ގއ. އަތޮޅުގައި ހިންގަމުން އަންނަ އެންއެޗް ކަލެކްޝަން މޯލްޑިވްސް ހަވޮއްޑާ ރިސޯޓުގައި ޗުއްޓީ ހޭދަކުރަމުންދިޔަ ފަތުރުވެރިއަކު މިއަދު ގެނބިގެން މަރުވެއްޖެއެވެ.
މި ހާދިސާގައި މަރުވެފައިވަނީ އުމުރުން 74 އަހަރުގެ ޗައިނާ ފިރިހެނެކެވެ. ރިސޯޓުން މި މީހާ ގެނބިގެން ފަރުވާ ދިނުމަށްޓަކައި ގެންގޮސްފައިވަނީ ގދ. ތިނަދޫގައި ހުންނަ ޑރ. އަބްދުއްސަމަދު މެމޯރިއަލް ހޮސްޕިޓަލަށެވެ.
ޑރ. އަބްދުއްސަމަދު މެމޯރިއަލް ހޮސްޕިޓަލުން މައުލޫމާތު ދެއްވި ގޮތުގައި، އެ ފަތުރުވެރިޔާ ހޮސްޕިޓަލަށް ގެންދިޔައިރުވެސް އޮތީ މަރުވެފައެވެ. އެހެންކަމުން، މިހާރު ކުރިއަށްދަނީ މަރު ސާބިތުކުރުމަށްޓަކައި ފުރިހަމަކުރަންޖެހޭ އިޖުރާއަތްތައް ފުލުހުންނާ ގުޅިގެން ފުރިހަމަކުރުމުގެ މަސައްކަތް ކަމަށް އެ ހޮސްޕިޓަލުން ބުނެއެވެ.
މި ހާދިސާއާ ގުޅިގެން ފުލުހުން ބަލަންޖެހޭ ކަންކަން އިތުރަށް ތަހުގީގު ކުރަމުންދާ ކަމަށް މައުލޫމާތު ލިބެއެވެ. ފަހަކަށް އައިސް ރާއްޖޭގެ އެކި ރިސޯޓުތަކާއި މޫދަށް އެރޭ ސަރަހައްދުތަކުގައި މިފަދަ ހިތާމަވެރި ހާދިސާތައް ހިނގުން ވަނީ އިތުރުވެފައެވެ.
