ރާއްޖެ އާއި އިންޑިއާ އާ ދެމެދު ހެދި އެއްބަސްވުމުގެ ދަށުން އައްޑޫ ސިޓީގައި ތިބި އިންޑިއާ ސިފައިން ރާއްޖޭން ފުރައިފިއެވެ.
މަޢުލޫމާތު ލިބޭ ގޮތުން އެ ސިޓީގައި ހަރަކާތްތެރިވަމުންދިޔަ ސިފައިން ފުރާފައި ވަނީ އައްޑޫގައި އޮތް ހެލިކޮޕްޓަރުގެ ބަދަލުގައި އާ ހެލިކޮޕްޓަރެއް ހިފައިގެން އައި އިންޑިއާގެ މަނަވަރެއްގައެވެ. އެ މަނަވަރު އައްޑޫގައި ބަނދަރުކޮށްފައި ވަނީ މިދިޔަ މަހުގެ 29 ވަނަ ދުވަހުއެވެ.
ރާއްޖޭގައި ގާއިމުވެ ތިބި އިންޑިއާގެ ސިފައިން އަނބުރާ އެ ޤައުމަށް ފޮނުވާލުމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ. އެ ވަޢުދުފުޅާ އެއްގޮތަށް އެމަނިކުފާނުގެ ވެރިކަމުގެ ފުރަތަަމަ ދުވަހު ވަނީ ރާއްޖޭގައި ތިބި އިންޑިއާ ސިފައިން އަނބުރާ ގެންގޮސްދިނުމަށް އެ ޤައުމުގެ ސަރުކާރުގައި ރަސްމީކޮށް އެދިވަޑައިގެންފައެވެ.
ދެ ޤައުމުން އެއްބަސްވެފައި ވަނީ މާރޗު މަހުގެ 10 ވަނަ ދުވަހުގެ ކުރިން އައްޑޫގައި ތިބި ސިފައިން ފޭބުމަށާއި ހދ. ހަނިމާދޫ އާއި ލ. ކައްދޫގައި ތިބި އިންޑިއާގެ ސިފައިން އަންނަ މެއި މަހުގެ 10 ވަނަ ދުވަހުގެ ކުރިން ފޭބުމަށެވެ.
މި ސަރުކާރުން އާންމުކުރި މަޢުލޫމާތުތަކަށް ބަލާއިރު ރާއްޖޭގައި އިންޑިއާ ސިފައިންގެ 88 މީހަކު ތިއްބެވެ.
