ށ. ގޮއިދޫގައި ހަމައެކަނި މިސްކިތުގެ އިމާމަކަށް ހުރި މީހަކު، އެއްޖިންސުން ގުޅުންހިންގާ މަންޒަރު ފެންނަ ވީޑިއޯއެއް އަމިއްލައަށް ސޯޝަލް މީޑިއާ ގުރޫޕަކަށް ފޮނުވި މައްސަލައާ ގުޅިގެން، އޭނާ ވަޒީފާއިން ވަކިކޮށްފި ކަމަށް އިސްލާމިކް މިނިސްޓަރު ވިދާޅުވެއްޖެއެވެ.
މި ހާދިސާ ހިނގާފައިވަނީ ށ. ގޮއިދޫގެ ގިނަ އަދަދެއްގެ ރައްޔިތުން ހިމެނޭ ވައިބާ ގުރޫޕަކަށް، އެ ރަށު މިސްކިތުގެ އިމާމު، އާމިރު ނަމަކަށް ކިޔާ މީހަކު އެއްޖިންސުން ގުޅުންހިންގާ މަންޒަރު ފެންނަ ވީޑިއޯއެއް އަމިއްލައަށް ފޮނުވުމާ ގުޅިގެން ކަމަށް މައުލޫމާތު ލިބެއެވެ. ބެލެވޭ ގޮތުގައި މި ވީޑިއޯ އެ ގުރޫޕަށް ފޮނުވުނީ އޭނާއަށް އޮޅުމަކުން ކަމަށްވެއެވެ.
މައުލޫމާތު ލިބިފައިވާ ގޮތުގައި އާމިރަކީ މީގެ ކުރިންވެސް އެއްޖިންސުން ގުޅުން ހިންގުމުގެ ކުށް ސާބިތުވެފައިވާ މީހެކެވެ. އޭނާ އިމާމުކަމުގެ މަގާމަށް އައްޔަންކުރެވުނު ފަހުންވެސް އެކި ފަހަރު މަތިން މިފަދަ ތުހުމަތުތައް ކުރެވި، މިކަމާ ގުޅުންހުރި ވީޑިއޯތަކާއި ސްކްރީންޝޮޓްތައް ދޭތެރެއަކުން އާންމުވަމުން ގޮސްފައިވާ ކަމަށްވެއެވެ. ނަމަވެސް، މި ހާދިސާ ހިނގުމާ ހަމައަށްވެސް އޭނާ ހުރީ އެ ރަށުގެ މިސްކިތުގެ އިމާމުކަމުގެ މަގާމުގައި ކަމަށް ސޯޝަލްމީޑިއާގައި ލިޔެފައިވެއެވެ.
މި ހާދިސާއާ ގުޅިގެން ގޮއިދޫ ރައްޔިތުންގެ މެދުގައި ވަނީ ބޮޑު ނުތަނަވަސްކަމެއް އުފެދިފައެވެ. ރަށުގެ އިމާމުގެ ފަރާތުން ފެނުނު މި ދަށު ދަރަޖައިގެ އަމަލުގެ ސަބަބުން، ގިނަ ބަޔަކު ވަނީ އޭނާގެ ފަހަތުގައި ނަމާދުކުރުމަށް ދެކޮޅު ހަދައި، އެއީ މުޅި ރަށުގެ ދީނީ އަދި އަހުލާގީ މިންގަނޑަށް ލިބުނު ބޮޑު ހުތުރެއްގެ ގޮތުގައި ސިފަކޮށްފައެވެ.
ރައްޔިތުންގެ ޝަކުވާތަކާއި ކަންބޮޑުވުންތައް އިތުރުވެފައި ވަނިކޮށް، ’އެކި އެމްވީ‘ އިން މިކަމާއި ގުޅިގެން ސުވާލު ކުރެއްވުމުން އިސްލާމިކް މިނިސްޓަރު ޑރ. ޝަހީމް ޢަލީ ސަޢީދު ވަނީ މި މައްސަލައަށް ރައްދު ދެއްވާފައެވެ. މިނިސްޓަރު ވިދާޅުވީ، އެ މައްސަލަ ބަލައި މިހާރު އޭނާ އިމާމުކަމުގެ ވަޒީފާއިން ވަކިކޮށްފައިވާ ކަމަށެވެ. މިކަމާއި ގުޅިގެން ދިވެހި ފުލުހުންގެ ޚިދުމަތާއި ސުވާލު ކުރުމުން މިހާތަނަށް ޖަވާބެއް ދީފައި ނުވެއެވެ.
ގޮއިދޫ ރައްޔިތުން ދަނީ މި މައްސަލަ މިނިސްޓްރީ އޮފް އިސްލާމިކް އެފެއާޒް އާއި ފުލުހުން ސީރިއަސް މައްސަލައެއްގެ ގޮތުގައި ތަހުގީގުކޮށް، އިސްލާމީ ޝަރީއަތާއި ގާނޫނުގެ ތެރެއިން އެކަށީގެންވާ ހަރުކަށި ފިޔަވަޅު އެޅުމަށް ގޮވާލަމުންނެވެ.
