ދިވެހިރާއްޖެއަށް އެތެރެކުރާ ދުންފަތުގެ ބާވަތްތަކުން ނަގާ އިމްޕޯރޓް ޑިއުޓީ ހަތަރު ރުފިޔާއަށް ކުޑަކުރަން ދުނިޔޭގެ ސިއްހަތު ޖަމުއިއްޔާ (ޑަބްލިޔުއެޗްއޯ) އިން ލަފާދީފައިވާތީ އެ ބަދަލު ގެނައުމާ މެދުގައި ސަރުކާރުގެ ކަމާބެހޭ އިދާރާތަކުގެ މެދުގައި މަޝްވަރާ ކުރަން ނިންމާފައިވާ ކަމަށް ހޯމް މިނިސްޓަރު ޢަލީ އިޙްސާން ވިދާޅުވެއްޖެއެވެ.
މިނިސްޓަރު އިޙްސާން މި މޭރުމުން ވިދާޅުވީ، ދުނިޔޭގެ ދުންފަތުގެ އިސްތިއުމާލު ނުކުރާ ދުވަހާ ގުުޅިގެން ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ. މިނިސްޓަރު ވިދާޅުވީ، ރާއްޖޭގައި ވޭޕް މަނާކުރުމާ ގުޅިގެން ވޭޕް ބޭނުންކުރަމުން އައި މީހުން، ދުންފަތުގެ ބާވަތްތައް ބޭނުންކުރަން ފަށާނެ ކަމަށް ބަލައި އެ ބާވަތްތަކުން ނަގަމުން އައި އިމްޕޯރޓް ޑިއުޓީ މި ސަރުކާރުން ބޮޑުކޮށްފައިވާ ކަމަށެވެ.
ދުންފަތުގެ ބާވަތްތަކުން ނަގާ އިމްޕޯރޓް ޑިއުޓީއަށް އެންމެފަހުން ބަދަލެއް ގެނެސްފައިވަނީ 2024 ވަނަ އަހަރުގެ ނޮވެމްބަރު މަހުގެ ތެރޭގައެވެ. އެގޮތުން ދުންފަތުގެ ބާވަތްތަކުން ނަގާ ޑިއުޓީ ވަނީ 3.30 ރުފިޔާއިން އަށް ރުފިޔާއަށް ބޮޑުކޮށްފައެވެ.
އިމްޕޯރޓް ޑިއުޓީ ރޭޓަށް ބަދަލު ގެނައުމަކީ ދުންފަތް ކޮންޓްރޯލް ކުރުމަށް ދުނިޔޭގެ ހުރިހާ ގައުމަކުން ވެސް ގެންގުޅޭ އުކުޅެއްކަން ފާހަގަކުރައްވަމުން މިނިސްޓަރު އިޙްސާން ވިދާޅުވީ، ސަރުކާރުން ދުންފަތުގެ ބާވަތްތަކުން ނަގާ އިމްޕޯރޓް ޑިއުޓީ އޭރު ބޮޑުކުރީ ވޭޕް މަނާކުރުމާއެކު، ގިނަ ބަޔަކު ދުންފަތުގެ ބާވަތްތައް ބޭނުންކުރާނެ ކަމަށް ކުރެވުނު ދިރާސާތަކުން ހާމަވުމާއި ތަޖުރިބާކާރުންގެ ލަފާ ވެސް އެގޮތަށް ލިބުމުން ކަމަށެވެ.
”މި ވަގުތު އަޅުގަނޑުމެންނަށް ލިބިފައިވާ ބައެއް ދިރާސާތަކުން، ހާއްސަކޮށް ޑަބްލިއުއެޗުއޯއިން ހެއްދެވި ދިރާސާއަކުން ރާއްޖެއަށް ރިކޮމެންޑް ކުރައްވާފައި އޮތް އެއް ޑިއުޓީ ރޭޓަކީ 2026 ވަނަ އަހަރަށް އެއީ ސްޕެސިފިކް ރޭޓް ހަތަރު ރުފިޔާގެ ގޮތުގައި، މިއީ އަޅުގަނޑުމެން ހަމަ ކޮންސިޑަރ ކުރަމުން އަންނަ ރޭޓެއް މިހާރު ވެސް.“ – މިނިސްޓަރު އިޙްސާން ވިދާޅުވިއެވެ.
މިނިސްޓަރު އިޙްސާން އިތުރަށް ވިދާޅުވީ، ދުންފަތުގެ ބާވަތްތަކުން ނަގާ އިމްޕޯރޓް ޑިއުޓީ ރޭޓަށް ބަދަލު ގެނައުމުގެ ކުރިން ކަމާބެހޭ ހުރިހާ އިދާރާތަކާއި ހުރިހާ ސްޓޭކްހޯލްޑަރުންނާ މަޝްވަރާ ކުރައްވާނެ ކަމަށެވެ. މަޝްވަރާ ކުރެއްވުމަށްފަހު، ރޭޓަށް ބަދަލު ގެންނަންޖެހޭ ކަމަށް އެއްބަސްވޭ ނަމަ ގާނޫނަށް އިސްލާހު ގެންނަން ސަރުކާރުން ރައްޔިތުންގެ މަޖިލީހަށް ލަފާ ދޭނެ ކަމަށް މިނިސްޓަރު ވިދާޅުވިއެވެ.
