ކައުންސިލުތަކުގެ އިދާރީ މުވައްޒަފުންގެ މުސާރަ ބޮޑު ކުރެވޭނީ ރައްޔިތުންގެ މަޖިލީހުގެ ތެރެއިން ޤާނޫނަށް ބަދަލު ގެނެސްގެން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އާންމުންގެ ސުވާލުތަކަށް ޖަވާބުދެއްވުމަށް ކުރިއަށް ގެންދާ “ރައީސްގެ ޖަވާބު” ސިލްސިލާގެ ތެރެއިން މ. ނާލާފުށި ކައުންސިލުގައި މަސައްކަތްކުރާ އިދާރީ މުވައްޒަފަކު، ޑިގްރީ ހާސިލުކޮށްގެން ތިބި މުވައްޒަފުންގެ މުސާރަ އޭގެ ދަށްފަންތީގެ މުވައްޒަފުންގެ މުސާރައަށް ވުރެ ދަށްކަމުގެ ކަންބޮޑުވުން ހިއްސާކޮށް، ކައުންސިލުގެ އިދާރީ މުވައްޒަފުންގެ މުސާރައަށް ބަދަލެއް ގެނައުމުގެ ވިސްނުންފުޅު ހުރިތޯ ކުރި ސުވާލަށް ޖަވާބު ދެއްވަމުން ރައީސް ވިދާޅުވީ މަޖިލީހުގެ ކަމާ ގުޅުން ހުރި ޤާނޫނުގެ ތެރެއިން ކައުންސިލުތައް ގިންތިކޮށްފައި ވަނީ ވަރަށް ދަށްފަންތިއެއްގައި ކަމަށެވެ.
ސަރުކާރާއި ފިނޭންސް މިނިސްޓްރީން ކައުންސިލުތަކުގެ އިދާރީ މުވައްޒަފުންގެ މުސާރަ ބޮޑު ކުރުމަށް މަސައްކަތްކުރި ނަމަވެސް ކައުންސިލުތައް ގިންތިކޮށްފައި ހުންނަ ގޮތުން އެކަން ކުރުމަށް ދަތިތަކެއް ހުރި ކަމަށް ރައީސް ވިދާޅުވިއެވެ. ކައުންސިލުތަކުގެ މުވައްޒަފުންގެ މުސާރަ ބޮޑުކުރުމަކީ ބޭނުންފުޅުވާ ކަމެއް ކަން ފާހަގަކުރައްވާ އެމަނިކުފާނު ވިދާޅުވެފައި ވަނީ އެކަން ކުރެވޭނީ އާމްދަނީ އިތުރުވެގެންނާއި އިޤުތިޞާދު ހަރުދަނާ ކުރެވޭ ވަރަކުން ކަމަށެވެ.
“ޖުމްލަކޮށް ހުރިހާ މުވައްޒަފުންގެ މުސާރަތައް ބޮޑު ކުރުމަކީ އަޅުގަނޑު ބޭނުންވާ ގޮތް. އެހެންނަމަވެސް އަޅުގަނޑުމެންނަށް އާމްދަނީ އިތުރުވެގެންދާ ވަރަކުން، އިޤުތިޞާދު ހަރުދަނާކޮށް ވަރުގަދަކުރެވޭ ވަރަކުން، މުސާރަތައް ބޮޑު ކުރެވޭނީ،” – ރައީސް ޑރ. މުޙައްމަދު މުޢިއްޒު
ރައީސް ވިދާޅުވި ގޮތުގައި ކައުންސިލުތަކުގެ އިދާރީ މުވައްޒަފުންގެ މުސާރައިގެ މައްސަލައަކީ ވަރަށް ބޮޑުވެފައި އޮތް މައްސަލައެއް ކަމުގައެވެ. އެހެންނަމަވެސް، އެ މުވައްޒަފުންގެ މުސާރައަށް މިހާރަށް މިހާރަށް ހައްލެއް ގެނެވޭނީ މަޖިލީހުގެ ތެރެއިން ކަންތައްތަކެއް ކުރެވިގެން ކަމަށް ވެސް ރައީސް ފާހަގަކުރެއްވިއެވެ.
