔާރީތައް ވުމަށްޓަކައި ކުރަންޖެހޭ މަޝްވަރާތައް ކުރަމުން އަންނަ ކަމަށްވެސް އެމަނިކުފާނު ވިދާޅުވިއެވެ.
